Read Eastern Krahn 1 :Jororn' 2 Bible Online

1 :Jororn' 2 - Eastern Krahn bible

1 :Jororn' 2

¹'An 'nynuu-a:, 'an 'chle a deh⧾ :daa bo, 'de a :ne-' deh-zon no. Jorwor: :mor eh 'dhu a-a' nyor-beh no deh-zon, :a 'ble gwea: :ne-nyor :due' :or bale-a :a :Baa' 'do :a-a' dhih bo. Or-: 'dhu :Yusu' 'Klae :or no-a 'yi 'sleh-nyor.

²Or-: 'dhu Nyorsoa gban 'i 'dhu-dih-deh-', 'do :a-a' deh⧾-zon⧾-a' dhih bo. 'De eh :se :a :due', :a-a' deh⧾-zon⧾-a' dhih, jorwor: 'do :gwlor-nyor⧾-a' klehkpeh yobo' po-a 'de :gle 'gbeheh 'di, an-a' deh⧾-zon⧾-a' dhih bo :oo' :ke.

³:Mor eh 'dhu, :a dhe 'o or-a' 'tele'⧾-a' klehkpeh dih, :yee' :a yubo-eh' :ka :a yubo-or deh 'jeh.

⁴Nyor :or no-a, 'On yubo-or', 'de jorwor: :or se-a 'o or-a' 'tele' dih dhe, :yee' or no sih 'tmo-nyor:, :yee' dhih 'jeh se 'de or 'di :ne.

⁵Jorwor: :mor eh 'dhu, nyor-beh dhe 'o or-a' 'tele' dih, :yee' Nyorsoa-a' :ybeh-dih-eh :gweh-dih-or-: ken 'weh, deh 'jeh neh. 'Ka-: 'o :a no eh-a' yubo-eh, :ka :a ne-or'.

⁶Nyor-beh-nyor-beh: :or no-a or :ne :Yusu'-' 'weh, :yee' 'nyi or-a' :na-a' gweh :Yusu'-a' :na-a'.

⁷:Yee' :a 'bli-nyor⧾-a:, 'on :se-' a 'tele' :dele' bo 'chle, jorwor: eh-a' 'soa' :neh :ne-a :due' :chio'lo:, a 'ble-a, 'de :eh 'wluh-a 'de eh-a' glu 'dhu 'da. 'Tele' :soa: :dao', eh-: :korn tubo-wlu:⧾ 'o, a 'worn.

⁸Jorwor: 'de :ka :noror' 'di, eh no 'tele' :dele' 'gboror:, 'an 'chle a bo, 'de or-a' 'kmo :ne-eh-: 'dekorn: a-a' neh-: me-: :to-dih-eh nyor⧾ 'i, :ka 'tele' :daa, eh 'dhu-a dhih-a' 'yor-eh-'. Deh no-eh, :kule-a zi-', 'de zorn-pli-a' 'jeh ne-a fan :naa.

⁹Nyor-beh: :or no-a or :ne 'de zorn-pli-', 'de jorwor: :or 'nyeh-a or-a' 'de-di'-', :yee' or :ne 'de :kule-' 'gboror:.

¹⁰Nyor-beh: :or :ybeh-a or-a' 'de-di'-', :yee' or :ne-dih: zorn-pli-' 'kmo. :Yee' deh-beh-deh-beh se-or' :ne, :eh 'ye-eh' no, 'de or 'ye-a' 'gbele:.

¹¹Jorwor: nyor-beh: :or 'nyeh-a or-a' 'de-di'-', :yee' or :ne 'de :kule-', :yee' 'de :kule-' :oo', 'do :wor or na-dih. Or se :dha or mu-a yubo:. Deh no-eh, :kule :kpe-dih: 'de or 'yli 'weh.

¹²'An 'chle a bo, 'an 'nynuu-a:, deh no-eh, a-a' deh⧾-zon⧾-a' dhih 'ma-dih-eh: bo 'weh, 'do deh 'Klae no-a, eh-a' dhih bo.

¹³'An 'chle a bo, 'on :bai'-a:, deh no-eh, a yubo: nyor :or 'wluh-a 'de 'bluhba-a' glu 'dhu 'da 'weh. 'An 'chle a bo, a :mor 'nynuu: :gbolo'⧾-a:, deh no-eh, a du 'ku-a' tuh 'weh.

¹⁴'An 'chle a bo, 'an 'nynuu-a:, deh no-eh, a yubo: :a :Baa' Nyorsoa 'weh. 'An 'chle a bo, 'on :bai'-a:, deh no-eh, a yubo: nyor :or 'wluh-a 'de 'bluhba-a' glu 'dhu 'da 'weh. 'An 'chle a bo, a :mor 'nynuu: :gbolo'⧾-a:, deh no-eh, a :kmu-', 'de Nyorsoa-a' wlu :ne-' a-uh, 'de a du 'ku-a' tuh :ke.

¹⁵A-a' :ybeh-' 'kmo-', 'de mor a-a' :ybeh-' 'kmo bo-deh⧾-'. :Mor eh 'dhu, nyor :ybeh 'kmo-', :yee' :a :Baa' Nyorsoa-a' 'mo :ybeh-eh se-or' :ne.

¹⁶Deh no-eh, deh⧾-a' klehkpeh :ne-a 'noror 'kmo bo, deh⧾-zon:⧾ :gwlor-nyor⧾-a 'bhorn-a-: 'yli-eh-a' 'mo :ybeh-deh⧾-: 'dekorn: deh⧾ :korn-a dhih :gwlor-nyor⧾-a 'beh-dih-a an-a' 'jeh 'i-: en :se 'de :a :Baa' Nyorsoa bo 'wluh, jorwor: 'noror 'kmo bo :oo', en 'wluh.

¹⁷'Kmo-: 'dekorn: deh⧾-a' klehkpeh :gwlor-nyor⧾-a 'bhorn-a 'de on 'di-: en mu dih :gweh, jorwor: nyor :or mu-a Nyorsoa-a' 'ton :korn-deh :no, :yee' or mu 'kmo :ne, :ka ti-a mu-a 'dlu-' :tehn.

¹⁸'An 'nynuu-a:, :de 'bor-dih-ti: 'o, me-: :dhe dih. A 'worn-ih' :ka 'yu :or vorn-a 'Klae bo, or mu-a 'de :yi. 'De mor :kana :naa 'Klae-a' bo :vorn-nyor:⧾ :dhulu', mo-: 'yle. 'Ka-: :a no eh-a' yubo-eh :ka eh 'dhu-a :de 'bor-dih-ti-' en :dhe-a dih.

¹⁹Nyor⧾ :dao', on 'wluh 'noror :a 'klu-' 'weh, jorwor: on se 'noror :a bo :korn deh 'jeh :dhih 'o. :Mor eh 'dhu, on :korn 'noror :a bo :dee', :yee' an mu 'noror :a bo :sie: :dee'. Jorwor: an-a' mu-a' :to-dih-eh :a 'i, :ka an-a' nyor-beh-nyor-beh se-a 'noror :a bo :korn.

²⁰Jorwor: 'Klae :or no-a Gban 'i :ne-nyor, or 'tan a 'weh, 'de a-a' klehkpeh, a yubo: dhih-a' 'yor-eh.

²¹Eh :se, a se dhih-a' 'yor-eh yubo: :deh, 'on :se-' a bo 'chle. Jorwor: deh no-eh, a yubo-ih', 'de mor a yubo-eh' :ka sih se-a 'de dhih-a' 'yor-eh 'di 'wluh-eh 'beh-dih:.

²²:Or 'dhu sih 'tmo-nyor-' :eh? Nyor :or dhobo:-a :eh :mor :Yusu' :se Nyorsoa-a' 'taan'-yu:, or-: 'dhu sih 'tmo-nyor-'. Nyor-a' 'jeh :dao', or-: 'dhu 'Klae-a' bo :vorn-nyor-'. Or-a' 'jeh, or :se-' :a :Baa' Nyorsoa-: 'dekorn: or-a' 'Yu-: an-a' dhih 'worn-dih: :ke.

²³Nyor-beh: :or dbobo:-a Nyorsoa-a' 'Yu-a' dhih-', :yee' or se 'de :a :Baa' Nyorsoa bo :korn, jorwor: nyor :or 'worn-dih:-a or-a' dhih, :yee' or :korn 'de :a :Baa' Nyorsoa bo 'weh :ke.

²⁴:Yee' deh⧾ a 'worn-a, :en 'wluh-a 'de eh-a' glu 'dhu 'da, 'nyi en :sie: a-uh'. :Yee' :mor eh :ne :ao', :yee' a mu :a :Baa' Nyorsoa-: 'dekorn: or-a' 'Yu-: :sie: :ke.

²⁵:Yee' 'kmo :sie: :febeh', eh-: :korn wlu or po :dhama'-' 'de :a bo.

²⁶'An 'chle a deh⧾ :daa bo, 'do nyor⧾ :an 'bhorn-a a-a' dih :bo-dih-eh-a' dhih bo.

²⁷A :mor :mloror', Nyorsoa-a' :Zulu-a' 'kpih a 'ble-a, :en 'wluh-a 'de 'Klae bo, en :sie: a-uh' 'weh, :yee' nyor :noror' se :korn or 'ye a deh :neheh' :torne:. Deh no-eh, or-a' :Zulu-a torne a deh⧾-a' klehkpeh 'weh. 'De mor deh⧾ an torne a-uh, dhih 'jeh :oo', en :se sih. :Yee' 'do eh-a' dha, deh⧾ :Zulu: :dao', on :torne: a-uh, a 'ye-a' 'Klae-' :sie:, a dhe 'o en-' 'tele' dih.

²⁸:Kana :naa, 'an 'nynuu-a:. :Glii:, a kpon-or dih :chio'lo:. :Yee' :mor or 'yle, :yee' :fano-: dhen-: en :se-' :a :no i, 'do or ybei' dih :nyna 'da.

²⁹:Ka a yubo-eh, or 'dhu-a 'yi 'sleh-nyor-', :yee' a yubo-eh' :ke, :ka nyor⧾-a' klehkpeh :an no-a deh⧾ :en 'sleh-a 'i, on 'dhu-a Nyorsoa-a' 'nynuu-'.