Read Eastern Krahn 2 :Piteh' 2 Bible Online

2 :Piteh' 2 - Eastern Krahn bible

2 :Piteh' 2

¹:Yee' :zai' :dee', sih 'tmo :wele-eh: :po-nyor:⧾ mo-: :ne 'de 'Ezlea-nyor⧾ 'klu-'. 'Ka-: nyor⧾ :an torne-a nyor⧾ sih-deh⧾ an mu 'de a 'nyne-' :ne-eh :no :ke. Nyor⧾ deh :torne-eh: :eh se-a 'o Nyorsoa-a' :gwie 'i :ne, 'de :eh 'kor-dih-a nyor⧾, me-: an mu 'de :ya :wleh :wleh, 'de a 'nyne-'. :Gwlor :baa' Nyorsoa :or zelie-uh-a, an mu or-a' dhih-' dhobo: :sloror', 'de eh 'ye-eh' no, on 'ye an-a' 'jeh gbe :zie-eh bo :ya 'yli :a bla-a 'i.

²A-a' nyor⧾ :dhulu'-a mu 'o an-a' 'pebe' 'i 'kpa-eh klei' :zi. :Yee' eh-: mu-eh :no, nyor⧾ 'ye dhih-a' 'yor-eh-a' :gwie, wlu 'bhun dih po.

³An-a' 'wlii-a' 'klan :korn-eh-a' dhih, an mu a sih-deh:⧾ an-a' 'jeh 'yor-eh po-a :dha :due' :gwluhuh' zela:, on 'ye a 'yli. Jorwor: zabe: :zi-eh:, Nyorsoa dhe-a dih :dee' see, eh-: bhele: ya 'do on 'dlu, :eh fuo-uh 'ken. 'De Nyorsoa :or mu-eh :no, 'de on 'ye-a gbe :zie:, or-a' 'mo.

⁴:Yee' ti 'enjor-nyor⧾-a' :noo', no-a deh-zon, Nyorsoa :se-' an-a' :wehlih 'ye. Jorwor: or po-uh 'de 'ku 'bli, 'do :dha an mu-uh-a 'chen-dubu'⧾ :san-dih: 'de :kule-' :chio'lo: 'de an-a' zabe: :zi-ti 'ye-a 'o nyni.

⁵'De mor Nyorsoa :se-' :tehn 'i-nyor⧾-a' :wehlih 'ye, ti or dbo-a 'yii'-ni, :eh kpa-a nyor⧾ :on se-or deh-' 'ye-eh 'nyi. :Noa' :or po-a Nyorsoa-a' 'yi 'sleh-tubo-wlu⧾-: 'dekorn: nyor⧾ :meheh' 'sorn :noo'-: on :due', mo-: or 'puh-dih:.

⁶:Yee' Nyorsoa chehn 'Salor-gwlor-: 'dekorn: :Gormor'la-gwlor-: en-' zabe-: 'i, 'do en-' 'yli :po-eh bo, 'de en no :bhuhbuh'. Eh-: no nyor⧾ 'yi :to-dih-deh :ka or mu-a nyor⧾ :on se-or deh-' 'ye-eh 'nyi, an-a' dhih :no.

⁷'Lorte no 'yi 'sleh-nyor:. 'De mor 'pebe', 'kulu-nyor:⧾ :dao', an 'kpa-a 'i, 'do :gwlor :dao' 'di, en 'beh-dih or-a' :porluh 'worn dih. Eh-: no-eh, 'de Nyorsoa zelie-or.

⁸'Yi 'sleh-nyor: :daa, or 'ti 'de nyor⧾ :dao' 'nyne-'. :Yee' 'kulu-deh:⧾ an no-a zorn 'o zorn, or 'ye-ih', 'de or 'worn-ih, me-: 'beh-dih or-a' :porluh: :on :gweh-a :vlehehn'-' 'worn dih.

⁹:Gwlor :baa' yubo: :ka or 'ye-a' no, 'de or 'ye-a' nyor⧾ :an 'nyi-or deh-' 'ye-eh zelie: 'weh, :mor 'kle 'ye-eh 'yle. 'De or yubo: nyor⧾ :on se-a 'i 'sleh, :ka or 'ye-a' an-a' 'kle 'ye-eh: 'dlu :po-eh no 'weh, 'de zabe: :zi-ti 'ye-a 'o nyni.

¹⁰:Yuh or mu-eh-' :no 'jeh ka, mo-: 'dhu, nyor⧾ :an vlehn-a Nyorsoa-a' nyor⧾ wlu 'ken :korn-eh, 'de :an no-a gu-kplen: an-a' :porluh⧾-a sin-a, on 'ye-a' no. Nyor⧾ sih-deh:⧾ :torne-nyor⧾-a' 'jeh :dao', on se :fano :korn, 'de an 'ye an-a' 'jeh deh-'. An-a' ple :fano 'do 'enjor-nyor:⧾ :on :ne-a 'de Nyorsoa 'bli yai', :on :korn-a dhih 'beh-a' 'i 'gabaa, 'do an-a' 'jle-dih: 'da.

¹¹Jorwor: 'enjor-nyor:⧾ :sloror', :on 'ble-a 'kpih, 'de :on ku-a dih, :on :zi-a 'o nyor⧾ sih-deh:⧾ :torne-nyor:⧾ :dao', an-a' po nyor⧾ :dao' wlu 'bhun, 'do :Gwlor :baa' ybei'.

¹²Jorwor: nyor⧾ :dao', deh⧾ on se-a-' dih 'worn, me-: an 'jle-dih. On gweh nimi⧾ :or se-a :toror' :korn, 'de deh⧾ en no-a, en-' :na-dih-eh' :gwluhuh' dih. En 'wluh nyor⧾ 'ye-ih kpon, 'de on 'ye-ih 'dba. :Yee' :ka nimi⧾ no-a gbe :zie-eh, 'ka-: an mu gbe :zie-eh :no :ke.

¹³Deh⧾-zon:⧾ an no-a 'do :gwlor-nyor⧾ bo, me-: :korn geli' :za-dih-deh: an mu 'ye-: :ke. 'De deh :eh no-a an-a' 'mona-deh, eh-: 'dhu, an no an-a' 'jeh-a' yau-a' 'bhororn'-deh⧾-zon⧾ 'weh :sloror' 'do zorn-pli-'. Nyor⧾ :dao', an 'dba nyor⧾-a' 'yuba:⧾, 'de an no-dih nyor⧾ dhen, :mor on :ne a :taa son⧾ ybei' kpuhba, 'de mor an-a' :porluh⧾ 'pehn-: dih, on 'ye a dih :bo-dih:.

¹⁴'Nynor⧾-kpao'⧾-a' klehkpeh an 'ye-a, an-a' :porluh⧾-a sin-', on 'ye-uh 'bhorn. An-a' 'tali: deh⧾-zon⧾-a' no-a' dih. An po-dih nyor⧾ :on :korn-a 'sleh dih :po-dih-eh se-a 'i :kma 'sleh dih, on 'ye deh⧾-zon⧾ no. An-a' deh⧾-a' klehkpeh-a' 'klan :korn-eh zi 'o-: dih. Nyor⧾ :dao', on :ne 'o Nyorsoa-a' 'chlo 'zorn.

¹⁵On 'tali: 'yi 'sleh-deh⧾-a' no-a' :gwie-: dih, 'de on zi 'o Nyorsoa-a' wele-eh: :po-nyor: 'Benor: :or no-a 'Bio-a'a: 'yu-a' kplen klei', :or no-a deh⧾-zon⧾, 'de 'wlii: or 'ye-a 'o, en korn-or 'ton.

¹⁶Jorwor: or-a'a: 'dhornke po-or 'borboa' 'i, or 'ye or-a' deh-zon: or mu-a no 'da dih 'tali:. Nimi :dao' :eh se-a :gwlor-nyor-wlu 'ble, eh-: :wlu 'de or bo :ka :gwlor-nyor-a no-a :wlu-a', 'de eh no-eh, or 'tali: or-a' :bobo-deh: or yi-a :no 'da dih.

¹⁷Nyor⧾ :dao', on gweh 'jun :on :korn-a :on 'ye-a 'ni 'ble :dee', 'de :on se-eh 'ble. 'De on gweh 'ni :eh 'yi-a 'de yai' dih, 'de :pobor' gboba-a dih. 'Bie' :eh :tehn-a 'di 'gabaa, 'de :eh :korn-a 'de 'di :ne-a :bhlin :bhlin, eh-: Nyorsoa dhe dih 'do on bo.

¹⁸Deh⧾ an za-a worn⧾ 'i dih, :en :korn-a dhih an 'beh-dih-a an-a' 'jeh 'i, en se deh-beh-deh-beh 'di :ne. Nyor⧾ :noo' :on 'wluh-a 'o :yuh se-a 'o :gwie: 'jeh 'i :ne 'zorn, 'de eh 'see-a 'o gwle, mo-: an po-dih 'sleh dih. :Ka an no-a eh-a' no-a', eh-: 'dhu, 'pebe' 'i 'kpa-eh: :eh no-a an-a' :gwlor-nyor-tu-a' 'bhororn'-deh⧾-zon:⧾ an-a' :porluh⧾-a sin-dih-a bo, on 'ye-a' no, me-: an za-a-' 'de on bo.

¹⁹Nyor⧾ :an jli-a nyor⧾-a' 'jeh :dao', mo-: po wlu :dhama'-' 'de on bo, on 'dae:, :Mor eh 'dhu, a no deh :a za-a-', :yee' a mu dih van-dih:, a 'ye dih :na. Jorwor: nyor⧾ :on no-a nyor⧾-a mu dih van-dih:, an-a' 'jeh 'yor-eh no 'ge-nynuu: 'do deh⧾-zon⧾ bo. Deh no-eh, :gwlor-nyor no 'ge-yu: 'do deh :eh korn-or wlu 'ken bo.

²⁰:Mor :Yusu' 'Klae :or no-a :a-a' :Gwlor :baa'-: 'dekorn: 'puh-dih-nyor-: or-a' yubo-eh no-eh, 'de nyor⧾ 'ye 'o 'kmo bo-deh:⧾ :en no-a 'kulu-deh⧾ 'zorn 'wluh, 'de on 'ye deka mu :neheh', en 'ye-uh' wlu 'ken :korn, :yee' on 'kpa 'de de dih, :eh :zi 'o :zai' neh-'.

²¹Eh mu 'yi dih :nmor :dee', :mor on se 'yi 'sleh-deh⧾-a' :gwie yubo:, :eh :zi 'o on 'ye-ih yubo:, 'de on 'ye Nyorsoa-a' 'tele' on 'nyi-uh-a 'kpuh ya :to.

²²Deh :eh :no-eh 'do on bo, eh :to-dih: :a 'i, :ka 'dlan⧾ :daa, en no-a dhih-a' 'yor-eh, :en no-a, Gbe-a di eh-a' 'jeh-a' gwla-a'. 'De mor, :Bee' :yeh nyor⧾ :dle-a, eh-: mu 'de 'kporn 'klu-' de :neheh'.