Read Eastern Krahn Wlehvolesiehn' 16 Bible Online

Wlehvolesiehn' 16 - Eastern Krahn bible

Wlehvolesiehn' 16

¹:Yee' 'on 'worn wlu, mo-: 'wor, mo-: 'wluh 'de Nyorsoa-a' 'sla 'zorn, an wlu 'de 'enjor-nyor⧾ :meheh' 'sorn :dao' bo, on 'dae:, A mu, a 'ye 'koba⧾ :meheh' 'sorn :dao' Nyorsoa-a' 'chehn-yuba 'yi-a 'de 'di 'chehli: 'do 'bluhba ken.

²:Yeh wlu :dao', on no :ao', :yee' :zai' nor mu-', 'de or 'chehli: or-a'a: 'koba 'do 'bluhba ken. :Yee' nyor⧾ :dao' on 'dhu-dih:-a worn :kma-deh: :dao', eh-a' 'nyne yubo-da, 'de :an za-a eh-a' 'yor-eh: on ma-a :weheh', 'pa⧾-zon:⧾ :en puhba-a, me-: 'kpa 'o on 'bhun.

³:Yee' 'sororn' nor 'chehli: or-a'a: 'koba 'weh 'do yobo' worn. :Yee' yobo' :za-dih:-' 'de or gweh 'meheh'-nyor⧾-a' nyomor. 'De 'kmo :ne deh⧾-a' klehkpeh :en :ne-a 'o or worn, en 'meh.

⁴'De taan nor 'chehli: or-a'a: 'koba 'do 'ni⧾ :klaba'⧾ worn-: 'dekorn: 'ni⧾-a' 'dlu⧾-a' glu 'wluh 'da-:. :Yee' en-' klehkpeh no nyomor.

⁵:Yee' 'on 'worn 'enjor: :or :korn-a 'de 'ni⧾-a' wlu bo, or-: :wlu 'de Nyorsoa bo, or 'dae:, :Mor :or :ne-a gban 'i, :or :ne-a :chio'lo:, 'de :or :ne-a :naa, 'kle 'ye-eh-a' 'dlu⧾ :daa :on :ya-a: 'de dha 'bluhba ken, en :ne 'o :gwie 'i.

⁶Deh no-eh, :gwlor-nyor⧾ 'wla :an-a' nyor⧾-: 'dekorn: :an-a' wele-eh: :po-nyor⧾-: an-a' nyomor-: dih. Eh-: :korn dhih :on 'nyi-uh nyomor on 'ye 'na. Deh no-eh, on 'bhorn-eh-: dih.

⁷:Yee' 'on 'worn wlu, mo-: 'wluh 'o deh an za-dih-a Nyorsoa-a' 'slaa ken, mo-: 'da, :Gwlor :baa' Nyorsoa :or 'ble-a 'kpih-a' klehkpeh kwa, :an-a' zabe: :zi-eh 'sleh-: 'i, 'de eh se :bhuli' 'di :ne.

⁸:Yee' :nyieh nor 'chehli: or-a'a: 'koba 'weh 'de 'yluh ken. :Yee' 'yluh :kma 'i 'gabaa, eh :zi 'o dih, 'de an-a' neh-a sin-dih :gwlor-nyor⧾.

⁹'De an-a' yau gblor. Deh no-eh, 'yluh-a' :fuun' :kma 'i 'gabaa. 'De an 'jle-dih Nyorsoa :or 'ble-a 'kpih 'do 'kle 'ye-eh-a' 'dlu⧾ :meheh' 'sorn :daa 'dlu. 'De mor on :se-' an-a' deh⧾-zon⧾ dih 'tali:, on 'ye-or' dhih-a' 'i 'beh-a' 'nyi.

¹⁰:Yee' :mm' nor 'chehli: or-a'a: 'koba 'weh 'do worn :kma-deh: :dao', eh-a' 'keen :kpala' ken. :Yee' 'do :dha eh :korn-a wlu 'ken no :kule:. 'De :gwlor-nyor⧾-a nmu-a dih an-a' :meo⧾ dih. Deh no-eh, an 'ye an-a' 'jeh 'worn 'gabaa.

¹¹'De an 'jle-dih Nyorsoa :or :ne-a 'de yai', 'do an-a' 'pa⧾ :en puhba-a, en-' dhih bo. Jorwor: on :se-' an-a' deh⧾-zon⧾ dih 'tali: 'gboror:.

¹²:Yee' :meheh'lo nor 'chehli: or-a'a: 'koba 'weh 'do 'ni :klaba' an 'da-dih-a :Yufle'ti worn. 'De eh ma 'gbee', eh 'ye 'keen-boi' :on 'wluh-a 'de 'yluh-a' 'kwla 'wluh-dih: 'da :gwie 'nyi.

¹³:Yee' 'on 'ye 'kwla 'ye-dih-deh⧾ taan, me-: gweh :kpabor⧾, me-: 'wluh 'de dorsehn: :dao'-: worn :kma-deh: :dao'-: 'dekorn: sih 'tmo :wele-eh: :po-nyor-: 'worn.

¹⁴'Kulu-deh:⧾ :daa, en no 'kwla 'ye-dih-deh:⧾ :en no-a nyor⧾ 'di dih 'ma-dih-deh⧾. Me-: mu 'bluhba-a' klehkpeh ken dih, 'de en 'da 'keen-boi'-a' klehkpeh :on :ne-a dha 'bluhba ken :dha :due', on 'ye tuh vorn 'do 'we-eh: :klaba' Nyorsoa :or 'ble-a 'kpih-a' klehkpeh kwa, or mu-a nyor⧾-a' zabe :zi-dih: 'di.

¹⁵'De 'Klae :wlu, or 'dae:, A :gbee'e:. 'An mu 'de :yi :ka 'ylii'-nyor yi-a 'de. :Bhorlie' 'do nyor :dao' bo, :or fuo-a ti 'ken, 'de :or se-a 'nyinor-' :gweh-dih:, 'de :or dhe-a or-a'a: paa-tiei son ken, 'de :mor eh 'dhu-a deh-', or :ne-a' 'kpanua' :chehn, or :ne-a' 'noror :gwlor :gwea dih 'si.

¹⁶:Yeh 'Klae 'da :ao', :yee' 'on 'ye 'kwla 'ye-dih-deh:⧾ :dao', en po 'keen-boi'-a' klehkpeh :dha :due' 'do :dha nyor⧾-a 'da-dih-a 'Amageh'dor 'de :Hiblu'-wlu 'di.

¹⁷:Yee' :meheh' 'sorn nor 'chehli: or-a'a: 'koba 'weh 'de yao. :Yee' 'on 'worn wlu, mo-: 'wor, on 'wluh 'de 'keen :kpala' :or :ne-a 'de Nyorsoa-a' 'sla 'zorn bo, on 'dae:, Eh :jla 'dlu-' :weh.

¹⁸:Yee' dhehn-a chleh-' 'yli, 'de eh 'pona-' dih, 'de 'bluhba-a tleh 'gabaa. Nyorsoa no-a :gwlor-nyor :noo:, 'bluhba 'see :ao' tleh-a' no :zai'. 'Bluhba-a' tleh-a' :yor :dao', eh :zi 'o-: dih 'gabaa.

¹⁹'De 'kwi :gwlor :or ku-a dih, an 'da-dih-a 'Babe'lor, or 'kor, or 'klae: dih 'do kpor⧾ taan 'di. 'De 'kwi gwlor⧾-a' klehkpeh :en :ne-a dha 'bluhba ken, en blu. Nyorsoa :se-' 'Babe'lor: :dao' :or ku-a dih, or-a' 'kle 'ye-eh-a' 'dlu :po-eh-a' dhih bo 'ma-dih:. Eh-: :korn dhih, or 'nyi-or nomor :or :ne-a 'de 'korbuh 'di, :or :nyna-a 'o Nyorsoa-a' 'chehn-yuba-a' 'gor bo dih.

²⁰:Yee' 'ni-a' dubeh⧾-a' klehkpeh en 'ma-'. 'De tluh⧾-a' klehkpeh, en 'ma :ke.

²¹:Yee' :chehbe' :kpuan'⧾ :kolu'⧾ :en :korn-a kwa :ku-eh :ne :koo-blor-a' kwa :ku-eh 'beh-dih:-a, me-: 'wluh 'de yai', en 'kpa 'zorn 'do :gwlor-nyor⧾ ken. Jorwor: :gwlor-nyor⧾-a 'jle-dih Nyorsoa 'weh 'gboror: 'do :chehbe' :kpuan'⧾ :dao' :en 'ye-dih-uh-a 'kle bo. Deh no-eh, 'kle 'ye-eh: :dao', eh :kma worn 'gabaa.