Read Eastern Krahn 1 :Jororn' 5 Bible Online

1 :Jororn' 5 - Eastern Krahn bible

1 :Jororn' 5

¹:Yee' nyor⧾-a' klehkpeh :on po-ih-a dhih 'jeh-', :ka :Yusu' 'dhu-a Nyorsoa-a' 'taan'-yu-', :yee' mo-: Nyorsoa-a' 'nynuu: 'o. 'De nyor⧾-a' klehkpeh :on :ybeh-a 'yu :baa'-', :yee' on :ybeh 'yu-a' 'jeh 'yor-eh-' 'weh :ke.

²Nyorsoa-a' :ybeh-eh-: 'dekorn: or-a' 'tele' dih :dhe-eh-: eh-: no-eh, 'de :a yubo-eh :ka :a :ybeh-a or-a' 'nynuu-'.

³Nyorsoa-a' :ybeh-eh :wor 'dhu, or-a' 'tele' dih :dhe-eh-'. 'De mor or-a' 'tele' se kwa :ku.

⁴Deh no-eh, nyor-beh: :or 'dhu-a Nyorsoa-a' 'yu-', :yee' or du 'kmo-a' tuh 'weh. 'De :a-a' 'kmo-a' tuh-a' du-a' :wor 'dhu, :a-a' dhih 'jeh-' :po-eh-'.

⁵:Or 'beh-dih: 'kmo-a' tuh-a' du-a' :eh? Nyor :or po-ih-a dhih 'jeh-', :ka :Yusu' 'dhu-a Nyorsoa-a' 'Yu-', or-a' 'jeh :dao' 'klein', or-: 'beh-dih: eh-a' no-a'.

⁶:Yee' :Yusu' 'Klae :oo', or-: 'yle, :or :yi-dih: 'de 'ni 'dlu :po-eh-: 'dekorn: or-a' nyomor or 'wla-a dih ti or 'meh-a-: 'di. Eh :se 'ni :due', or :se 'de 'di :yi-dih:. Jorwor: 'ni-: 'dekorn: nyomor-: me-: :korn 'de 'di, or :yi-dih:. :Yee' Nyorsoa-a' :Zulu:, mo-: zela-eh ken dih, :ka eh 'dhu-a dhih 'jeh-'. Deh no-eh, Nyorsoa-a' :Zulu: :dao', an za-' dhih-a' 'yor-eh:.

⁷:Yee' deh⧾ taan :daa, me-: zela-eh ken dih.

⁸Nyorsoa-a' :Zulu-: 'ni-: 'dekorn: nyomor-: en-' klehkpeh :ne-a taan, en-' ken dih 'worn-dih-deh no deh :due'.

⁹:Mor eh 'dhu :a :taa deh⧾ :gwlor-nyor⧾-a zela-a ken dih, dhih 'jeh-' po, :yee' dha Nyorsoa-a' :neh 'kawehn: :daa, eh mu :na-dih: :eh, :eh kor-a or-a' 'Yu 'i?

¹⁰:Yee' nyor-beh: :or po-a Nyorsoa-a' 'Yu-a' dhih dhih 'jeh-', :yee' or 'ble deh⧾ :daa Nyorsoa zela:-a ken dih 'weh, 'do or :porluh ken. Jorwor: nyor-beh: :or se-a or-a' dhih dhih 'jeh-' po, :yee' or no-eh', Nyorsoa 'ye sih 'tmo-nyor no. Deh no-eh, or :se-' dhih :daa Nyorsoa zela:-a ken dih, :en kor-a or-a' 'Yu 'i, dhih 'jeh-' po.

¹¹:Yee' dhih ken dih zela-eh: Nyorsoa 'nyi-a :a-uh, eh-: :dhe dih. Nyorsoa 'nyi :a 'kmo :sie: :febeh'. 'De :febeh' :daa, eh 'wluh 'de or-a' 'Yu bo.

¹²Nyor-beh: :or :ne-a or-a' 'Yu-', :yee' or 'ble :febeh' :daa 'weh. Nyor-beh: :or se-a or-a' 'Yu-' :ne, :yee' or se :febeh' :daa 'ble.

¹³'An 'chle a deh⧾ :daa bo, 'de a 'ye-eh' yubo: :ka a 'ble-a 'kmo :sie: :febeh', a :mor :or po-a Nyorsoa-a' 'Yu-a' 'nyne-a' dhih dhih 'jeh-'.

¹⁴Deh :eh :ku-dih:-a :a :gwluhuh' 'do Nyorsoa ybei', eh-: :dhe dih. :Mor eh 'dhu :a dhele-or deh-a' dhih dih, 'de eh 'ye or-a' 'ton :korn-deh-' 'dhu-eh:, :yee' or 'worn :a-a' wlu 'weh.

¹⁵:Mor :a yubo-eh, :ka or 'worn-a :a-a' bale-wlu, :yee' :a yubo-eh' :ke, :ka deh⧾-a' klehkpeh :a dhele-or dih, :a mu-ih-a 'ye-:.

¹⁶:Yee' nyor-beh: :or mu-a or-a' 'de-di' 'ye-:, or 'ye-a' deh-zon-a' :yeh, Nyorsoa-a 'ma-dih-a bo no, :yee' or bale: Nyorsoa, or-a' dhih, or mu-or 'kmo :sie: :febeh' 'nyi-:. :Yuh :on :korn-a deh⧾-zon⧾-a' dhih Nyorsoa-a mu-a bo 'ma-dih:, mo-: :korn dhih 'an za-a-'. Deh⧾-zon:⧾ :nee',[1] me-: :korn dhih, Nyorsoa-a' 'ma-dih: bo. 'On :se-' :ao' deh⧾-zon:⧾ :dao', me-: :korn dhih, a 'ye Nyorsoa bale: :deh.

¹⁷Nyor⧾-a' klehkpeh :an no-a deh⧾ :en se-a 'i 'sleh, an no deh⧾-zon:⧾. Jorwor: eh :se deh⧾-zon⧾-a' klehkpeh nyor⧾-a no-a, me-: :korn dhih Nyorsoa :se-' bo 'ma-dih: i :deh.

¹⁸:A yubo-eh', :ka nyor :or 'dhu-a Nyorsoa-a' 'yu-', or-a' kpa-a deh⧾-zon:⧾ :no-eh 'dlu bo. Deh no-eh, Nyorsoa-a' 'Yu :Yusu'-a 'dhu-or 'yli-eh bo, 'de 'ku-a' :no-dih-or deh-'.

¹⁹:A yubo-eh', :ka :a :korn-a 'de Nyorsoa bo, 'de dha 'bluhba ken-a' klehkpeh :ne-a 'o 'ku-a' 'kpih 'zorn.

²⁰'De :a yubo-eh :ke, :ka Nyorsoa-a' 'Yu yi-a 'de, 'de or 'nyi-a :a deh-' dih 'worn-eh, :a 'ye-a Nyorsoa 'jeh nor yubo:. :A :ne-' Nyorsoa 'jeh :nor. Keen', :a :ne 'de or-a' 'Yu :Yusu' 'Klae-', :or 'dhu-a Nyorsoa 'jeh nor-', :or 'nyi-a :a 'kmo :sie: :febeh'.

²¹'An 'nynuu-a:, a :tehn-dih: a-a' 'jeh zuu⧾ bo dih.