Read Eastern Krahn Wlehvolesiehn' 10 Bible Online

Wlehvolesiehn' 10 - Eastern Krahn bible

Wlehvolesiehn' 10

¹:Yee' 'on 'ye 'enjor: :noror' :or 'ble-a dhih-a' 'i 'beh-kpih, or-: 'dhle, or 'wluh 'de Nyorsoa 'bli yai'. Or-: bhin-a dih 'ni-kpan kle-' dih, 'de 'ni 'dba doeh 'do or 'dlu :gwea. Or-a' 'yuba-a' fan-a' gweh 'yluh. 'De or-a' buh⧾ gweh :ka tu⧾ 'kpa-a neh-'.

²Or 'ble 'chlee-deh-yu: :eh kan-dih:-a 'i, 'de or 'kwa. 'De or po or-a' :dila-buh 'de yobo' ken. 'De or po or-a' kona-buh dha 'bluhba ken.

³Or 'wor, or wele: :eh gweh-a :ka :gbolo-a klu-a. :Yeh or wele:-a, :yee' 'ni-a' 'gbu-wlu⧾ :meheh' 'sorn, me-: :wlu.

⁴:Yee' :yeh en :wlu-a, :yee' 'an yi 'chle 'da :dee'. Jorwor: 'on 'worn wlu, mo-: 'wluh 'de Nyorsoa 'bli yai', mo-: 'da, Deh 'ni-a' 'gbu-wlu⧾ :meheh' 'sorn :daa, en :za-a-', :an-a' 'chle-eh. 'Nyi eh no 'slan 'do :on bo.

⁵:Yee' 'enjor: :dao' 'on 'ye-a, :or :korn-a buh :due' :ne-a 'de yobo' ken, 'de buh :due' :ne-a dha 'bluhba ken, or-: :to or-a' :dila-son 'de Nyorsoa 'bli yai',

⁶or 'ye wlu :dhama'-' po, 'de Nyorsoa-a' 'nyne 'di, or 'da, Nyorsoa :or :ne-a 'kmo :ka ti-a mu-a 'dlu-' :tehn klehkpeh klehkpeh :or no-a yao-: 'dekorn: deh⧾-a' klehkpeh :en :ne-a 'de-: 'de :or no-a 'bluhba-: 'dekorn: deh⧾-a' klehkpeh :en :ne-a dha or ken-: 'de :or no-a yobo'-: 'dekorn: deh⧾-a' klehkpeh :en :ne-a 'do or 'worn-:. Or 'da deh Nyorsoa 'ye-a' 'ken :fuo: :neheh', eh se :ne.

⁷Jorwor: :mor 'enjor-nyor⧾-a' :meheh' 'sorn nor :taa or-a'a: :gamu: :bla 'da yi, :yee' Nyorsoa-a' 'slan or 'dhu-a, or mu dhih 'jeh-' 'kpa-: :or :korn-a dhih or :za-a-' 'de or-a'a: 'bhoi-nynuu: :an po-a or-a' wele-eh bo.

⁸:Yee' wlu 'on 'worn-a :on 'wluh-a 'de Nyorsoa 'bli yai', on :wlu-' 'de 'on bo :neheh', on 'dae:, Mu :on 'ye 'chlee-deh: :dao' :eh kan-dih:-a 'i dih kpon, 'de 'enjor: :dao' 'kwa, :or :nyna-a 'o yobo'-: 'dekorn: 'bluhba-: ken dih.

⁹'De 'on mu 'de or bo. 'On zela-or-: :gwluhuh' or 'ye-eh 'on 'nyi. 'De or :wlu 'de 'on bo, or 'da, 'Duo-eh' :on 'ye-eh' di. Eh mu 'mene: 'de :on worn :ka duh-ni no-a 'mene-eh. Jorwor: eh mu :an-a' 'kwli 'bhun-dih:, 'de eh-a' 'no 'ye :on worn 'ya.

¹⁰'De 'on za-eh or 'kwa, 'on di-eh. :Yee' eh 'mene: 'de 'on 'worn, eh gweh duh-ni 'i. Jorwor: :yeh 'on gweh-a eh-a' di-a' 'i, :yee' eh 'bhun-dih: 'an 'kwli 'weh, 'de eh-a' 'no-a 'ya 'on 'worn.

¹¹'De on zela: 'on :gwluhuh' :neheh', 'on 'ye Nyorsoa-a' wele-eh po, :eh kor-a nyor⧾ :daa, an-a' :dha :dhulu' 'i, :on 'dhu-a 'dawor'⧾-dlu⧾-: 'bluhba⧾-dlu⧾-: wlu⧾ 'doror: 'dor :po-nyor⧾-: 'dekorn: 'keen-boi'-:.