Read Eastern Krahn 1 :Piteh' 3 Bible Online

1 :Piteh' 3 - Eastern Krahn bible

1 :Piteh' 3

¹:Yee' a :mor 'nynor⧾-kpao'⧾-a:, a :ya a-a' 'jeh ya 'do a-a'a: yibeor-boi' 'zorn. :Mor eh 'dhu an-a' nyor se Nyorsoa-a' wlu dhih 'jeh-' po, :yee' a-a' noo-kplen 'beh-dih: en 'ye-eh' no, 'de on 'ye-uh' dhih 'jeh-' po, a-a' :yeh se 'de on bo :wlu,

²:mor on 'ye :ka a no-a an-a' deh-' 'ye-eh Nyorsoa-a' dhih-: 'dekorn: :ka a no-a :vlehehn'-' :gweh-eh-:.

³A-a' 'yi dih :nmor-eh:-a' 'wluh-:-' 'noror ken ka, 'do deh⧾ a :bheh-dih-a bo, :eh 'kpa-a :ka a no-a a-a' 'mii-a' ken :na-eh-: 'goo-a' :bheh-dih-eh-: 'dekorn: 'tiei: :nmaa'e-a' pa-a'-:.

⁴Jorwor: 'nyi a-a' 'yi dih :nmor-eh 'wluh 'o a :porluh⧾ ken. Eh :korn eh 'ye 'yi dih :nmor-eh: :eh-a' :gweh-a worn no, :eh :kpoehn 'i, 'de :eh :dhe-a dih 'dhuan. 'Yi dih :nmor-eh-a' :yeh :daa, eh-: 'kpa deh ken 'gabaa 'do Nyorsoa ybei'.

⁵'Ka-: 'nynor⧾ :an za-a Nyorsoa :weheh', 'de :on dhe-or :gwlii' :zai', 'ka-: an no an-a' 'jeh 'yi dih :nmor-dih-eh. On :ya an-a' 'jeh ya 'do an-a'a: yibeor-boi' 'zorn,

⁶:eh po-a :Selor' :or dhe-a 'o 'Eble'hehn-a' 'tele' dih, 'de :or 'da-dih-or nyor :klaba'. A :mor :Selor'-a'a: 'nynor⧾-kpao'⧾-nynuu: 'o :ke, :mor eh 'dhu a no deh :eh 'sleh-a 'i, 'de a 'ye :ao', a se deh-a' :fano ple.

⁷:Yee' a :mor yibeor-boi'-a:, a kpon :porluh dih, 'do a-a'a: 'nynor⧾ bo :ke. A 'ye-uh deh-', deh no-eh, :ka a no-a dih :ku-eh, on se :ao' :ne, 'de mor on :ne a 'ble 'for 'de 'kmo :sie: :febeh' 'di. :Yee' :mor a no :ao', :yee' Nyorsoa-a mu a-a' bale-wlu 'worn-:.

⁸:Yee' eh-a' klehkpeh-a' 'dlu-' :jla 'da, a-a' klehkpeh, a kpon-dih: ken dih 'de a 'nyne-'. 'Nyi a-a' :porluh⧾ 'chlehn 'do a 'bei' bo. A :ybeh-dih: :ka a 'dhu-a 'Klae :de-di'-boi'-'. A 'ye a 'bei' :wehlih. :Yee' a :ya a-a' 'jeh ya.

⁹:Mor nyor no a deh-zon 'bhun, :yee' a-a' :no-' deh-zon, a-a' :za-' kpa. :Mor nyor 'jle-dih: a-uh, :yee' a-a' :no-' 'jlei, a-a' :za-' kpa. Jorwor: a po nyor :dao' :bhorlie' bo. Deh no-eh, eh-: :korn dhih 'de Nyorsoa 'da a-uh. :Yee' a mu :bhorlie' 'ye-:.

¹⁰:Yee' Nyorsoa-a' 'chlee-deh 'dae:, Nyor :or 'bhorn-a :or 'ye-a' :porluh-a' dih 'pehn-eh-a' 'kmo :ne-dih:, 'de :or 'ye-a' ti 'jeh 'ble, :yee' deh⧾-zon⧾ 'bor 'o or-a' :meo ken :yi-eh, :yee' sih 'bor 'o or-a' worn 'i :yi-eh.

¹¹:Yee' 'nyi or 'tali: deh⧾-zon:⧾ :no-eh dih, 'de or 'ye deh⧾ 'jeh ne no. Or :korn or 'ye wlu-' dih 'worn-eh 'kwla⧾-' dih 'bhorn, 'de or 'ye 'o eh klei' zi.

¹²Deh no-eh, :Gwlor :baa'-a' 'yli-eh :ne 'o 'yi 'sleh-nyor⧾ bo 'weh, 'de or to an-a' bale-wlu⧾ :dou'⧾ bo. Jorwor: or za nyor⧾ :an no-a deh⧾-zon⧾ 'yuba bo.

¹³:Or mu a deh-' :no :eh, :mor a-a' :porluh⧾ :taa 'plun, 'do deh 'jeh neh-a' no-a' bo :eh?

¹⁴Jorwor: a-a' :yeh 'ye 'kle, 'do deh a no-a, :eh 'sleh-a 'i, eh-a' dhih bo, :yee' :bhorlie' 'do a bo. A-a' :ple-' nyor⧾-a' :fano, 'de a-a' :porluh⧾-a' 'beh-dih:-' a 'worn dih, 'do an-a' dhih bo.

¹⁵'Nyi a-a' 'Klae-a' deh-' 'ye-eh 'wluh 'o a :porluh⧾ ken. :Yee' 'nyi or no :Gwlor :baa' 'de a-a' 'kmo :ne-eh 'di. A :ne buh⧾ ken, a 'ye-eh' ken dih zela:, 'do ti-a' klehkpeh bo, 'do nyor :or mu-a a dih dhele: bo, deh :korn-a dhih a dhe-a Nyorsoa :gwlii'.

¹⁶:Mor a :taa-eh no, :yee' a no-eh, 'de 'yi :kpoehn-: 'dekorn: deh-' 'ye ka-: 'di 'de a-a' :porluh⧾ :ne-' a zabe :kpon-dih:, 'de nyor⧾ :an za-dih-a a deh⧾-zon⧾ 'bhun dih, 'do a-a' kplen 'jeh :ne a no-a 'do 'Klae-a' dhih bo, 'de dhen 'ye-uh' no.

¹⁷:Mor eh 'dhu, Nyorsoa-a' 'ton :korn-deh-', :yee' eh :nmor-: 'yi, a 'ye 'kle 'ye, 'do deh 'jeh neh-a' no-a' bo, :eh :zi 'o deh-zon-a' 'kle 'ye-eh-'.

¹⁸Deh no-eh, 'Klae 'meh-' 'do :gwlor-nyor⧾-a' deh⧾-zon⧾-a' dhih bo kpor :due' 'klein'. Or no 'yi 'sleh-nyor:, jorwor: or 'meh-' 'do a :mor deh⧾-zon:⧾ :no-nyor⧾-a' 'gor bo, or 'ye a 'de Nyorsoa bo :ya. Or 'dba-eh: 'de yau: ka 'di, jorwor: Nyorsoa-a' :Zulu 'nyi-or :febeh' :dele' ka.

¹⁹:Zulu: :dao', mo-: or :yi-dih:-', 'de or po Nyorsoa-a' tubo-wlu⧾ 'de :gwlor-nyor⧾-a' :zulu:⧾ :en :ne-a 'de :kasue 'di bo,

²⁰:en se-a 'o Nyorsoa-a' 'tele' dih dhe, 'do ti :dhorno'⧾ :en zi-a 'di, ti Nyorsoa-a kpon-a :porluh dih, 'de :Noa'-a kor-a 'ni ken-meheh. 'De 'ni ken-meheh: :dao' 'di, nyor⧾ :meheh' na :ne 'de, mo-: 'ni :se-' kpa, 'ni 'puh-dih:.

²¹:Yee' 'ni :dao', eh-: :nyna 'o 'ni 'dlu :po-eh-a' 'gor bo dih, :eh 'puh-dih-a a-uh :naa. 'Ni 'dlu :po-eh :se :dle a-a' 'jeh-a' yau, on 'ye :vlehehn' dih :gweh :deh. Jorwor: eh no Nyorsoa dih dhele-wlu:, or 'ye-eh' no, a-a' :porluh⧾ :ne-' a zabe :kpon-dih:. Eh 'puh-dih: a-uh 'weh 'do :Yusu' 'Klae-a' nma-dih-deh 'di 'wluh-eh bo,

²²:or mu-a 'de Nyorsoa 'bli yai', 'de :or :dhe-a dih 'do or-a' :dila-son bo. 'Enjor-nyor⧾-: 'kpih-a' klehkpeh :en :ne-a 'o 'bluhba-: yao-: 'nyne bo-: en-' klehkpeh :daa, me-: :ya en-' 'jeh ya 'do or 'zorn.