Read Eastern Krahn Wlehvolesiehn' 18 Bible Online

Wlehvolesiehn' 18 - Eastern Krahn bible

Wlehvolesiehn' 18

¹:Yee' :yeh deh⧾ :daa en zi-a, :yee' 'on 'ye 'enjor: :noror', :or :ne-a 'de Nyorsoa 'bli yai', or-: 'dhle, :or yi 'bluhbor. Or 'ble 'kpih :klaba'⧾. 'De dhih-a' 'i 'beh-a' or 'ble-a, or-: no-eh, 'de dha 'bluhba ken-a 'ye-dih.

²'De or 'wor-dih: or-a' dhih-a' 'i 'beh-wlu: :dao', or 'da, 'Babe'lor-gwlor: :dao' :or ku-a dih, or blu-', :gwloru:. 'Kwla 'ye-dih-deh:⧾ 'doror: 'dor-: neme: Nyorsoa 'nyeh-a, 'de :en no-eh, 'de nyor⧾-a ne-a :kane' dih-: deh⧾-a' klehkpeh :daa, me-: 'ti 'de or 'di :naa.

³Deh no-eh, 'bluhba⧾-dlu⧾-a' klehkpeh, on 'na or-a' 'tmeor:⧾ :korn-eh-a' 'yi :kma-nomor. 'Keen-boi'-a' klehkpeh :on :ne-a dha 'bluhba ken, mo-: :ne or 'tmo. 'De 'doror' :po-nyor⧾-a' klehkpeh :on :ne-a dha 'bluhba ken, on :bhan-dih: or-a' 'tmeor:⧾ :korn-eh: :eh :zi-a 'o dih, 'zorn.

⁴:Yee' 'on 'worn wlu :noo', mo-: 'wluh 'de Nyorsoa 'bli yai', mo-: 'da, A 'wluh 'o :gwlor :dao' 'di, a :mor :or 'dhu-a 'an-a: nyor⧾-', 'de a :ne-' deh⧾-zon:⧾ or no-a son 'di po, 'de a :ne-' 'for 'ble, 'do 'kle 'ye-eh: :doru' Nyorsoa-a mu-a 'o or 'dlu :po 'di.

⁵Deh no-eh, deh⧾-zon:⧾ or no-a, en dhele: 'dlu :dhelee: 'de en :ne 'wluh dha 'bluhba ken, mu 'de Nyorsoa 'bli yai' :tehn-dih:. 'De Nyorsoa :se-' deh⧾-zon:⧾ or no-a, en-' dhih bo 'ma-dih: i.

⁶Deh⧾ or no-a 'do or 'bei' 'bhun, me-: a 'ye no, 'do or 'bhun :ke. Deh⧾ or no-a, me-: :korn kpor⧾ 'sororn', a 'ye-or' geli' :za-dih:. 'Yi :kma-nomor or 'nyi-a or 'bei', or-: a 'ye-eh' no, or-a' 'yi :kma-eh 'ye kpor⧾ 'sororn' no, a 'ye-or' 'nyi :ke.

⁷:Yee' :ka or 'nyi-a or-a' 'jeh dhih-a' 'i 'beh-a'-: 'dekorn: deh 'worn :di-dih-eh-: :yee' a no-eh, or 'ye or-a' 'jeh worn 'ye, or 'ye 'kle 'ye 'gabaa, en :ne or-a' dhih-a' 'i 'beh-a'-: 'dekorn: deh 'worn :di-dih-eh-: en 'ye 'beh-dih:. Deh no-eh, or po or-a' 'jeh dhih bo 'do ti-a' klehkpeh bo 'de or 'di, or no, 'Mor 'keen :nynor 'o, :or :dhe dih 'do 'keen :kpala' ken. 'On :se :dhoba: 'nynor. 'De mor :ka :dhoba: 'nynor-deh :ne-a worn, 'on :se-eh' worn 'ye-: i.

⁸:Yee' 'do eh-a' dha, 'kle 'ye-eh: :doru' :eh :dhe-dih-eh 'for 'i, 'do or bo, eh mu-or :kpon 'do 'we-eh :due' 'di. 'Weh⧾-: 'zlu-a'-: 'moeh: :eh 'kpa-a Ji Kou'-moeh-: me-: mu-or :no. Neh, eh-: mu-or ya :gweh. Deh no-eh, :Gwlor :baa' Nyorsoa :or chehn-a or-a' zabe 'i, or-a' dhih 'beh-: 'i.

⁹:Yee' 'keen-boi' :on :ne or 'tmo-a, 'de :on :ne or di-dih-a deh 'worn :dha :due', an mu 'vin-: 'de on 'ye 'zlu, 'do :gwlor :dao' or-a' dhih bo, :mor on 'ye neh :eh po-or 'yli, eh-a' :daluh'.

¹⁰An mu-or bo dih :tehn-dih:, 'de on 'ye 'de pobo:. Deh no-eh, an ple :fano: on :ne-' 'kle 'ye-dih-eh: :ke. 'De an no, Eh no :wehlih-deh:, eh no :wehlih-deh:, 'do :mor 'Babe'lor-gwlor: :daa, :or ku-a dih bo :or 'ble-a 'kpih :dee'. 'Yli :a bla-a 'i, :on :po-eh: 'kle 'ye-eh: 'dlu.

¹¹:Yee' 'doror' :po-nyor:⧾ :on :ne-a dha 'bluhba ken :ke, an mu 'vin-: 'de on 'ye 'zlu 'do or-a' dhih bo. Deh no-eh, nyor-a' dhen an-a'a: ploo-deh⧾ :neheh',

¹²:en 'dhu-a 'goo-: 'sebla-: sobu'⧾ :en 'kpa-a deh ken-: 'za⧾-kon:⧾ on no-a 'wla⧾-yor-' 'de :en 'kpa-a deh ken-: 'nena-ylii: :nmaa'e-: 'ylii: :nmaa'e: :en 'kpa-a deh ken-: :yih :en :kpe-a gbor-: :yih :en :ne-a 'zoo-: 'dekorn: 'sleke-ylii-: tu⧾ 'doror: 'dor, :en :korn-a 'ye-a' :kma 'i-: deh⧾ 'dor :dor 'dor on :no-dih:-a dor-nyne-: :yih on :no-dih:-a tu⧾ :en 'kpa-a deh ken 'gabaa-: :yih on 'wla-a :dhiin 'de on no-a-: :yih on :no-dih:-a nene-: 'dekorn: :yih on :no-dih:-a sobu'⧾ :en 'kpa-a deh ken an 'da-dih-a 'mabor-:

¹³'dekorn: ploo-deh:⧾ :nee' :en 'dhu-a, 'chlan an 'da-dih-a 'sinamo-: :pofi'orn-: deh⧾ :mor nyor⧾ po-a 'yli, 'de :en po-a 'no 'jeh no-: :pofi'orn: an 'da-dih-a 'mina-: 'yli :po-deh:⧾ :nee' an 'da-dih-a 'flehnkensehn-: nomor-: 'chlan nyor⧾-a di-a-: 'flawa: :bhebe'-: 'dekorn: deh⧾-yor: an 'da-dih-a 'wii-: :blii'⧾-: 'blae'⧾-: :soo'o⧾-: 'dekorn: deh⧾ :soo'o⧾-a jli-a-: 'dekorn: 'ge-nynuu-:.

¹⁴:Yee' 'doror' :po-nyor:⧾ :dao', on 'dae: 'de 'Babe'lor-gwlor: :dao' bo, Deh⧾ :dhulu' :nmaa'e: :an-a' :porluh-a 'bhorn-a :on 'ye-a' :korn, en-' klehkpeh 'ma-'. :An-a' worn :nmor-deh: :di-eh-: 'dekorn: bhan-a'-: en-' klehkpeh 'ma-', 'de mor :on :se-ih' 'ye-: i :neheh'.

¹⁵:Yee' 'doror' :po-nyor:⧾ :on po-a 'doror' 'do :gwlor :dao' 'di, 'de :on :bhan-dih-eh 'zorn, an mu-or bo dih :tehn-dih:, 'de on 'ye 'de pobo:. Deh no-eh, an ple :fano: on :ne-' 'kle 'ye-dih-eh: :ke. An mu 'vin-:, 'de on 'ye 'zlu,

¹⁶'de on 'ye :ao', Eh no :wehlih-deh:, eh no :wehlih-deh:, 'do 'kwi :gwlor :daa :or ku-a dih bo, :or :bheh-dih:-a 'nena-ylii: :nmaa'e-: 'ylii: :nmaa'e: :en 'kpa-a deh ken-: :yih :en :kpe-a gbor-: 'dekorn: :yih :en :ne-a 'zoo-: 'de :or :bheh-dih:-a 'goo-: sobu'⧾ :en 'kpa-a deh ken-: 'dekorn: 'za⧾-kon:⧾ on no-a 'wla⧾-yor-', 'de :en 'kpa-a deh ken-:.

¹⁷'Do 'yluh-buh :due' 'di, or 'ma-dih: or-a' bhan-a' deh⧾-a' klehkpeh 'weh. :Yee' 'do ti :dao' 'i, 'ni ken-meheh⧾-a' :janbe-a' klehkpeh-: nyor⧾ en kpa-: nyor⧾ :yuh :an no-dih-ih-a :koan bo-: 'dekorn: nyor⧾-a' klehkpeh :an no-a :koan 'do yobo' worn, 'de :an 'ye-a dii-deh-: an-a' klehkpeh, an mu-or bo dih :tehn-dih:, 'de on 'ye 'de pobo:.

¹⁸:Mor on 'ye neh :eh po-or 'yli, eh-a' :daluh', :yee' an mu 'geh⧾ :po, an mu :ao', 'Kwi :gwlor :yoror nyor 'beh-dih: or 'ye 'kwi :gwlor :daa, :or ku-a dih, 'i :po-dih: :eh?

¹⁹:Yee' an mu :bhuhbuh'-' dih :sue-dih:, on 'ye 'vin, 'de on 'ye 'zlu. 'De on 'ye 'geh⧾ po, on 'ye :ao', Eh no :wehlih-deh:, eh no :wehlih-deh:, 'do 'kwi :gwlor :klaba' :dao' bo. Or-a' bhan-a' or 'ble-a, or-: :bhan-dih: nyor⧾-a' klehkpeh :on 'ble-a 'ni ken-meheh⧾ :dee' 'do yobo' worn. 'Do 'yluh-buh :due' 'di, deh⧾-a' klehkpeh or 'ble-a, en 'ma-'.

²⁰:Yee' eh-a' dhih, a :mor :or :ne-a 'de Nyorsoa 'bli yai', a :no-dih-or 'mona ken dih. :Yee' a :mor Nyorsoa-nyor⧾-: :Yusu'-a'a: dboo-nyor⧾-: 'dekorn: Nyorsoa-a' wele-eh: :po-nyor⧾-: a no 'mona :ke. Deh no-eh, Nyorsoa chehn :gwlor :dao' or-a' zabe 'i, 'do deh or no-a 'do a 'bhun, eh-a' dhih bo.

²¹:Yee' 'enjor-nyor:⧾ :on 'ble-a dhih-a' 'i 'beh-kpih, an-a' nyor :due', or-: 'duo: sobu' :on 'beh-a 'i, 'de :on :ku-a kwa 'gabaa. Mo-: or 'vile: 'do yobo' worn, 'de or 'da, 'Ka-: :mor 'Babe'lor-gwlor: :daa, :or ku-a dih, :an mu blu-a' :no, :gwloru:, 'de mor :on :se-' 'ye-eh: i :neheh'.

²²'Babe'lor-gwlor: :daa, nyor :se-' :an-a' blaa-deh⧾-a' :dhlumeh' 'worn-: i :neheh' 'do :an-a' 'kpa⧾ :gwie⧾ bo dih, :en 'dhu-a :dholo⧾-: blee-nyor⧾-: 'solo' :wope'⧾-: 'dekorn: :gamu⧾-:. :An-a' 'sleh :korn-nyor⧾-a' klehkpeh :se-' 'ye-eh: i :neheh' 'de :on 'di. Nyor :se-' 'sun-: 'dekorn: :dhobo-: en-' wlu 'worn-: i :neheh'.

²³'De mor 'nape⧾-a' neh :se-' :wan i 'de :on 'di :neheh'. 'De mor 'nynor nyina: :kpa-gor :se 'de :on 'di :ne i :neheh'. :An-a' 'doror' :po-nyor⧾ :wor 'dhu 'doror' :po-nyor:⧾ :klaba'⧾-' dha 'bluhba-a' klehkpeh ken :dee'. :An-a' gu :po-eh:, eh-: :on no, 'de :on :bo-dih: 'bluhba-a' klehkpeh dih :dee'.

²⁴:Yee' Nyorsoa-a' wele-eh: :po-nyor⧾-a' klehkpeh-: Nyorsoa-nyor⧾-a' klehkpeh-: 'dekorn: nyor⧾-a' klehkpeh :on 'dba-eh dha yao zorn-: 'Babe'lor-gwlor: :daa, or-: an mu dih :kpon 'do an-a' 'meh-a' dhih bo.