Read Eastern Krahn Jeen: 4 Bible Online

Jeen: 4 - Eastern Krahn bible

Jeen: 4

¹:Yee' :eh 'ble vorn-a'-: 'dekorn: jeh-a'-: 'de a 'klu-' :eh? Eh :se a-a' 'jeh-a' 'bhororn'-deh⧾-zon:⧾, :en se tuh vorn 'de a 'di :e?

²A 'bhorn deh, jorwor: a-a' 'ye-eh. 'De a 'dba nyor⧾, 'de :gwlehehn' sin-dih 'de a 'di dih, jorwor: a-a' 'ye-eh :chio'lo:. 'De a jeh, a vorn 'de a-a' 'jeh 'nyne-', jorwor: deh a 'bhorn-a, a-a' 'ye-eh. Deh no-eh, a-a' dhele: Nyorsoa dih 'do eh-a' dhih bo.

³:Yee' :mor a dhele-or dih 'do deh-a' dhih bo, a-a' 'worn, a-a' 'ye-eh. Deh no-eh, a 'bhorn-eh' a 'ye-eh deh :neheh' :no-dih:. Deh⧾ a dhele-a dih, a 'bhorn a 'ye a-a' 'jeh-a' :porluh⧾ dih 'pehn-dih:.

⁴A :mor nyor⧾ :or-a' no-a :dhehehn-deh⧾ 'do Nyorsoa bo, a se-eh yubo: :ka :mor a :ybeh-a 'kmo, :yee' a 'nyeh-a Nyorsoa-' :e? Nyor-beh-nyor-beh: :or kpon-a 'kmo 'be-', :yee' or-: Nyorsoa :za :dou'⧾ bo.

⁵:Ae' :mor a :taa 'ye, :yee' a 'da deh Nyorsoa-a' 'chlee-deh :za-a, eh se deh-' 'dhu-eh: :ke :e, :ka :zulu: Nyorsoa no-eh, 'de :on 'ti-a 'de :a 'di, on :korn-a :gwlehehn' :e, 'de an 'bhorn-a :a 'ye-a 'de Nyorsoa :due' bo :korn 'klein' :e?

⁶Jorwor: mla or po-a :a bo, or :zi 'o 'weh. Eh-: :korn dhih 'de Nyorsoa-a' 'chlee-deh 'da, Nyor⧾ :an 'beh-dih-a an-a' 'jeh 'i, Nyorsoa :se-' an-a' dhih ken dih 'worn-dih:. Jorwor: nyor⧾ :an ya-a an-a' 'jeh ya, or mu-uh mla bo :po.

⁷:Yee' 'do eh-a' dha, a :za a-a' 'jeh 'kwla 'de Nyorsoa bo. A :bla-dih: 'ku worn. :Mor a no-eh, :yee' an mu :ple, on 'ye a bo dih :tehn-dih:.

⁸A 'yle, a 'koan'-dih: Nyorsoa dih, :yee' or mu a dih 'koan'-dih: :ke. A :dle kwa, a :mor :or no-a deh⧾-zon:⧾ :no-nyor⧾. A :mor :or-a' 'si-dih-a buh⧾ 'sororn' dih, a gweh a-a' :porluh⧾ :vlehehn'.

⁹'Nyi a-a' :porluh⧾ 'kpa 'zorn, a 'ye son⧾ 'dlu :jli-dih:, a 'ye 'viin'-dhlumeh' po. A 'bor 'keleh-eh, a 'ye 'zlu. 'Nyi a-a' :porluh⧾ :ku kwa, a 'ye 'mona: :no-eh 'bor.

¹⁰A :ya a-a' 'jeh ya 'do :Gwlor :baa' ybei', :yee' or mu a ya-' 'duo:.

¹¹:Yee' 'an 'Klae :de-di'-boi'-a:, a 'bor a 'bei'-a' deh⧾-zon⧾ 'bhun dih :za-dih-eh, 'de a 'klu-'. Nyor-beh: :or :za-a deh-zon-' 'do or-a' 'Klae :de-di' 'bhun, 'de mor :or chehn-a or-a' zabe 'i 'suh, :yee' 'tele' :oo', eh-: or wlu-dih 'bhun dih, 'de or bla-dih-eh worn. :Mor :on :bla-dih-eh worn, :yee' :on :se 'o eh-a' dih :dhe-nyor:, jorwor: :yee' :mor eh-a' worn :bla-dih-nyor: 'o.

¹²Nyorsoa :due' or-: 'dhu nyor⧾ 'tele' 'nyii'-nyor-' 'dekorn: nyor⧾-a' zabe: :zi-nyor-'. Or :due' 'beh-dih: nyor-a' 'puh-dih-eh-: 'dekorn: nyor-a' 'kor-dih-eh-:. Jorwor: nyor :on 'dhu-eh:-', 'de :an chehn :on 'bei'-a' zabe 'i 'suh :eh?

¹³:Yee' a :to :dou'⧾, a :mor :or no-a, 'Zean'-: 'de mor :glaa'e-: :a mu 'de :gwlor :klaba' :dao' 'di :mu, :a 'ye 'o zon :due' zi, :a 'ye deh⧾ plo, :a 'ye 'wlii: :dhulu' 'ye,

¹⁴a :mor :or 'da :ao', a se-eh yubo: :sloror', deh :glaa'e-a mu-a 'de :ya. Deh a-a' :febeh' 'dhu-eh:-' :eh? A-a' :febeh' gweh :daluh', :mor on 'yle 'do ti-kpor-bei 'di, :yee' on 'ma-'.

¹⁵Jorwor: a :korn a 'ye :ao', :Mor eh 'dhu :Gwlor :baa'-a' ken dih 'worn-dih-deh-', :yee' :a mu 'kmo :gwle, :yee' :a mu :yeh :daa :no, 'de :a 'ye :yeh :dao' no.

¹⁶Jorwor: :yih a no-a :naa, me-: 'dhu, a 'beh-dih a-a' 'jeh 'i, 'de a za deh⧾ :klaba'⧾ a mu-a :no. 'Jeh 'i 'beh-dih-eh-a' klehkpeh :eh :ne :ao', eh :nyni-: 'yi.

¹⁷'Do eh-a' dha, nyor-beh-nyor-beh: :or yubo:-a deh 'jeh or :bleh-dih:-a 'i or 'ye-a' no, 'de or 'ye :ao', or se-eh no, :yee' deh-zon: 'o, or no.