Read Eastern Krahn Juu' 1 Bible Online

Juu' 1 - Eastern Krahn bible

Juu' 1

¹'Mor Juu' :or 'dhu-a :Yusu' 'Klae-a' 'bhoi-yu-', 'de :or 'dhu-a 'Jeen-a' dei'-', 'mor 'ye a-uh, a :mor :a :Baa' Nyorsoa :ybeh-a-', 'de or gan-a, 'de :Yusu' 'Klae-a pobo-a 'o bo dih.

²'Nyi Nyorsoa-a' :wehlih: :korn-eh-: wlu-' dih 'worn-eh-: 'dekorn: :ybeh-eh-: en 'kpuhba: ken dih 'do a bo.

³:Yee' :a 'bli-nyor⧾-a:, 'an :porluh-a sin-' :dee', 'on 'ye-a 'Klae-a' deh :a-a' klehkpeh, :a po-a dhih 'jeh-', eh-a' dhih a bo 'chle. Jorwor: :kana :naa, 'an :porluh-a zela 'on :gwluhuh' 'on 'ye a bo 'chle, 'de eh 'ye 'de a-a' 'kpih po, a 'ye a-a' 'Klae-a' dhih 'jeh-' :po-eh: or 'nyi-a or-a' nyor⧾ kpor :due' 'klein', a 'ye vorn, a 'ye eh-a' dhih ken dih zela: deh 'jeh.

⁴Deh no-eh, nyor⧾ 'plo⧾ mo-: 'kpa 'noror :a 'nyne-' :wleh, eh-: :a se 'i yubo:. Nyorsoa-a' 'chlee-deh sie ti de, 'de eh za-ih' :ka nyor⧾ :daa :on se-a Nyorsoa deh-' 'ye-eh 'nyi, or mu-uh-a 'kle 'ye-eh: 'dlu :po. On 'da Nyorsoa ybeh-uh' 'weh. Eh-a' dhih, :mor on 'kpa 'pebe' 'i, or :se-uh' 'kle 'ye-eh 'dlu :po i. An-a' 'jeh :dao', mo-: :se-eh' 'worn-dih: :ka :Yusu' 'Klae 'dhu-a :a-a' Nyor :Klaba'-: 'dekorn: :Gwlor :baa'-:.

⁵'An 'bhorn 'on 'ye a deh-beh :gwluhuh' bo :po-dih: :yeh a yubo:-a see. :Gwlor :baa' :or :za-a 'o 'Ezlea-nyor⧾ 'do 'Iye-nyor⧾-a' 'kpih 'zorn, or-: no-eh, 'de nyor⧾-a' 'jeh :dao', an-a' nyor⧾ :yuh :on se-a or-a' dhih dhih 'jeh-' po, 'de or :zie-dih-uh gbe.

⁶:Yee' 'enjor-nyor:⧾ :ke, 'kpih Nyorsoa 'nyi-uh-a ti on se-ih-a :dhororn' 'dhu, 'de on :mu-dih:-a :dha :noror', 'de on 'ye-a :dha or 'nyi-uh-a dih 'tali:. Eh-: no-eh, 'de or po-uh 'kmo :sie: :gbolo-eh buh-', 'de or po-uh 'de :kule-' :ke, 'do :dha or dhe-uh-a dih 'de 'we-eh: :klaba' or mu-a an-a' zabe 'i :chehn, eh 'ye-a' 'o nyni.

⁷:Yee' 'de :ka :ne-a :due' 'di :ke, nyor⧾ :on :ne-a 'Salor-: :Gormor'la-: 'dekorn: :gwlor⧾ :eh 'koan'-dih-uh-a dih-: on 'kpa 'de 'tmeor:⧾ :korn-eh 'di. 'De on 'tali: kplen on :korn on 'ye-a' no 'do an-a'a: 'nynor⧾ bo-: dih :ke, 'de an no gu-kplen. :Gwlor⧾ :dao'-: 'dekorn: nyor⧾ :on :ne-a 'de en 'di-: neh :eh :se-a 'moo'-neh: :ka ti-a mu-a 'dlu-' :tehn, eh-: sin-dih an-a' klehkpeh. 'Kle 'ye-eh: :daa :eh :po-eh: 'o on 'dlu, eh-: no 'yi :to-dih-deh 'do nyor⧾-a' klehkpeh bo.

⁸Eh-: nyor⧾ :daa, an no :ke. An ya sih-ya:⧾ :en no-eh, 'de an no-a dhen-deh⧾ 'do an-a' 'jeh-a' yau 'bhun. An po Nyorsoa-a' nyor⧾ wlu 'ken :korn-eh-: dih, 'de an 'jle-dih or-a' dhih-a' 'i 'beh-enjor-nyor:⧾ :on :ne-a 'de yai'.

⁹'De mor 'enjor: :klaba', an 'da-dih-a Makor', or :se-' deh :daa no-a' 'jeh. Ti or :ne 'ku 'ye-a :Mose'-a' 'ku ken dih :vorn-dih:, 'do nyor :or mu-uh-a :kpa deh bo, or :se-' :gwluhuh' :ku, or :se-' 'ku-a' zabe 'i chehn, 'de mor or :se-uh' 'jle-dih:. Deh :due' or no-a, eh-: 'dhu or 'da, 'Nyi :Gwlor :baa' po :on 'kle 'ye-eh 'dlu.

¹⁰Jorwor: nyor⧾ :daa on 'ble 'jlei: 'de on 'worn, 'do deh⧾ on se-a 'i yubo: bo. 'De an-a' deh-' dih 'worn-eh gweh :ka nimi⧾ :or se-a :toror' :korn, 'de deh⧾ en no-a, en se-ih-a yubo:. Deh⧾-a' 'jeh :daa, me-: mu-eh :no, 'de on 'ye gbe :zie:.

¹¹'Chlo 'do on bo. :Gwie: 'Kein kpa-a, eh-: an kpa. On 'dhu 'wlii-dhih 'de on 'kpa 'de 'yi zi-deh: :eh 'Benor zi-a 'i 'di :ke. :Ka 'Kola no-a, 'de or :bla-dih:-a :Mose' worn, eh-: :korn 'be an no :ke. An mu gbe :zie: :ka or no-a gbe :zie-eh.

¹²Nyor⧾-a' 'jeh :dao', on :ne-' 'dli, 'do a-a' son⧾ ybei' kpuhba: 'da. On se dhen ybei' :ne, 'do mor, 'do deh-zon: :no 'da. An zi on :due'-a' dhih. On gweh 'ni-kpan:⧾ :pobor'-a gboba-' dih 'de yai', 'de 'ni-a' 'worn eh-a' dba-a'. On gweh tu :an-a' :tlo-a' 'buo', eh-a' :yeh 'dhu ti on :korn on 'ye-a' :tlo-dih:. On 'tlun-dih-eh: buh⧾ dih, 'de on 'meh klehkpeh klehkpeh.

¹³On gweh yobo'-a' nyor-kpalu-duh:⧾ :en ya-a 'o en-' :feon-zon:⧾ :en no-a dhen-deh⧾ 'do 'kpuhba' 'i. On gweh 'chuh :dhlaen: :en-' :dhe-a' :dha :due' dih, 'de :en 'dhan-a 'o :gwie 'i dih. Nyorsoa dhe :kule: 'kawehn dih 'do nyor⧾ :dao' bo, :ka ti-a mu-a 'dlu-' :tehn.

¹⁴:Yee' 'Inor: :or no-a 'Adan-a' 'nynuu-a' 'nynuu-a' kpor⧾ :meheh' 'sorn nor, or-: sie ti de, :or po Nyorsoa-a' wele-eh, :or :za deh :daa-' 'do an-a' dhih bo, :or 'da, A :gbee'e:. :Gwlor :baa' :ne or-a'a: 'enjor-nyor:⧾ :on :ne-a gban 'i, :on no-a 'wlu-a' 'wlu, an mu 'de :yi,

¹⁵on 'ye nyor⧾-a' klehkpeh-a' zabe zi, 'de on 'ye nyor⧾-a' klehkpeh :on se-a Nyorsoa deh-' 'ye-eh 'nyi, an-a' zabe 'i chehn, 'do deh⧾-zon:⧾ an no-a, :en se-a Nyorsoa deh-' 'ye-: 'dekorn: wlu⧾-zon:⧾ on po-or 'bhun dih-: bo.

¹⁶Nyor⧾ :daa, an wlu-dih worn dih. An-a' :porluh-a' 'pehn dih. An zi 'o an-a' 'jeh-a' 'bhororn'-deh⧾-zon⧾ klei'. An po an-a' 'jeh dhih bo. An nmor-dih 'de on 'bei' 'di 'worn, on 'ye deh 'ye, 'de on 'kwa.

¹⁷Jorwor: :a 'bli-nyor⧾-a:, a :na-dih: dhih :a-a' :Gwlor :baa' :Yusu' 'Klae-a'a: dboo-nyor⧾ :za-a-' :zai' 'de a bo, en-' dhih :gwluhuh' dih.

¹⁸On 'dae: 'de a bo, 'Do :de 'bor-dih-we-eh 'di, nyor⧾ :noo'-a mu deh Nyorsoa :za-a-' :goba'-dhih ken dih 'wluh-dih:. An mu an-a' 'bhororn'-deh⧾-zon⧾ :en se-a Nyorsoa deh-' 'ye-eh 'nyi, klei' :zi.

¹⁹Nyor⧾ :daa, mo-: 'o :on :ya 'de deh-' :gble-eh 'de a 'nyne-'. An-a' yau-a' 'bhororn'-deh⧾-zon:⧾, me-: korn-uh wlu 'ken. On se Nyorsoa-a' :Zulu 'ble.

²⁰Jorwor: :a 'bli-nyor⧾-a:, a kpa a-a' 'jeh-a' dih :ku-dih-eh 'dlu bo, 'de a-a' 'Klae-a' dhih 'jeh-' :po-eh: :eh :ne-a gban 'i 'gabaa 'di. 'De a :wlu 'de Nyorsoa bo, 'de or-a' Gban 'i :ne :Zulu-a' 'kpih 'di.

²¹A :ne-dih: 'kmo, :an mu-eh :no 'de Nyorsoa-a' :ybeh-eh 'ye-a 'o a bo :ne. A :fuo: :a-a' :Gwlor :baa' :Yusu' 'Klae 'de or-a' :wehlih :korn-eh 'di, or 'ye a 'kmo :sie: :febeh' 'nyi.

²²Nyor⧾ :on :korn-a :porluh⧾-a: dhobo-a 'do 'Klae-a' deh bo, a 'pehn-dih: wlu dih, 'de on bo, a 'ye-uh' :za-dih:.

²³Nyor⧾ :noo' :ne 'o 'ku 'bli-neh-a' :mu-eh-a' :gwie 'i. A po-uh 'o :gwie: 'jeh ne 'i, a 'ye-uh' 'puh-dih:. Nyor⧾ :noo' :ne 'o, mo-: a :korn a 'ye :wehlih 'ye. Jorwor: a 'wla :gwluhuh' dih, 'de an-a' gu-kplen :ne-' a 'yi dih :nyni-dih: :ke.

²⁴:Yee' Nyorsoa :or 'beh-dih: :or 'ye-eh' no, 'de a :sor 'ga-a dih, 'de :or mu-eh :no, 'de a :sor :ne-a dhih 'bhun, 'de 'mona 'ye a dih 'yi-dih: 'do or-a' dhih-a' 'i 'beh-a' ybei',

²⁵:yee' Nyorsoa :due' 'i-a' :due' :dao', :or no-a :a-a' 'puh-dih-nyor, :eh :yi-dih:-a :a-a' :Gwlor :baa' :Yusu' 'Klae-', dhih-a' 'i 'beh-a' 'do or bo. 'Nyi :a po or-a' 'nyne ya. Deh no-eh, or-a' dhih 'beh-: 'i, or 'ble 'kpih, or :korn deh⧾-a' klehkpeh wlu 'ken. :Ka or :ne-a 'de deh⧾-a' klehkpeh-a mu-a :no-eh, 'ka-: or :ne :naa, 'de mor 'ka-: or mu :ne :ka ti-a mu-a 'dlu-' :tehn. 'Ka-: eh 'ye :ne.