Read Eastern Krahn 1 :Jororn' 1 Bible Online

1 :Jororn' 1 - Eastern Krahn bible

1 :Jororn' 1

¹:Eh 'wluh-a 'de eh-a' glu 'dhu 'da, 'do :wor Wlu :or :ya-a: 'de 'kmo :sie: :febeh' or :ne. Wlu :daa, :a 'worn or-a' wlu 'weh, 'de :a-a' 'yli-eh 'ye-or, 'de :a pobo-or ya, 'de :a-a' son⧾ 'tuh-or dih, or-: :korn dhih :a 'chle a bo.

²'Kmo :sie: :febeh' :daa, eh 'wluh-dih: :a 'i 'weh, :a 'ye-eh', 'de :a zela eh-a' dhih bo dih, 'de :a po eh-a' wele-eh 'de a bo, 'do 'kmo :sie: :febeh' :daa :eh :ne-a 'de :a :Baa' Nyorsoa bo, 'de :eh 'wluh-dih:-a :a 'i, eh-a' dhih.

³:A po wele-eh: 'de a bo, 'do deh :a 'ye-a, :a 'worn-a, eh-a' dhih, 'de a :ne :a mor-: :a 'ye :dha :due' :na-dih:, :ka :a no-a :dha :due' :na-dih-eh 'do :a :Baa' Nyorsoa-: 'dekorn: or-a' 'Yu :Yusu' 'Klae bo.

⁴:A 'chle deh⧾ :daa 'weh 'de a bo, eh 'ye :a 'mona-' dih 'yi-dih:.

⁵Tubo-wlu:⧾ :daa, me-: :a 'worn, :en 'wluh-a 'de :Yusu' 'Klae bo, me-: :a zela a :gwluhuh'. Nyorsoa, or-: 'dhu zorn-pli-', :kule se 'de or 'di :ne klehkpeh klehkpeh.

⁶:Mor eh 'dhu :a 'da, or :ne :a na-dih :dha :due', 'de :a 'ye :kule-' :na 'gboror:, :yee' :a 'tmo sih, :yee' :a se dhih-a' 'yor-eh 'kmo :ne-dih:.

⁷Jorwor: :mor eh 'dhu :a :taa zorn-pli-' na, :ka or no-a 'de zorn-pli-' :ne-eh, :yee' :a na-dih :dha :due' 'weh, :yee' or-a' 'Yu :Yusu'-a' nyomor worlor: :a-a' deh⧾-zon⧾-a' klehkpeh 'weh.

⁸:Mor eh 'dhu :a 'da, :a se deh⧾-zon⧾-' :ne, :yee' :a bo-dih :a-a' 'jeh 'weh, :yee' dhih 'jeh se 'de :a 'di :ne.

⁹:Mor eh 'dhu :a 'worn-dih: :a-a' deh⧾-zon⧾-a' dhih, :yee' Nyorsoa :or no-a :dhehehn-nyor, 'de :or 'sleh-a 'i, or-: mu :a-a' deh⧾-zon⧾-a' dhih bo 'ma-dih:, 'de or 'ye :a-a' noo-deh⧾-a' klehkpeh :en se-a 'i 'sleh, 'do :gwie 'i po.

¹⁰:Mor eh 'dhu :a 'da, :a :se-' deh-zon no, :yee' :a no-eh' or 'ye sih 'tmo-nyor no, :yee' or-a' wlu se :dhe-da 'ble 'de :a-a' 'kmo :ne-eh bo.