Read Eastern Krahn 1 :Piteh' 5 Bible Online

1 :Piteh' 5 - Eastern Krahn bible

1 :Piteh' 5

¹'Mor :or 'dhu-a 'chore-a' nyor :klaba'-', 'mor-: wlu 'de 'chore-a' nyor⧾ :klaba'⧾ :on :ne-a 'de a 'klu-' bo. 'On 'ye :ka 'Klae no-a 'kle 'ye-eh 'weh, 'de 'on no nyor :or mu-a 'for 'ble-: 'de or-a' dhih-a' 'i 'beh-a' :or mu-a :a 'i :to-dih-eh 'di.

²:Ka 'blae'⧾-a' 'yli-eh bo 'dhu-nyor⧾ no-a, 'ka-: a 'ye nyor⧾ Nyorsoa po-a 'de a 'kwa, an-a' 'yli-eh bo 'dhu-eh no. A 'dhu-uh' 'yli-eh bo, 'de :porluh-a' dih 'pehn ka 'di, :ka Nyorsoa 'bhorn-a, a 'ye-a' no, eh :se 'de a-a' 'kpih :kpa-dih: ka 'di. 'De mor a-a' :zi-' 'wlii-dhih 'suh, jorwor: 'nyi eh 'wluh 'o a :porluh⧾ ken.

³Nyor⧾ Nyorsoa po-a 'de a 'kwa, a-a' :kpa-dih:-uh' 'kpih. Jorwor: a :mor an mu ya pobo:, 'do deh⧾-a' klehkpeh a mu-a :no bo.

⁴:Yee' :mor 'Klae :or no-a Nyorsoa-nyor⧾-a' klehkpeh an-a' 'yli-eh bo 'dhu-nyor: :klaba', :mor or 'yle, :yee' a mu geli' :za-dih: :gblaa', :or :korn-a dhih 'beh-a' 'i, 'de :or :se-a' worn :gweh i 'ye-: 'de or 'kwa.

⁵:Yee' 'nynuu: :gbolo'⧾-a:, 'de :ka :ne-a :due' 'di, a :ya a-a' 'jeh ya 'do nyor⧾ :klaba'⧾ :on :ya-dih:-a a de, 'zorn. A-a' klehkpeh :sie:-a 'o :ke, a :ya a-a' 'jeh ya, 'do a 'bei' 'zorn :due' :due'. Deh no-eh, Nyorsoa-a' 'chlee-deh 'da, Nyor⧾ :an 'beh-dih-a an-a' 'jeh 'i, Nyorsoa :se-' an-a' dhih ken dih 'worn-dih:. Jorwor: nyor⧾ :an ya-a an-a' 'jeh ya, or mu-uh mla bo :po.

⁶:Yee' 'do eh-a' dha, a :ya a-a' 'jeh ya 'do Nyorsoa-a' dhih-a' 'i 'beh-kpih 'zorn. :Yee' :mor ti or 'bhorn-a, or 'ye a ya-' 'duo:, en nyni 'o, or mu-eh :no.

⁷Deh⧾-a' klehkpeh :en 'beh-dih-a a-a' :porluh⧾ 'worn dih, a 'nyi-ih or-uh, or 'ye-ih' kpa. Deh no-eh, or :kma a-a' dhih 'weh.

⁸A :korn a-a' 'jeh wlu 'ken, a :ne-' deh-zon no. :Yee' a 'dhu :gbeheh. Deh no-eh, 'ku :on 'nyeh-a a-uh', mo-: :an na-dih, :ka :gbolo: :or klu-a, or no-a, 'de an 'bhorn nyor on 'ye-a' bo pa.

⁹A :bla-dih-uh worn. :Yee' a :nyna dih deh 'jeh, 'de Nyorsoa-a' dhih 'jeh-' :po-eh 'di. Deh no-eh, a yubo-eh' :ka a 'bei' 'Klae-a' nyor⧾ :on :ne-a 'bluhba⧾-a' klehkpeh ken dih, an 'ye 'kle :ne-a :due' :ke.

¹⁰Nyorsoa :or :ne-a buh⧾ ken, 'do ti-a' klehkpeh bo, :or 'ye-a nyor⧾ mla bo po, or-: :yi-dih: :Yusu' 'Klae-', :or 'da a-uh, a 'ye 'for 'ble 'de or-a' dhih-a' 'i 'beh-a' :or se-a 'dlu-' :jla 'da :korn 'di. A mu 'kle 'ye-: 'do ti-kpor-bei 'di, jorwor: Nyorsoa-a' 'jeh 'yor-eh:, or mu a :dele'-' :po, 'de or 'ye a son bo po, or 'ye-eh' no a 'ye dih ku, a 'ye dih :nyna deh 'jeh.

¹¹'De or bo, 'do :wor 'kpih-a' klehkpeh en :korn, :ka ti-a mu-a 'dlu-' :tehn klehkpeh klehkpeh. 'Ka-: eh 'ye :ne.

¹²:Yee' :Salor' :or 'on 'duo-a-' :or 'ye-a 'Klae :de-di' no, :or no-a :dhehehn-nyor, or-: kpa 'on bo, 'de 'on 'chle a 'chlee-deh: 'kpo :daa bo. 'An 'chle a bo, eh 'ye 'de a-a' 'kpih po, 'de 'on 'ye a :gwluhuh' zela: :ka mla Nyorsoa po-a a bo, or :to-dih-eh a 'i, :ka or :ybeh-a a-uh'. A kpa or-a' dhih 'jeh-' :po-eh 'dlu bo :chio'lo:.

¹³'Chore-nyor:⧾ :on :ne-a :gwlor :klaba' an 'da-dih-a 'Babe'lor 'di, on :ne a mor-: Nyorsoa :gan-dih:-a :dha :due', on 'da, mo-: 'ye a-uh. :Yee' 'Make :or gweh-a 'an-a: 'yu, or 'da, or-: 'ye a-uh :ke o.

¹⁴A 'wla 'de a 'bei' :bhluun'⧾ dih, a 'ye-uh :gble-dih: 'de :ybeh-dih: ka 'di. Wlu-' dih 'worn-eh: 'do a-a' klehkpeh :or :korn-a 'de 'Klae bo.