Read Eastern Krahn Wlehvolesiehn' 13 Bible Online

Wlehvolesiehn' 13 - Eastern Krahn bible

Wlehvolesiehn' 13

¹:Yee' 'on 'ye worn :kma-deh :due', eh-: 'wluh 'de yobo' 'zorn. Eh 'ble 'gbon⧾ :bhue-: 'dekorn: 'dlu⧾ :meheh' 'sorn-:. 'De eh-a' 'gbon⧾ :ne-a :bhue, en dhe 'keen :gblaa' :due' :due' 'dlu. :Yee' 'do eh-a' 'dlu⧾ :meheh' 'sorn :dao' ken, 'do :wor 'nyne 'chle-dih-eh: :due' :due' :en 'jle-dih:-a Nyorsoa.

²'De worn :kma-deh: :dao' 'on 'ye-a, eh gweh ji. 'De eh-a' buh⧾ gweh 'kpehn-a' buh⧾. 'De eh 'worn gweh 'de :gbolo 'worn. 'De dorsehn: :dao', eh 'nyi worn :kma-deh: :dao', eh-a' 'keen :kpala'-: 'dekorn: eh-a' 'kpih :klaba'⧾-: :yih eh 'ble-a :ke.

³Eh gweh :ka deh tba eh-a' 'dlu :due' 'gabaa, 'de eh 'meh-a :zai', 'de jorwor: 'do 'bor-a. :Yee' eh :florn-dih: 'bluhba-a' klehkpeh-: worn, 'de an zi 'o eh klei'.

⁴:Yee' :gwlor-nyor⧾-a za dorsehn: :dao' :weheh'. Deh no-eh, eh 'nyi eh-a' 'kpih :klaba'⧾ eh 'ble-a, worn :kma-deh: :dao' 'weh, 'de an za worn :kma-deh: :dao' :weheh' :ke, an no, Worn :kma-deh: :daa, eh se 'be :korn. :Or 'beh-dih: :or 'ye-eh bo vorn :eh?

⁵:Yee' Nyorsoa :za worn :kma-deh: :dao' 'yli-eh dih, eh 'ye eh-a' 'jeh 'i 'beh-dih: 'do or ken, 'de eh 'ye wlu⧾ po :en 'ye-or 'jle-dih:. Nyorsoa za-eh 'yli-eh dih, eh 'ye nyor⧾ wlu 'ken :korn 'do zon⧾ taan 'chuh⧾ :meheh'lo 'di.

⁶:Yee' eh kan-dih: eh-a' worn 'i, 'de eh 'jle-dih: Nyorsoa-: or-a' 'nyne-: :dha or 'ti-a-: 'dekorn: nyor⧾ :on 'ti-a 'de or bo yai'-:.

⁷'De Nyorsoa za-eh 'yli-eh dih, eh 'ye or-a' nyor⧾ tuh bo :pa-dih:, eh 'ye-uh' du. 'De or 'nyi-eh 'kpih 'do :baa' 'di-boi'-a'-: 'bluhba⧾-dlu⧾-: wlu⧾ 'doror: 'dor :po-nyor⧾-: 'dekorn: 'dawor'⧾-dlu⧾-: an-a' klehkpeh ken.

⁸Nyor⧾-a' klehkpeh :on :ne-a dha 'bluhba ken, an mu-eh :weheh' :za. Jorwor: :yuh :on :korn-a 'nyne 'chle-eh 'de 'kmo :sie: :febeh'-chlee-deh 'di, 'de 'bluhba-a mu-a :no-eh, on :due' mo-: :se-eh' :weheh' :za i. 'Chlee-deh: :dao', eh :korn 'de 'Blae'-yu: :or 'dba-eh bo.

⁹:Yee' 'mor :or 'dhu-a :Jororn'-', 'on 'dae:, Nyor :or 'ble-a :dou'⧾, 'nyi or :to deh⧾ :daa :dou'⧾ bo.

¹⁰:Yee' nyor tuh :korn on 'ye-a' kpon, an mu-or :kpon. :Yee' :mor nyor :korn or 'ye :bhla 'jlehn 'i 'meh-dih:, :yee' :bhla 'jlehn, eh-: an mu-or 'i 'dba-dih:. :Yee' :mor eh :ne :ao', :yee' Nyorsoa-nyor⧾ :korn on 'ye dih :nyna deh 'jeh, 'de an-a' 'Klae-a' dhih 'jeh-' :po-eh 'di.

¹¹:Yee' 'on 'ye worn :kma-deh: :neheh', eh-: 'wluh 'de 'bluhba 'zorn. Eh-: 'ble 'gbon⧾ 'sororn', eh gweh :ka 'blae' 'i. 'De eh wlu :ka dorsehn no-a :wlu-a'.

¹²'Kpih :tehn 'i neh 'ble-a, me-: eh 'ble, 'de eh no-dih :koan-' 'do eh ybei'. 'De eh :kpa-dih: nyor⧾-a' klehkpeh :on :ne-a dha 'bluhba ken 'kpih, on 'ye :tehn 'i neh-a' :weheh' :za, :eh :korn-a 'dlu :due' deh tba-a, 'de eh 'meh-a :zai', 'de :on 'bor-a.

¹³Eh no nyor⧾ 'di dih 'ma-dih-deh:⧾ :kolu'⧾. Eh no-eh' :sloror', 'de neh 'wluh 'de yao, 'de eh yi dha 'bluhba ken 'do :gwlor-nyor⧾-a' klehkpeh ybei'.

¹⁴Nyorsoa za-eh 'yli-eh dih, 'de eh no nyor⧾ 'di dih 'ma-dih-deh⧾ 'do :tehn 'i neh ybei', eh 'ye nyor⧾-a' klehkpeh :on :ne-a dha 'bluhba ken dih :bo-dih:. Eh zela-uh-: :gwluhuh' on 'ye deh ma, eh 'ye 'o :tehn 'i neh-a' 'gor bo dih :nyna, :yeh on 'dba-dih:-a :bhla 'jlehn, 'de :eh :ne-a 'kmo :neheh'.

¹⁵'De Nyorsoa :za 'sororn' neh 'yli-eh dih, eh 'ye :tehn 'i neh-a' deh on ma-a :febeh' 'di po, 'de eh 'ye :wlu, eh 'ye nyor⧾ :on se-eh :weheh' :za 'dba.

¹⁶:Yee' worn :kma-deh-a' 'sororn' :neh :dao', eh :kpa-dih: nyor⧾ 'kpih, eh 'ye-uh' yubo-da 'dhu 'de an-a' :dila-son 'kwa-: :eh beh 'do an-a' 'yuba-sehn 'i-: :on 'dhu-a 'nyne :korn-nyor⧾-: :korn :yuh nyor⧾ se-a yubo:-: bhaan-nyor⧾-: :korn se deh-a' :za-da 'ble-nyor⧾-: nyor⧾ :on :se-a 'ge-nynuu-: 'dekorn: 'ge-nynuu-: an-a' klehkpeh.

¹⁷:Mor on 'ble yubo-dih-deh :gbor, 'de jorwor: on 'ye deh dhen, on 'ye deh plo. Yubo-dih-deh: :daa, eh no :zai' worn :kma-deh-a' 'nyne, :eh beh 'nama: :or :nyna-a 'o eh-a' 'nyne-a' 'gor bo dih-:.

¹⁸Eh 'worn nyor :or 'ble-a :toror', or-: 'beh-dih: or 'ye deh :daa dih 'worn. 'De nyor :or 'ble-a deh-' dih 'worn-eh, 'nyi or po en-' 'nama :dha :due' or 'ye en-' gbor :za 'da yubo:. Deh no-eh, en :nyna 'o nyor-a' 'nyne-a' 'nama-a' 'gor bo dih, :en 'dhu-a :kehehn' :meheh'lo: :kwlaa :meheh'lo: 'yor :meheh'lo:-'.