Read Eastern Krahn 1 :Jororn' 3 Bible Online

1 :Jororn' 3 - Eastern Krahn bible

1 :Jororn' 3

¹A pobo: :ka :a :Baa' Nyorsoa no-a :a-a' :ybeh-eh 'gabaa :ee', 'de or 'da-dih-a or-a' 'nynuu :a-uh. 'De mor, 'ka-: eh :ne 'jeh ka. Jorwor: :ka 'kmo se-or yubo:, eh-a' dhih, on se nyor⧾ :a 'dhu-eh:-' yubo: :ke.

²:A 'bli-nyor⧾-a:, :a :mor Nyorsoa-a' 'nynuu: 'o :kana, 'de eh se :a 'i :to-dih-eh kele'a:, :ka :a mu-a :ne. Jorwor: :a yubo-eh', :mor :Yusu' 'yle, or :ne :a mu goor-dih:. Deh no-eh, :a mu-or 'ye-:, :ka or-a' 'jeh 'kpa 'yor-eh :ne-a.

³Nyor-beh: :or dhe-a deh⧾ :daa :gwlii', :yee' or 'dhu or-a' 'jeh :dhororn', or 'ye :vlehehn'-' :gweh, :ka 'Klae :ne-a :ke.

⁴Nyor-beh: :or no-a deh-zon, :yee' or wa Nyorsoa-a' 'tele' 'weh. Deh no-eh, deh-zon-a' no-a', eh-: 'dhu Nyorsoa-a' 'tele'-a' wa-a'.

⁵A-a' 'jeh 'yor-eh yubo-eh', :ka :Yusu' yi-a :a-a' deh⧾-zon⧾-a' dhih :jla 'da, 'de or-a' 'jeh se-a deh-zon-' :ne.

⁶:Yee' eh se nyor :korn :or 'ye-or' :ne, 'de :or 'ye-a deh-zon: :no-eh 'dlu bo kpa. Jorwor: nyor :or mu-a deh⧾-zon⧾-a' no-a' 'dlu bo :kpa, :yee' or 'see-or 'ye, 'de mor or 'see-or yubo.

⁷'An 'nynuu-a:, a-a' 'worn-:-' nyor-a' :bo-dih:-' a dih, 'de or-a' :za 'o a :gwie 'i. Nyor :or no-a deh⧾ :en 'sleh-a 'i, :yee' or-: 'yi 'sleh-nyor: :ka :Yusu' :ne-a.

⁸Nyor-beh: :or no-a deh⧾-zon⧾, :yee' or :korn 'de 'ku bo. Deh no-eh, 'ku no deh-zon: :eh 'wluh-a 'de eh-a' glu 'dhu 'da. Deh :korn-a dhih, Nyorsoa-a' 'Yu yi-a 'de, eh-: 'dhu, or 'ye 'ku-a' :koan 'kor-dih:.

⁹Nyor-beh: :or 'dhu-a Nyorsoa-a' 'yu-', or-a' kpa deh⧾-zon⧾-a' no-a' 'dlu bo. Deh no-eh, Nyorsoa-a' 'yor-eh-a' kplen, me-: ne-or'. Or se 'beh-dih: or 'ye deh-zon: :no-eh 'dlu bo kpa. Deh no-eh, or-: Nyorsoa-a' 'yu :oo'.

¹⁰:Yee' :ka :a mu-a Nyorsoa-a' 'nynuu-: 'dekorn: 'ku-a' 'nynuu-: an-a' bo dih zela-eh :no, eh-: :dhe dih. Nyor :or se-a deh⧾ :en 'sleh-a 'i no, :yee' or :se Nyorsoa-a' 'yu. 'De mor nyor-a' 'jeh, :or se-a or-a' 'de-di'-' :ybeh, :yee' or :se Nyorsoa-a' 'yu :ke.

¹¹:Yee' tubo-wlu:⧾ a 'worn-a :chio'lo:, :en 'wluh-a 'de eh-a' glu 'dhu 'da, me-: 'o :en :dhe dih. A :ybeh-dih:.

¹²A-a' :gweh-' 'Kein :or :korn-a 'de 'ku bo, 'de :or 'dba-a or-a' dei' 'Ebo. :Eh :korn dhih or 'dba or-a' dei'-a' 'jeh :eh? Dhih or 'dba-or, me-: 'dhu, or-a' 'jeh-a' noo-deh⧾ no 'kulu-deh:⧾, 'de or-a' dei'-a' noo-deh⧾ no 'yi 'sleh-deh⧾.

¹³Eh-a' 'ma-dih:-' 'de a 'di dih, 'an 'Klae :de-di'-boi'-a:, :mor 'kmo 'nyeh a-uh'.

¹⁴:A yubo-eh', :ka :a 'wluh-a 'o 'meh-a' 'kpih 'zorn, 'de :a 'dhu-a 'kmo :ne-eh glu :naa. Deh no-eh, :a :ybeh :a-a' 'de-di'-boi' 'weh. Nyor-beh: :or se-a :ybeh-eh 'ble, :yee' or :sie: 'o 'meh-a' 'kpih 'zorn 'weh.

¹⁵Nyor-beh: :or 'nyeh-a or-a' 'de-di'-', :yee' or-: :nyor⧾ 'dba-nyor: 'o. 'De a yubo-eh, :ka :nyor⧾ 'dba-nyor se-a 'kmo :sie: :febeh' 'ble.

¹⁶:Ka :a no-a deh :ybeh-dih-eh 'dhu-eh:-' eh-a' yubo-eh, eh-: 'dhu, :Yusu' 'Klae :za or-a' :febeh' 'kwla, or 'ye 'meh, 'do :a-a' dhih bo. :Yee' :a :korn :a 'ye :a-a' :febeh' 'kwla :za, 'do :a-a' 'de-di'-boi'-a' dhih bo :ke.

¹⁷:Mor eh 'dhu nyor 'ble :kororn-deh:⧾ :dhulu', 'de or 'ye or-a' 'de-di' :or :korn-a son se-a 'o nyni, 'ye, 'de or 'ye :ao' or se or-a' :wehlih 'ye, :yee' :kaa Nyorsoa-a' :ybeh-eh no or-a' :ne-a' :eh?

¹⁸'An 'nynuu-a:, :a-a' :ybeh-dih-eh 'bor 'o :a worn 'i :ne-eh 'suh. Jorwor: 'nyi :a-a' noo-deh⧾ :to-dih-eh nyor⧾ 'i, :ka :a 'ble-a :ybeh-dih-eh: 'jeh.

¹⁹:Yee' :mor :a no :ao', :yee' :a yubo-eh', :ka dhih 'jeh :ne-a 'de :a 'di. 'De mor :yee' 'ka-: :a no eh-a' :gwlii' :dhe-eh, :ka :fano :se-a' :a :no i, 'do or ybei'.

²⁰:Mor :a-a' :porluh⧾ :kpon-dih: :a zabe, :fano-a' :no-' :a-uh, deh no-eh, Nyorsoa-a' :wehlih 'beh-: 'i, en :zi 'o :a-a' :porluh⧾-', 'de mor or yubo: deh⧾-a' klehkpeh :en :ne-a 'o :a-a' :porluh⧾ ken 'weh.

²¹:A 'bli-nyor⧾-a:, :mor :a-a' :porluh⧾ se :a zabe :kpon-dih:, :yee' :a :ku-' :gwluhuh' 'do Nyorsoa ybei'.

²²'De mor deh-beh: :a mu-or dih dhele:, :a mu-eh 'ye-:. Deh no-eh, :a dhe 'o or-a' 'tele'-: dih, 'de :a no or-a' :porluh-a' 'ton :korn-deh.

²³'Tele' or 'nyi-a :a-uh, eh-: 'dhu. A 'nyi :a po or-a' 'Yu :Yusu' 'Klae-a' dhih dhih 'jeh-'. :Yee' :a :ybeh-dih: :ka :Yusu' no-a :a-a' 'tele'-a' 'nyi-a'.

²⁴Nyor-beh: :or dhe-a 'o Nyorsoa-a' 'tele' dih, :yee' or :ne-Nyorsoa-' 'weh, 'de Nyorsoa ne-or' :ke. Or-a' :Zulu:, mo-: no-eh, 'de :a yubo-eh, :ka Nyorsoa :ne :a-uh'.