Read Eastern Krahn 1 :Jororn' 4 Bible Online

1 :Jororn' 4 - Eastern Krahn bible

1 :Jororn' 4

¹:Yee' :a 'bli-nyor⧾-a:, nyor⧾-a' klehkpeh :on no-a :on 'ye Nyorsoa-a' :Zulu:, a-a' :po-uh' dhih 'jeh-' kele'a:. Jorwor: a 'dhen-uh, :eh beh :zulu:⧾ :dao' on 'ye-a, en 'wluh 'de Nyorsoa bo deh 'jeh :eh? Deh no-eh, sih 'tmo :wele-eh: :po-nyor:⧾ :dhulu'-a na 'bluhba⧾ bo :naa. Mo-: :an mu deh⧾-a' klehkpeh-' dih.

²:Yee' :ka a mu-a Nyorsoa-a' :Zulu-a' 'yi yubo-eh :no, eh-: :dhe dih. Nyor-beh: :or mu-eh 'worn-dih: :ka :Yusu' 'Klae yi-a 'de, 'de :gwlor-nyor-a' nyior-tu 'di, :yee' :Zulu: :dao' or 'ble-a, on 'wluh 'de Nyorsoa bo.

³Jorwor: nyor-beh: :or mu-a :Yusu'-a' dhih-' dhobo:, :yee' :zulu: :dao' or 'ble-a, on :se 'de Nyorsoa bo 'wluh, on 'wluh 'de 'Klae-a' bo :vorn-nyor bo, :yor :korn-a dhih a 'worn-a :dee', :or mu-a 'de :yi, 'de :or :ne-a dha 'bluhba ken :naa.

⁴'An 'nynuu-a:, a :mor :mloror', a :korn 'de Nyorsoa bo, 'de a du sih 'tmo :wele-eh: :po-nyor:⧾ :dao', an-a' tuh 'weh. Deh no-eh, Nyorsoa-a' :Zulu: :on :ne-a a-uh', on 'ble 'kpih 'gabaa, on :zi 'o 'ku :on :ne-a dha 'kmo bo-' 'weh.

⁵Nyor⧾ :daa, on :korn 'noror 'kmo bo. Eh-a' dhih, an za-' dhih :en 'ye-a' 'kmo bo-nyor⧾-a' :porluh⧾ dih 'pehn-dih:. 'De 'kmo bo-nyor⧾-a to-uh :dou'⧾ bo.

⁶Jorwor: :a :mor :mloror', :a :korn 'de Nyorsoa bo. Nyor :or yubo:-a Nyorsoa, :yee' or to :a :dou'⧾ bo. Jorwor: nyor :or se-a 'de Nyorsoa bo :korn, or-a' :to :a :dou'⧾ bo. 'Ka-: :a no :Zulu: :an za-a dhih 'jeh-: 'dekorn: sih :zulu-: en-' bo dih yubo-eh.

⁷:A 'bli-nyor⧾-a:, a 'nyi :a :ybeh-dih:. Deh no-eh, :ybeh-dih-eh 'wluh 'de Nyorsoa bo. :Yee' :mor :a :ybeh-dih:, :yee' :a :mor Nyorsoa-a' 'nynuu: 'o, 'de mor :a yubo-or deh 'jeh.

⁸:Mor eh 'dhu, :a se :ybeh-dih:, :yee' :a se Nyorsoa yubo: deh 'jeh. Deh no-eh, 'de Nyorsoa bo, 'do :wor :ybeh-dih-eh-a' klehkpeh 'wluh.

⁹:Yee' :ka Nyorsoa no-a or-a' nyor⧾-a' :ybeh-eh, :a-a' 'yi :to-dih-eh, eh-: :dhe dih. Or dbo or-a' 'Yu :due' gbai 'noror yao 'zorn, 'de :a 'ye 'kmo :sie: :febeh', :eh :yi-dih:-or-' 'ye.

¹⁰:Yee' :ybeh-dih-eh :wor :dhe dih. Eh :se :a :mor :ybeh Nyorsoa-' :deh. Jorwor: or-: :ybeh :a-uh', 'de or dbo or-a' 'Yu, or 'ye or-a' gban 'i 'dhu-dih-deh no, 'do :a-a' deh⧾-zon⧾-a' dhih bo.

¹¹:A 'bli-nyor⧾-a:, :ka Nyorsoa no :ao' :a-a' :ybeh-a', :yee' :a :korn :a 'ye :ybeh-dih: :ke.

¹²Nyor 'se 'ba Nyorsoa 'ye :zai'. Jorwor: :mor eh 'dhu :a :ybeh-dih:, :yee' Nyorsoa :ne :a-uh' 'weh, :yee' or-a' :ybeh-dih-eh :gweh-dih: :a-uh' 'weh.

¹³Nyorsoa 'nyi or-a' :Zulu :a 'weh. Eh-: no-eh, 'de :a yubo-eh, :ka :a ne-or', 'de or :ne :a-uh'.

¹⁴:A 'ye-eh', 'de :a zela eh-a' dhih bo, :ka :a :Baa' Nyorsoa dbo-a or-a'a: 'Yu or 'ye-a' :gwlor-nyor⧾-a' klehkpeh-a' 'puh-dih-nyor no.

¹⁵Nyor-beh: :or 'worn-dih-eh, :ka :Yusu' 'dhu-a Nyorsoa-a' 'Yu-', :yee' Nyorsoa ne-or' 'weh, 'de or :ne-Nyorsoa-' :ke.

¹⁶:Yee' :a yubo-eh', 'de :a po-ih dhih 'jeh-', :ka Nyorsoa :ybeh :a-uh' deh 'jeh. 'De Nyorsoa bo, 'do :wor :ybeh-dih-eh-a' klehkpeh 'wluh. :Yee' nyor :or :ne-dih:-a :ybeh-dih-eh-a' 'kmo, :yee' or :ne-' Nyorsoa, 'de Nyorsoa ne-or' :ke.

¹⁷:Mor :a no :ao', :yee' :ybeh-dih-eh :gweh-dih: :a-uh' 'weh. Eh-: mu-eh :no, 'de :a 'ye :gwluhuh' :ku-eh 'ble, 'do Nyorsoa-a' zabe: :zi-we-eh bo. Deh no-eh, :ka 'Klae :ne-a, 'ka-: :a :ne :ke, dha 'kmo bo.

¹⁸:Ybeh-dih-eh se :fano 'ble. 'De mor :ybeh-dih-eh: 'jeh neh no :fano-: dih. Jorwor: 'kle 'ye-eh-a' 'dlu :po-eh-a' ple-a', eh-: ya 'de :fano. 'Do eh-a' dha, nyor :yor :or ple-a :fano, :yee' or 'see :ybeh-dih-eh: 'jeh neh-' ne.

¹⁹:A :ybeh-dih:-', deh no-eh, Nyorsoa, or-: no :zai'-nyor, or-: :ybeh :a-uh'.

²⁰:Mor eh 'dhu nyor 'da, or :ybeh Nyorsoa-' 'weh, 'de or 'ye or-a' 'de-di'-' 'nyeh, :yee' or-: sih 'tmo-nyor: 'o. Deh no-eh, :mor eh 'dhu, or se or-a' 'de-di', or 'ye-a-', :ybeh, :yee' or se 'beh-dih: or 'ye Nyorsoa, or 'see-a 'ye-' :ybeh.

²¹:Yee' 'tele' :a :za-a 'de Nyorsoa bo, eh-: :dhe dih. Nyor-beh: :or :ybeh-a Nyorsoa-', or :korn or 'ye or-a' 'de-di'-' :ybeh :ke.