Read Eastern Krahn 1 :Piteh' 4 Bible Online

1 :Piteh' 4 - Eastern Krahn bible

1 :Piteh' 4

¹:Yee' eh-a' dhih, :ka 'Klae-a' yau 'ye-a 'kle, :yee' a :korn a 'ye-eh' yubo: :ka a mu-a 'kle 'ye-: :ke. Deh no-eh, nyor :or :korn-a yau: 'ye-a' 'kle, :yee' deh⧾-zon:⧾ se-or wlu 'ken :korn :neheh'.

²:Yee' :mor a no :ao', :yee' a-a' 'kmo :ne-eh-a' klehkpeh :eh :sie:-a 'o dha 'bluhba ken, eh se 'de :gwlor-nyor⧾-a' 'bhororn'-deh⧾-zon⧾ bo :ne, jorwor: Nyorsoa-a' 'ton :korn-deh:, eh-: a :ne-dih: 'kmo.

³:Yee' a :zi-dih: ti :doru' :zai', 'do deh⧾ nyor⧾ :on se-a Nyorsoa yubo:, on :ybeh-a on 'ye-a' no, 'do en-' no 'da, :en 'dhu-a, 'pebe' 'i 'kpa-eh-: :porluh-a' sin-a' 'do 'nynor bo 'pehn-eh: bo-: nomor 'na-eh-: 'nynor⧾ :zie-eh-a' gor-: nomor 'na-eh-a' gor-: 'dekorn: zuu⧾-a' :weheh' :za-eh-: :eh no-a gu-kplen.

⁴:Yee' eh 'ma-dih: 'de nyor⧾ :on :ne a no-a deh⧾ :dao' 'di-: dih, deh no-eh, 'kmo-zon:⧾ on :ne a no-a :zai', :en :zi-a 'o dih, a-a' ple-ih 'de :neheh', 'de an 'jle-dih a-uh.

⁵Jorwor: an mu deh⧾ :dao' on no-a, en-' dhih bo zela: 'do Nyorsoa ybei', :or :ne-a buh⧾ ken, :or yi-a 'kmo :ne-nyor⧾-: 'dekorn: 'meheh'-nyor⧾-: an-a' zabe: :zi 'da.

⁶:Yee' eh-: :korn dhih, nyor⧾ :on 'meh-a, Nyorsoa-a' tubo-wlu:⧾ 'jeh :po-eh: 'de on bo :zai', 'de an mu 'meh-:, keen' :mloror' an-a' zabe :zi-eh:-' :weh, 'do 'meh-a' bo, :ka Nyorsoa-a no-a :gwlor-nyor⧾-a' klehkpeh, an-a' zabe: :zi-eh. :Yee' an mu 'de Nyorsoa bo :ne.

⁷:Yee' deh⧾-a' klehkpeh, en-' 'dlu-' :jla-ti-a 'koan'-dih 'o-: dih. :Yee' eh-a' dhih, a no :toror' :korn-nyor⧾. :Yee' a :korn a-a' 'jeh wlu 'ken, a :ne-' deh-zon no, 'de a 'ye 'de Nyorsoa bo :wlu-eh 'beh-dih: deh 'jeh neh.

⁸En-' klehkpeh-a' 'dlu :wor 'dhu, a :ybeh-dih: 'gabaa. Deh no-eh, :ybeh-dih-eh 'ma-dih: deh⧾-zon:⧾ :dhulu'-a' dhih bo.

⁹A :za a-a'a: 'gbu⧾ 'kwla 'de 'duhba⧾ bo. :Yee' a 'bor 'worn dih :wlu-dih-eh 'do eh bo.

¹⁰Nyorsoa 'nyi a 'nyii'-deh:⧾ 'doror: 'dor. :Yee' 'nyii'-deh:⧾ Nyorsoa 'nyi-a a-uh :due' :due', a :no-dih-ih :koan 'de 'yi 'sleh ka 'di, a 'ye a 'bei'-' :za-dih: 'do en bo.

¹¹:Mor nyor :taa Nyorsoa-a' tubo-wlu⧾ po, :yee' 'nyi or-a' tubo-wlu:⧾ :po-eh: :dao', eh 'wluh 'de Nyorsoa bo. :Mor nyor :taa nyor⧾-' za-dih, :yee' 'nyi or no-eh, 'de 'kpih Nyorsoa 'nyi-or 'di, 'de dhih-a' 'i 'beh-a' 'ye Nyorsoa 'nyi-eh: 'de :Yusu' 'Klae-a' 'nyne 'di, 'de deh⧾-a' klehkpeh a no-a 'di. Dhih-a' 'i 'beh-a'-: 'dekorn: 'kpih-: en :korn 'de :Yusu' 'Klae bo, :ka ti-a mu-a 'dlu-' :tehn klehkpeh klehkpeh. 'Ka-: eh 'ye :ne.

¹²:Yee' :a 'bli-nyor⧾-a:, eh-a' 'ma-dih:-' 'de a 'di dih, 'do 'kle 'ye-eh: :eh :kma-a 'i, a 'ye-a :naa bo, :eh no-a nyor⧾-a' dih 'dhen-deh. A-a' :no-' deh :dele' :oo' :eh yi 'o a bo.

¹³Jorwor: a no 'mona :ka a 'ble-a 'for 'de 'Klae-a' 'kle 'ye-eh 'di. Eh mu-eh :no, 'de 'mona 'ye a-' dih 'yi-dih: ti or-a' dhih-a' 'i 'beh-a'-a mu-a nyor⧾ 'i :to-dih-eh.

¹⁴:Mor eh 'dhu nyor 'jle-dih a-uh 'do 'Klae-a' 'nyne-a' dhih bo, :yee' :bhorlie' 'do a bo. Deh no-eh, :Zulu: :on :korn-a dhih 'beh-a 'i, :on no-a Nyorsoa-a' :Zulu, mo-: :ne 'o a bo.

¹⁵'Kle a mu-a 'ye-:, eh-a' :no-' 'kle nyor⧾ :an 'dba-a nyor⧾-: :an 'yli-a-: :an no-a deh⧾-zon:⧾ :nee' :nee'-: 'dekorn: po nyor⧾-a' dhih buh 'di-: a-a' 'ye-:-' eh :bo-kle.

¹⁶Jorwor: :mor a :taa 'kle 'ye, :eh :mor a no 'Klae-a' nyor⧾, eh-a' :no-dih:-' a dhen. Jorwor: a 'nyi Nyorsoa dhih-a' 'i 'beh-a', :ka 'Klae-a' 'nyne :ne-a 'o a ken.

¹⁷Eh no ti :naa Nyorsoa-a' zabe: :zi-eh 'ye glu 'dhu-eh: 'de or-a'a: 'cheh 'bli 'gbu 'di. :Yee' :mor eh 'dhu-eh: glu 'do :a :mor :or no-a or-a'a: 'cheh bo, :yee' :yuh :on se-a 'o or-a' tubo-wlu:⧾ 'jeh-a' 'tele' dih dhe, dha an mu :na-dih: :eh?

¹⁸:Yee' Nyorsoa-a' 'chlee-deh 'dae:, :Mor eh :kma 'i, 'yi 'sleh-nyor⧾ 'ye 'puh, :yee' dha nyor⧾ :on se-a Nyorsoa deh-' 'ye-eh 'nyi-: 'dekorn: :yuh :an no-a deh⧾-zon⧾-: an mu :na-dih: :eh?

¹⁹:Yee' eh-a' dhih, nyor⧾ Nyorsoa 'worn-dih-eh ken dih, :on 'ye-a' 'kle 'ye, :yee' 'nyi on po 'de an-a' 'jeh 'de Nyorsoa :or no-uh-a, 'de :or no-a :dhehehn-nyor 'kwa. :Yee' 'nyi on kpa deh 'jeh :neh :no-eh 'dlu bo.