Read Eastern Krahn Wlehvolesiehn' 14 Bible Online

Wlehvolesiehn' 14 - Eastern Krahn bible

Wlehvolesiehn' 14

¹:Yee' :yeh 'an pobo-a 'de :neheh', :yee' 'on 'ye 'Blae'-yu: :dao' 'weh, or :nyna 'o tluh an 'da-dih-a 'Zayorn ken dih. 'De nyor⧾-a' 'wlu-a' :kehehn' :due' 'wlu-a' :kwlaa :nyieh 'wlu :nyieh :dao' (144,000) :on :korn-a 'yuba-sehn 'i or-a' 'nyne-: 'dekorn: or :Baa' 'nyne-: en 'chle-dih-eh, mo-: :ne 'o or bo.

²'De 'on 'worn wlu, on 'wluh 'de Nyorsoa 'bli yai' :on gweh :ka 'ni-a wla-a-: 'dekorn: :ka dhehn-a 'plan-a-: 'de en-' wlu gweh :ka :dholo: :bla-nyor⧾-a bla-a :dholo⧾.

³'De nyor⧾ :dao', an ble 'duh :dele' 'do 'keen :kpala' :dao'-: 'kmo :ne-deh⧾ :nyieh :dao'-: 'dekorn: nyor⧾ :klaba'⧾ :dao'-: ybei'. Nyor se 'duh :dao', an-a' 'chean'-a' 'beh-dih:. Jorwor: :yuh Nyorsoa zelie:-a, :on :korn-a 'wlu-a' :kehehn' :due' 'wlu-a' :kwlaa :nyieh 'wlu :nyieh :dao' (144,000), or :za-a: 'de :gwlor-nyor⧾ 'nyne-', on :due' yubo-uh.

⁴On no nyor⧾ :on :dhe-dih:-a an-a' 'jeh 'for 'i, :on se-a 'nynor bo 'pehn, 'de :on se-a 'nynor-dhih yubo:. 'De an zi 'o 'Blae'-yu klei' :dha klehkpeh or mu-a. On zelie-eh:-', on 'wluh 'de :gwlor-nyor⧾ 'nyne-'. Mo-: no :zai'-nyor⧾ :on 'nyi-eh Nyorsoa-: 'dekorn: 'Blae'-yu-:.

⁵Sih 'see 'o on worn 'i yi-dih, 'de mor on se dhih 'bhun :ne.

⁶:Yee' 'on 'ye 'enjor: :noror', or-: wan 'de yai' :dha :dhorno'. Or 'ble 'kmo :sie-tubo-wlu:⧾ 'jeh or 'ye-ih' po, 'de nyor⧾ :on 'ti-a dha 'bluhba ken bo, :on 'dhu-a 'bluhba⧾-dlu⧾-: :bai' 'di-dih-: wlu⧾ 'doror: 'dor :po-nyor⧾-: 'dekorn: 'dawor'⧾-dlu⧾-: an-a' klehkpeh.

⁷'De or 'wor, or 'dae:, A ple Nyorsoa-a' :fano, a 'nyi-or dhih-a' 'i 'beh-a'. Deh no-eh, or-a' zabe: :zi-ti nyni 'o 'weh. Or-: no yao-: dha 'bluhba ken-: yobo'-: 'dekorn: 'ni⧾-a' 'dlu⧾-a' glu 'wluh 'da-:. :Yee' a za-or :weheh'.

⁸'De 'sororn' nor zi 'o or klei', or no, 'Babe'lor-gwlor: :dao' :or ku-a dih, or blu-', :gwloru:, or no-eh, 'de 'dawor'⧾-dlu⧾-a' klehkpeh 'na or-a' 'tmeor:⧾ :korn-eh-a' nomor, :eh :ya-a: 'de Nyorsoa-a' 'chehn-yuba.

⁹:Yee' taan nor tba 'o :zai' nor-: 'dekorn: 'sororn' nor-: 'de-: dih. 'De or 'wor, or no, :Mor eh 'dhu nyor⧾ :za worn :kma-deh: :dao'-: 'dekorn: eh-a' 'yor-eh: on ma-a :weheh', 'de on 'ye eh-a' yubo-da 'dhu-dih-eh:, 'do an-a' 'yuba-sehn 'i-: :eh beh 'de an-a' :dila-son 'kwa-:

¹⁰:yee' nyor⧾ :dao', on :korn on 'ye nomor :or :nyna-a 'o Nyorsoa-a' 'chehn-yuba-a' 'gor bo dih 'na, :or no-a 'yi :kma-nomor: :or Nyorsoa-a' 'yor-eh po-a 'de or-a' 'chehn-korbuh 'di. Nyor⧾ :dao', neh-a' yluh-: 'dekorn: neh-sobu'⧾-: en mu 'o on :gwlii' :di, 'do 'enjor-nyor:⧾ :on :ne-a gban 'i-: 'dekorn: 'Blae'-yu-: ybei'.

¹¹'De neh :dao' :eh :korn-a yluh-a di-a 'o on :gwlii', eh-a' :daluh'-a mu yai' :mu :ka ti-a mu-a 'dlu-' :tehn klehkpeh klehkpeh. 'De 'gwie-: :glaa'e-: nyor⧾ :dao' :an za-a worn :kma-deh: :dao' :weheh', 'dekorn: eh-a' 'yor-eh: on ma-a-: :korn mor nyor⧾ :on :korn-a 'yuba-sehn 'i-: 'dekorn: :dila-son 'kwa-: on 'dhu-dih:-a eh-a' 'nyne-a' yubo-da, an-a' 'kle 'ye-eh: :dao', eh-a' 'bor.

¹²:Yee' :mor eh :ne :ao', :yee' Nyorsoa-nyor⧾ :korn on 'ye dih :nyna deh 'jeh 'de 'kle 'ye-eh 'di, :on 'dhu-a nyor⧾ :an dhe-a 'o or-a' 'tele' dih-', 'de :on no-a :dhehehn-nyor⧾ 'do :Yusu' bo.

¹³:Yee' 'on 'worn wlu, mo-: 'wluh 'de Nyorsoa 'bli yai', mo-: 'da, 'An 'bhorn :on 'ye deh :daa 'chle. :Bhorlie' 'do nyor⧾ :on po-a :Gwlor :baa'-a' dhih dhih 'jeh-', 'de :on 'meh-a, :eh 'wluh-a dha 'zean' 'bli, 'de :eh mu-a 'dlu bo. :Yee' Nyorsoa-a' :Zulu 'da, Keen' deh 'jeh. :Bhorlie' 'do on bo. An mu :forn 'do 'yi :kma :koan: on no-a bo. Deh no-eh, :koan: on no-a, or-a' 'nyne zi 'o on klei' 'weh.

¹⁴:Yee' :yeh 'an pobo-a 'de :neheh', :yee' 'on 'ye yao-pli:, 'de nyor :dhe 'o en ken dih, or gweh 'yu an 'da-dih-a Nyor-kpalu-a' 'yu. 'De or 'dhu 'keen :gblaa' :or no-a 'goo 'dlu. 'De or 'ble :koo: :chehn-dih-jehn: :eh 'nma-a 'de or 'kwa.

¹⁵:Yee' 'enjor: :noror', or-: 'wluh 'de Nyorsoa-a' 'sla 'zorn, 'de or 'wor, or 'da 'de nyor-kpalu: :dao' bo, 'Duo: :an-a' 'jehn-' :on 'ye :koo chehn. Deh no-eh, :koo: :chehn-ti nyni 'o 'weh, 'de 'bluhba-a' klehkpeh 'vlu-' :naa.

¹⁶'De or no or-a'a: 'jehn :dao', or chehn 'bluhba: :eh gweh-a :ka nyor-a chehn-a 'vluu'-koo.

¹⁷:Yee' 'enjor: :noror', or-: 'wluh 'de Nyorsoa-a' 'sla :or :ne-a 'de or 'bli yai' 'zorn. 'De or 'ble deh⧾ :chehn-dih-jehn: :eh 'nma-a 'de or 'kwa.

¹⁸:Yee' 'enjor: :noror', :or :korn-a 'de neh-a' wlu bo, or-: 'wluh 'de deh an za-dih-a Nyorsoa-a' 'slaa ken bo. 'De or wele: 'de :yor 'ble-a 'nmaa'-jehn bo, or 'da, 'Duo: :an-a'a: 'jehn-' :on 'ye :koan ken 'kpa. Chehn 'glee-bi-a' klehkpeh :en :ne-a dha 'bluhba ken. Deh no-eh, en-' klehkpeh, en 'vlu-'.

¹⁹'De or no or-a'a: 'jehn :dao', or chehn 'glee-bi-a' klehkpeh :en :ne-a dha 'bluhba ken. 'De or po-ih 'de 'bie' :klaba' 'di, or 'ye-ih :za-dih:, :eh :nyna-a 'o Nyorsoa-a' 'chehn-yuba, 'gor bo dih.

²⁰'De on 'fean' 'glee-bi: :dao' 'do :gwlor worn 'i. 'De nyomor 'wluh 'de 'bie' :dao' 'di, or zi dih, or :na tluh⧾ 'bor⧾-a' :kehehn' 'sororn', or kpon-dih 'noror nyor :bhluun' 'worn.