Read Eastern Krahn 2 :Jororn' 1 Bible Online

2 :Jororn' 1 - Eastern Krahn bible

2 :Jororn' 1

¹'Mor :or 'dhu-a 'chore-a' nyor :klaba'-', 'mor 'ye :on, 'on-de:,[1] :mor Nyorsoa gan-a, mor-: 'dekorn: :an-a'a: 'nynuu-: a :mor 'on :ybeh-a, deh 'jeh neh. 'De eh se 'on :due', jorwor: nyor⧾-a' klehkpeh :on yubo:-a dhih-a' 'yor-eh, on :ybeh a-uh' 'weh :ke.

²Deh no-eh, dhih 'jeh :ne :a-uh' 'weh, 'de en mu :a-uh' :ne, :ka ti-a mu-a 'dlu-' :tehn.

³Mla-: :wehlih: :korn-eh-: 'dekorn: wlu-' dih 'worn-eh-: :en 'wluh-a 'de :a :Baa' Nyorsoa-: 'dekorn: :Yusu' 'Klae :or 'dhu-a :a :Baa' Nyorsoa-a' 'Yu-: bo, me-: mu 'o :a-a' klehkpeh bo :ne deh 'jeh neh, 'de :ybeh-dih: ka 'di.

⁴:Yee' eh po 'on-' 'mona: 'gabaa, 'de 'on 'ye :an-a'a: 'nynuu-a' :noo' :noo' 'ye, on 'ye 'o dhih-a' 'yor-eh-a' :gwie 'i :ne, :ka :a :Baa' Nyorsoa no-a eh-a' 'tele' :a-a' 'nyi-a'.

⁵:Yee' 'on-de:, eh :se 'tele' :dele', 'on :se-' :on bo 'chle. Jorwor: eh-: :ne-a :due', :a 'ble-a :chio'lo:, :eh 'wluh-a 'de eh-a' glu 'dhu 'da, eh-: 'o. 'An bale :on 'weh, :a :ybeh-dih:.

⁶:Yee' :ybeh-dih-eh :wor 'dhu. :A :dhe 'o or-a' 'tele' dih. :Yee' :ka a no-a eh-a' 'worn-a', :eh 'wluh-a 'de eh-a' glu 'dhu 'da, or-a' 'tele' :wor 'dhu, a :ne-dih: :ybeh-dih-eh-a' 'kmo.

⁷:Yee' nyor⧾ dih :bo-dih-nyor:⧾ :dhulu'-a na 'bluhba bo :naa. Mo-: :an mu deh⧾-a' klehkpeh-' dih. Nyor⧾ :on se-eh 'worn-dih:, :ka :Yusu' 'Klae yi-a 'de, 'de :gwlor-nyor-a' nyior-tu 'di, :yee' nyor⧾-a' 'jeh :dao', mo-: 'dhu nyor⧾ dih :bo-dih-nyor⧾-', mo-: 'dhu 'Klae-a' bo :vorn-nyor⧾-'.

⁸A 'dhu a-a' 'jeh :dhororn', 'de deh :korn :koan: a no-a, eh :ne-' 'ma, 'de jorwor: a-a'a: geli' :za-dih-deh 'ye 'kwla :gweh.

⁹Nyor-beh: :or 'kpa-' ple-a' ybei', 'de :or se-a 'Klae-a' nyor⧾ deh :torne-eh: on :torne-or, 'dlu bo kpa, :yee' or se Nyorsoa-' :ne. Jorwor: nyor-beh: :or mu-a deh⧾ :dao' on :torne-or, 'dlu bo :kpa, :yee' or :ne :a :Baa' Nyorsoa-'-: 'dekorn: or-a' 'Yu-'-: 'weh.

¹⁰:Mor eh 'dhu, nyor-beh yi 'o a bo, 'de or 'ye :ao', or se 'de deh :torne-eh: :daa :ya, :yee' a-a' :kpon-or' dih 'de a 'bli 'gbu. 'De mor a-a' :gble-dih:-or' 'jeh.

¹¹Nyor :or mu-or' :gble-dih:, :yee' or 'ble 'for 'de or-a' :koan-zon: :dao' 'di.

¹²:Yee' 'on 'ble deh⧾ :dhulu', 'on 'ye a :gwluhuh' zela:. Jorwor: 'on :se-' 'bhorn 'on 'ye-ih' a bo 'chle. Jorwor: 'on dhe-eh-: :gwlii', 'an 'jeh 'yor-eh 'ye 'de a bo yi, 'de :a 'ye ybei' dih dhele:, :a 'ye :manua bla, 'de :a 'ye 'mona-' dih 'yi-dih:.

¹³:An-a' 'de-di'-nynor-kpao'[2] Nyorsoa gan-a, or-a'a: 'nynuu 'da, mo-: 'ye :on.