Read Eastern Krahn Wlehvolesiehn' 1 Bible Online

Wlehvolesiehn' 1 - Eastern Krahn bible

Wlehvolesiehn' 1

¹:Yee' deh⧾ :yih :korn :en 'ye-a' :no-eh:, me-: 'o :Yusu' 'Klae :to-dih: :a 'i 'noror 'chlee-deh: :daa 'di, :yih Nyorsoa 'nyi-or, or 'ye-a or-a'a: 'bhoi-nynuu 'i :to-dih: 'do deh⧾ :en :se-a 'o :gwle i, :en 'ye-a' :no-eh dhih bo. 'De or dbo or-a'a: 'enjor :due', eh 'ye-ih 'mor :or 'dhu-a or-a'a: 'bhoi-yu: :Jororn' 'i :to-dih:.

²:Yee' deh⧾-a' klehkpeh 'on 'ye-a, 'on za-ih' 'weh. En no Nyorsoa-a' tubo-wlu:⧾, 'de en no dhih-a' 'yor-eh: :Yusu' 'Klae :to-dih:-a 'on 'i.

³:Bhorlie' 'do nyor :or zlo-a Nyorsoa-a' wele-eh: :po-chlee-deh: :daa 'de nyor⧾ bo. 'De mor :bhorlie' 'do nyor⧾ :on to-ih-a :dou'⧾ bo, 'de :on dhe-a 'o en-' 'tele' dih. Deh no-eh, eh :se 'o :gwle i, deh⧾ :daa en 'ye :no-eh:.

⁴'Mor :or 'dhu-a :Jororn'-', 'mor 'ye a-uh, a :mor 'chore-nyor⧾-a' 'dlu⧾-kpor⧾ :ne-a :meheh' 'sorn :on :ne-a 'de 'Esea-bluhba ken. Mla-: 'dekorn: wlu-' dih 'worn-eh-: 'do a bo, :en 'wluh-a 'de Nyorsoa bo, :or :ne-a :chio'lo:, 'de :or :ne-a :naa, 'de :or mu-a :ne 'de ybei'-: 'dekorn: :zulu⧾ :meheh' 'sorn, :en za-or :weheh', :en :ne-a 'o or-a'a: 'keen :kpala' ybei'-: :ke.

⁵Mla-: 'dekorn: wlu-' dih 'worn-eh-: :en 'wluh-a 'de :Yusu' 'Klae bo :ke, :or no-a :dhehehn-nyor 'do Nyorsoa-a' tubo-wlu:⧾ :po 'da, 'de :or no-a :zai'-nyor :or 'wluh-a 'de nma-dih-deh 'di, 'de :or :korn-a 'keen-boi'-a' klehkpeh :on :ne-a dha yao 'zorn wlu 'ken. Or :ybeh :a-uh' 'weh, 'de or no or-a' nyomor, or zelie: :a-uh 'do deh⧾-zon⧾-a' 'kpih 'zorn.

⁶'De or no :a 'dawor'-dlu: :an za-a 'slaa 'do or :Baa' Nyorsoa bo. Dhih-a' 'i 'beh-a'-: 'dekorn: 'kpih-: 'do :Yusu' 'Klae bo, :ka ti-a mu-a 'dlu-' :tehn klehkpeh klehkpeh. 'Ka-: eh 'ye :ne.

⁷A :gbee'e:. 'Klae-a mu 'de :yi, 'de 'ni-kpan⧾ 'nyne-'. Nyor⧾-a' klehkpeh :on :ne-a dha 'bluhba ken, an mu-or 'ye-:, :korn mor :yuh :on 'dba-or 'do tu 'i :ke-:. 'Dawor'⧾-dlu⧾-a' klehkpeh :en :ne-a dha 'bluhba ken, en mu 'vin-: 'de en 'ye 'zlu, 'do or-a' dhih bo. 'Ka-: eh 'ye :ne.

⁸:Yee' :Gwlor :baa' Nyorsoa :or 'ble-a 'kpih-a' klehkpeh kwa, or 'dae:, or-: no eh-a' glu 'dhu 'da-: 'dekorn: eh-a' 'dlu-' :jla 'da-:. Nyorsoa :daa, or-: :ne :chio'lo:, 'de or-: :ne :naa, 'de or-: mu :ne 'de ybei'.

⁹'Mor :Jororn' :or no-a a-a' 'Klae :de-di', 'de :or :ne a kpon-a :porluh dih :chio'lo: 'de :a se-a sea 'do 'kle 'ye-dih-eh: an 'ye-dih :a-uh bo, :ka :a :korn-a 'de 'Klae-a' nyor⧾ wlu 'ken :korn-eh bo, eh-a' dhih. 'De yobo'-a' dubeh:, an 'da-dih-a 'Pamor, 'do :wor on kpa 'on, on 'da :eh :korn dhih 'on po Nyorsoa-a' tubo-wlu⧾-: 'dekorn: dhih-a' 'yor-eh-: :Yusu' :to-dih:-a 'on 'yi :eh? Eh-: :korn dhih on kpa 'de 'on.

¹⁰:Yee' 'do :Gwlor :baa'-a' 'we-eh 'di an 'da-dih-a 'Sorle, :yee' Nyorsoa-a' :Zulu :ne 'o 'on ken. 'De 'on 'worn wlu, on 'wor, :on gweh-a :ka :gamu-a wlu-a 'noror 'on 'de, mo-: :an wlu 'de 'on bo.

¹¹Wlu :dao', on 'dae:, Deh⧾ :daa, :an mu-a 'ye-:, 'chle-ih 'de 'chlee-deh 'di. :Yee' dbo-eh 'de 'chore-nyor⧾-a' 'dlu⧾-kpor⧾ :ne-a :meheh' 'sorn, :on :ne-a 'kwi :gwlor⧾ :klaba'⧾ :daa 'di dih, :en 'dhu-a 'Ehfesor-: :Simo'na-: 'Pehkama-: :Taya'ta-: 'Saleh-: 'Filadeh'fia-: 'dekorn: 'Lolesi'a-:.

¹²:Yee' 'on 'bili:-'-: dih, 'on 'ye nyor :or wlu-a 'de 'on bo 'ye. Jorwor: :yeh 'on 'bili:-a-' dih, :yee' 'on 'ye 'nape⧾ :meheh' 'sorn :en no-a 'goo.

¹³:Yee' 'de en 'nyne-' :dao', 'do :wor 'on 'ye-dih: deh :eh gweh-a :gwlor-nyor :or pa-a :gba 'vuu: :dhorno', 'de wluh or bla-a 'do or 'gben-', on no 'goo.

¹⁴Nyor-a' 'jeh :dao', 'mii: :en :ne-a 'o or 'dlu, en :ne 'pu-', en gweh 'fehmeh'-plu 'i, 'de or-a' 'yli-a' wan-a' gweh neh.

¹⁵Or-a' buh⧾-a' fan-a' gweh :ka nyor 'wla-a :dhiin, 'de en fan-a 'de 'yli. 'De or-a' wlu gweh :ka 'ni-a wla-a.

¹⁶:Yee' 'chuh :dhlaen :meheh' 'sorn, me-: or 'ble 'de or-a' :dila-son 'kwa. :Bhla 'jlehn :eh 'nma-a, :eh 'ble-a worn⧾ 'sororn', eh-: 'wluh 'de or 'worn. 'De or-a' 'yuba-a' fan-a' gweh 'yluh-a' 'yi :kma-eh 'i.

¹⁷:Yee' :yeh 'on 'ye-or, :yee' 'on du 'an 'jeh 'weh 'do or ybei' :eh gweh-a :ka nyor 'meh-a. Jorwor: or-a' :dila-son:, mo-: or tba 'o 'on ken dih, 'de or 'da, :An-a' :ple-' :fano. 'Mor-: 'dhu eh-a' glu 'dhu 'da-: 'dekorn: eh-a' 'dlu-' :jla 'da-:.

¹⁸'On no 'kmo :ne-nyor:. 'On 'meh-' :dee'. Jorwor: 'on :ne-' 'kmo :ka ti-a mu-a 'dlu-' :tehn klehkpeh klehkpeh. 'Mor :korn 'meh-a'-: 'dekorn: 'zinor'-: wlu 'ken.

¹⁹:Yee' :kana :naa, deh⧾ :an mu-a 'ye-:, 'chle-ih, :yih :en mu-a 'dlu bo :naa-: 'dekorn: :yih :en mu-a :no-eh 'de ybei'-:.

²⁰:Yee' deh 'chuh :dhlaen :meheh' 'sorn :on 'ye-a 'de 'an :dila-son 'kwa-: 'dekorn: 'nape⧾ :meheh' 'sorn, :en no-a 'goo :on 'ye-a, deh en 'dhu-eh:-', eh-: :dhe dih. 'Chuh :dhlaen :meheh' 'sorn :dao', me-: :nyna 'o 'enjor-nyor⧾ :meheh' 'sorn :on :korn-a 'de 'chore-nyor⧾-a' 'dlu⧾-kpor⧾ :meheh' 'sorn :daa, an-a' 'gor bo dih. 'De 'nape⧾ :meheh' 'sorn :dao', me-: :nyna 'o 'chore-nyor⧾-a' 'dlu⧾-kpor⧾ :ne-a :meheh' 'sorn, en-' 'gor bo dih.