Read Eastern Krahn Wlehvolesiehn' 17 Bible Online

Wlehvolesiehn' 17 - Eastern Krahn bible

Wlehvolesiehn' 17

¹:Yee' :yeh eh no :ao', :yee' 'enjor-nyor:⧾ :dao', :on 'ble-a 'koba⧾ :meheh' 'sorn, an-a' nyor :due', or-: yi 'o 'on bo, :or 'da, 'Yle, 'on 'ye :on 'kle 'ye-eh: Nyorsoa-a mu-a 'o :bhaa'-nynor: :klaba' 'dlu :po :torne:, :or :dhe-a dih, 'do 'ni⧾ :klaba'⧾ 'nyne bo. Or-: :nyna 'o 'kwi :gwlor :klaba' 'gor bo dih.

²'Keen-boi'-a' klehkpeh :on :ne-a dha 'bluhba ken, mo-: :ne or 'tmo. :Yee' :mor or :ne nyor⧾ :on :ne-a dha 'bluhba ken 'tmo, :yee' eh-a' nomor-: no-uh.

³:Yee' Nyorsoa-a' :Zulu :ne 'o 'on ken, 'de or-a' 'enjor: :dao', or kpa 'on 'de :bhehneh'-bluhba ken. 'De 'on 'ye 'nynor :due' or :dhe 'o worn :kma-deh :due' :eh :ne-a 'zoo ken dih. 'Nyne :dhulu' :en 'jle-dih-a Nyorsoa, me-: 'chle-eh: 'do eh-a' yau-a' klehkpeh 'bhun. Worn :kma-deh: :dao', eh 'ble 'dlu⧾ :meheh' 'sorn-: 'dekorn: 'gbon⧾ :bhue-:.

⁴'Nynor :dao', or pa-' 'ylii: :nmaa'e: :en :kpe-a gbor 'de :en :ne-a 'zoo, :en 'kpa-a deh ken. 'De or :bheh-dih: 'goo-: sobu'⧾ :en 'kpa-a deh ken-: 'dekorn: 'za⧾-kon:⧾ on no-a 'wla⧾-yor-' 'de :en 'kpa-a deh ken-:. 'De or 'ble 'korbuh :on no-a 'goo kwa :on :korn-a 'di nomor 'yi-a 'de 'di. Nomor :dao', or :nyna 'o or-a' dhen-deh:⧾ or no-a-: 'dekorn: or-a' 'tmeor:⧾ :korn-eh-: en-' 'gor bo dih.

⁵:Yee' 'do or 'yuba-sehn 'i, 'do :wor 'nyne :en :korn-a gbor :za-eh: 'zile:-a, en 'chle-eh:, :en no-a, 'Babe'lor-gwlor: :or ku-a dih. Or no :bhaa'-nynor⧾-a' klehkpeh 'de. 'De mor 'de or bo, 'do :wor gu-kplen: :no-eh-a' klehkpeh 'wluh.

⁶:Yee' 'on 'ye 'nynor :dao', 'de Nyorsoa-nyor:⧾ on 'dba-a :Yusu'-a' dhih, an-a' nyomor-a no-or, :on 'da :ka nomor-a no-a nyor⧾. :Yeh 'on 'ye-or, :yee' eh :florn-dih: 'on-: worn 'gabaa.

⁷Jorwor: 'enjor: :dao', or :wlu-' 'de 'on bo, or 'dae:, :Eh :florn-dih: :on worn :eh? 'An mu :on deh 'nynor-: 'dekorn: worn :kma-deh: :dao'-: :eh 'ble-a 'dlu⧾ :meheh' 'sorn-: 'dekorn: 'gbon⧾ :bhue-: or :dhe-a 'o ken dih, :eh kpa-or, en-' 'slan 'dhu-eh:-' :gwluhuh' zela:.

⁸Worn :kma-deh: :dao' :on 'ye-a, eh :ne-' 'kmo :dee'. Jorwor: eh 'meh-' :naa. Eh yi 'de 'bie' :dhorno' :dao' :eh se-a :sie: 'da :korn 'di 'wluh 'da :naa, 'de eh 'ye mu, eh 'ye gbe :zie:. :Yee' nyor⧾ :on 'ti-a dha 'bluhba ken, :on :korn-a 'nyne se-a 'chle-eh: 'de 'kmo :sie: :febeh'-chlee-deh 'di, 'de jorwor: Nyorsoa-a mu-a 'bluhba :no, eh mu an-a' klehkpeh worn :florn-dih:, :mor on 'ye-eh. Deh no-eh, eh :ne-' 'kmo :dee', 'de eh 'meh, 'de eh yi de :yi 'da :neheh'.

⁹Eh 'worn nyor :or 'ble-a :toror', or-: 'beh-dih: or 'ye deh :daa dih 'worn. 'Dlu⧾ :meheh' 'sorn :dao', me-: :nyna 'o tluh⧾ :meheh' 'sorn :en 'nynor :dhe-a 'o ken dih, :en :bleh-dih:-a 'keen-boi' :meheh' 'sorn 'i :ke.

¹⁰On :mm', mo-: 'meh, 'de :due' :korn nyor⧾ wlu 'ken :naa. :Yee' eh :sie: 'o :due', or-: 'see 'de yi. :Mor or 'yle, or mu nyor⧾ wlu 'ken :korn 'do ti-kpor-bei 'di 'klein'.

¹¹Jorwor: worn :kma-deh: :dao' :eh :ne-a 'kmo :dee', 'de :eh 'meh-a :naa, eh no 'keen-boi' :meheh' 'sorn :dao', an-a' nyor :due', jorwor: eh mu-' :sorn, eh 'ye 'kmo :ne :neheh', 'de eh 'ye 'de 'keen-boi' :dao', an-a' nyor⧾ :na-dih-eh-a' kpor⧾ :meheh' na neh gweh. 'De eh mu :mu eh 'ye gbe :zie-dih-eh: :ke.

¹²:Yee' 'gbon⧾ :bhue: :dao' :on 'ye-a, en :nyna 'o nyor⧾ :bhue 'gor bo dih, :an mu-a 'keen :no 'de ybei'. 'Keen-boi' :bhue: :dao', 'kpih-a mu-uh 'nyi-eh: mo-: worn :kma-deh-: on 'ye nyor⧾ wlu 'ken :korn, 'do 'yluh-buh :due' 'di.

¹³'Keen-boi' :bhue: :dao', an-a' klehkpeh, an mu deh :due' ken dih 'worn-dih:, 'de on 'ye an-a' 'kpih 'kwla :za, on 'ye-ih' worn :kma-deh: :dao' 'nyi.

¹⁴:Yee' worn :kma-deh: :dao'-: 'dekorn: 'keen-boi' :bhue: :dao'-: an mu 'Blae'-yu tuh bo :kpa. Jorwor: or-: 'dekorn: nyor⧾ :on zi-a 'o or klei'-: an mu-uh :du. Deh no-eh, or-: no :Gwlor :baa' 'do :gwlor :bai'-a' klehkpeh bo. 'De or no 'Keen 'do 'keen-boi'-a' klehkpeh bo. 'De nyor⧾ or-a' 'jeh 'yor-eh gan-a, 'de or 'da-a, mo-: zi 'o or klei', 'de on no :dhehehn-nyor⧾ 'do or bo.

¹⁵'De 'enjor: :dao', or :wlu 'de 'on bo, or 'dae:, 'Ni⧾ :klaba'⧾ :dao' :on 'ye-a, :en :korn-a 'nyne bo :bhaa'-nynor: :dao', or :dhe-a dih, en :nyna 'o nyor⧾ :doru' :on 'wluh-a 'dawor'⧾-dlu⧾-: 'bluhba⧾-dlu⧾-: 'dekorn: wlu⧾ 'doror: 'dor :po-nyor⧾-: 'di dih, an-a' 'gor bo dih.

¹⁶'De 'gbon⧾ :bhue: :dao' :on 'ye-a-: 'dekorn: worn :kma-deh: :dao'-: en mu :bhaa'-nynor: :dao' 'nyeh-:. Deh⧾-a' klehkpeh or 'ble-a, an mu-ih or 'kwa :za, 'de or 'ye 'kpanua' :chehn. An mu or-a' 'pla⧾ :di, 'de on 'ye-or 'yli po.

¹⁷Deh no-eh, Nyorsoa :oo', or-: po-eh 'o on :porluh⧾ ken, on 'ye deh Nyorsoa 'bhorn-a no. Eh-: :korn dhih 'keen-boi' :dao', on 'worn-dih-eh ken dih, on 'ye an-a' nyor⧾ wlu 'ken :korn-eh-a' 'kpih worn :kma-deh: :dao' 'nyi. An mu 'o eh-a' 'tele' dih :dhe :dhee: :chio'lo: 'de Nyorsoa-a' wlu⧾-a' klehkpeh 'ye dhih 'jeh-' 'kpa.

¹⁸:Yee' 'nynor :dao' :on 'ye-a, or-: :nyna 'o 'kwi :gwlor :klaba' :or ku-a dih, 'de :or :korn-a 'bluhba:⧾ :en :ne-a dha yao 'zorn wlu 'ken 'gor bo dih.