Read Eastern Krahn Wlehvolesiehn' 15 Bible Online

Wlehvolesiehn' 15 - Eastern Krahn bible

Wlehvolesiehn' 15

¹:Yee' 'on 'ye nyor⧾ 'di dih 'ma-dih-deh: :kolu' :neheh' 'de yao. 'Enjor-nyor⧾ :meheh' 'sorn, mo-: 'ble 'kle 'ye-eh-a' 'dlu⧾ :meheh' 'sorn :yih 'bor-dih:-a 'o. Deh no-eh, 'do en bo, 'do :wor Nyorsoa-a' 'chehn :jla-dih:.

²:Yee' 'on 'ye deh, :eh gweh yobo' :or :no-dih-eh 'yela', 'de :or zian-dih:-a neh. 'De 'on 'ye :yuh :on du-a worn :kma-deh: :dao' :eh :korn-a 'nyne-a' 'nama :nyna-a 'o eh-a' 'gor bo dih-: 'dekorn: eh-a' 'yor-eh: on ma-a-: en-' tuh. Mo-: :nyna 'o yobo' :daa 'bhun dih, 'de on 'ble :dholo:⧾ Nyorsoa 'nyi-uh-a 'de on 'kwa.

³'De an ble 'duh :Mose' ble-a :or no-a Nyorsoa-a' 'bhoi-yu, 'dekorn: 'duh 'Blae'-yu ble-a :ke, 'de an no, :Gwlor :baa' Nyorsoa :or 'ble-a 'kpih-a' klehkpeh kwa, deh⧾-a' klehkpeh :an no-a, en 'beh-: 'i, 'de en 'ma-dih 'de nyor⧾ 'di dih. :Mor :or 'dhu-a 'keen-', :ka ti-a mu-a 'dlu-' :tehn, :an-a' kplen 'sleh-: 'i, 'de en se :bhuli' 'di :ne.

⁴Or-a' 'nyne, :or se 'beh-dih: :or 'ye :an-a' :fano ple :eh, :Gwlor :baa'? 'De mor :or se 'beh-dih: :or 'ye :an-a' 'nyne dhih-a' 'i 'beh-a' 'nyi :eh? Deh no-eh, :on :due', :mor :ne gban 'i 'klein'. 'De mor 'bluhba⧾-dlu⧾-a' klehkpeh, en mu 'de :yi, en 'ye :on :weheh' :za. Deh no-eh, :an-a' zabe: :zi-eh 'sleh-: 'i, 'de eh :to-dih-eh nyor⧾ 'i.

⁵:Yee' :yeh deh⧾ :daa en zi-a, :yee' 'on 'ye Nyorsoa-a' 'sla :or :ne-a 'de or 'bli yai', or kan-dih: worn, 'de :gbalie :eh :to-dih-eh 'Ezlea-nyor⧾ 'i :ka Nyorsoa :ne-a 'o on bo, eh :ne 'de 'sla :dao' 'zorn.

⁶:Yee' 'de or 'zorn :dao', 'do :wor 'enjor-nyor⧾ :meheh' 'sorn :dao', on 'wluh, 'de an ya 'de 'kle 'ye-dih-eh-a' 'dlu⧾ :meheh' 'sorn :dao'. On pa-' 'nena-ylii: :en :gweh-a :vlehehn'-', 'de :en fan-a. 'De wluh⧾ on bla-a 'gben-', en no 'goo.

⁷:Yee' 'kmo :ne-deh⧾ :nyieh :dao', en-' :due', eh-: 'nyi-uh 'koba:⧾ :en :ne-a :meheh' 'sorn, 'de :en no-a 'goo, Nyorsoa :or :ne-a 'kmo :ka ti-a mu-a 'dlu-' :tehn klehkpeh klehkpeh, or-a' 'chehn-yuba 'yi-a 'de 'di.

⁸'De Nyorsoa-a' dhih-a' 'i 'beh-a'-: 'dekorn: or-a' 'kpih-: me-: no-eh, 'de :daluh' 'yi 'de or-a' 'sla :dao' 'zorn dih. 'De nyor se 'beh-dih: or 'ye 'de or 'zorn pa, :mor 'kle 'ye-eh-a' 'dlu⧾ :meheh' 'sorn :daa, on :ya-a: 'de, en zi :weh.