Read Eastern Krahn Wlehvolesiehn' 19 Bible Online

Wlehvolesiehn' 19 - Eastern Krahn bible

Wlehvolesiehn' 19

¹:Yee' :yeh deh⧾ :daa en zi-a, :yee' 'on 'worn 'geh⧾, 'de Nyorsoa 'bli yai', :en gweh-a :ka :gwlor-nyor:⧾ :doru'-a po-a 'geh⧾, an no, A po Nyorsoa-a' 'nyne ya, :or no-a :a-a' 'puh-dih-nyor. Dhih-a' 'i 'beh-a'-: 'dekorn: 'kpih-: en :korn 'de or bo.

²Deh no-eh, or-a' zabe: :zi-eh 'sleh-: 'i, 'de eh se :bhuli' 'di :ne. Or chehn :bhaa'-nynor: :klaba' :dao', or-a' zabe 'i 'weh, :or 'kor-dih:-a 'bluhba-a' klehkpeh 'do or-a' 'tmeor:⧾ :korn-eh bo. Nyorsoa po-or 'kle 'ye-eh: 'dlu, deh no-eh, or 'dba Nyorsoa-a' 'bhoi-nynuu:.

³:Yee' an po 'geh⧾ :neheh', an no, A po Nyorsoa-a' 'nyne ya. Neh :eh po-a 'Babe'lor-gwlor 'yli, eh-a' :daluh'-a mu yai' :mu :muu: :ka ti-a mu-a 'dlu-' :tehn klehkpeh klehkpeh.

⁴:Yee' nyor⧾ :klaba'⧾-a' :kwlaa 'sororn' 'yor :nyieh-: 'dekorn: 'kmo :ne-deh⧾ :nyieh :dao'-: on 'jli-: dih 'do Nyorsoa :or :dhe-a dih 'do 'keen :kpala' ken, 'zorn, 'de an za-or :weheh'. 'De an no, 'Ka-: eh 'ye :ne. A po Nyorsoa-a' 'nyne ya.

⁵:Yee' wlu, mo-: 'wluh 'de 'keen :kpala' :dao' bo, :on 'da, A po :a-a' Nyorsoa-a' 'nyne ya, a :mor :or 'dhu-a or-a' 'bhoi-nynuu, :or :korn-a or-a' :fano-a ple-a, a :mor :or 'dhu-a 'nyne :korn-nyor⧾-: 'dekorn: :yuh nyor⧾ se-a yubo:-:.

⁶:Yee' 'on 'worn wlu⧾ :en gweh-a :gwlor-nyor:⧾ :doru'-a' wlu⧾ :en gweh-a :ka 'ni-a wla-a, 'de :eh gweh-a :ka dhehn-a 'pona-' dih 'gabaa, me-: :an no, A po Nyorsoa-a' 'nyne ya. Deh no-eh, :a-a' :Gwlor :baa' Nyorsoa :or 'ble-a 'kpih-a' klehkpeh kwa, or-: no 'keen :or :korn nyor⧾ wlu 'ken.

⁷A 'nyi :a no 'mona, :a 'ye dele:. A 'nyi-or dhih-a' 'i 'beh-a'. Deh no-eh, 'Blae'-yu-a'a: 'nynor nyina: :ya-ti nyni 'o :weh. 'De 'nynor :or mu-or 'bli 'ti-:, or po or-a' 'jeh-: 'kpa, 'de or :ne buh⧾ ken :naa.

⁸Nyorsoa 'nyi 'nynor :dao' 'nena-ylii: :nmaa'e: :en :gweh-a :vlehehn'-', 'de :en fan-a, or 'ye pa. ('Nena-ylii: :nmaa'e: :dao', me-: :nyna 'o Nyorsoa-nyor⧾-a' noo-deh:⧾ 'jeh on no-a, 'gor bo dih.)

⁹:Yee' 'enjor: :dao', or zela: 'on :gwluhuh', or 'da, 'Chle wlu⧾ :daa :an mu-a 'worn-:, :Bhorlie' 'do nyor⧾ :yuh :on 'da-eh 'do 'Blae'-yu-a'a: 'nynor nyina: :ya-gor: :daa 'di, 'de :on 'ye-a or-a' 'gwie-deh di. 'De or 'dae: 'de 'on bo :neheh', Deh⧾ :daa Nyorsoa :za-a-', en no dhih-a' 'yor-eh:.

¹⁰:Yeh or 'da :ao', :yee' 'on 'jli-: dih 'do or 'zorn, 'on 'ye-or :weheh' :za. Jorwor: or :wlu-' 'de 'on bo, or 'da, 'Bor, :an-a' :no-' :ao'. :Ka :on no-a, 'de :on no-a 'bhoi-yu, 'ka-: 'on :ne :ke, :korn mor :an-a' 'Klae :de-di'-boi' :on kpon-a dhih-a' 'yor-eh dih :en :Yusu' :to-dih-uh-a 'i. Nyorsoa, or-: :on 'ye :weheh' :za. Deh no-eh, dhih-a' 'yor-eh: :Yusu' :to-dih: :a 'i, me-: 'o :en 'nyi Nyorsoa-a' wele-eh: :po-nyor⧾ 'kpih, on 'ye or-a' tubo-wlu⧾ po.

¹¹:Yee' 'on 'ye 'de Nyorsoa 'bli yai', 'de kan-dih: worn, 'de 'on 'ye :soo'o-plu: 'de mor. 'De 'yu :due' :dhe 'o or ken dih, or-a' 'nyne :wor :Dhehehn-nyor-: 'dekorn: Dhih-a' 'yor-eh-:. Or-a' zabe: :zi-eh 'sleh-: 'i, 'de or-a' tuh :vorn-eh 'sleh 'i :ke.

¹²Or-a' 'yli-a wan-a' gweh neh. 'De or 'dhu 'keen :gblaa'⧾ :dhulu' 'dlu. 'De or 'ble 'nyne, me-: 'chle-eh: 'do or ken, :en nyor se-a yubo:. Jorwor: or :due', or-: yubo-ih.

¹³:Gba 'vuu or pa-', on no nyomor-a' 'bleh 'bleh. :Yee' 'nyne an 'da-dih-or, me-: 'dhu Nyorsoa-a' wlu-'.

¹⁴:Yee' sorye' :dhulu' :on :ne-a 'de Nyorsoa 'bli yai', on pa-' 'nena-ylii: :nmaa'e: :en :gweh-a :vlehehn'-', 'de :en :ne-a 'pu-'. 'De on :dhe 'o :soo'o⧾-plu⧾ ken dih. An zi 'o or klei'.

¹⁵:Bhla 'jlehn :eh 'nma-a, eh-: 'wluh 'de or 'worn, eh-: or mu :no, or 'ye 'bluhba⧾-dlu⧾ du. Nene-eh-dhun:, mo-: or mu :no, or 'ye-uh' wlu 'ken :korn. Or mu-uh' 'fean'-: :eh gweh-a :ka nyor-a :or 'fean'-a 'glee-bi-', deh no-eh, Nyorsoa :or 'ble-a 'kpih-a' klehkpeh kwa, or-a' 'chehn-yuba 'bili: 'de on bo.

¹⁶:Yee' 'do or-a'a: :gba 'vuu 'bhun-: 'dekorn: 'do or-a' 'porno 'bhun-: 'do :wor 'nyne 'chle-dih-eh: :en no-a, 'keen-boi'-a' klehkpeh, an-a' 'Keen, 'dekorn: :gwlor :bai'-a' klehkpeh, an-a' :Gwlor :baa'-:.

¹⁷:Yee' 'on 'ye 'enjor :due', or-: :nyna 'o 'yluh ken dih. 'De or 'wor, or wele: neme-a' klehkpeh :en wan-a 'de yai' :dha :dhorno', or 'da, A 'yle, a 'ye :dha :due' 'kpa, 'do 'gor :klaba' Nyorsoa 'da-a bo o.

¹⁸A 'yle, a 'ye 'keen-boi'-a' 'meheh'-kwia di, :janbe-boi'-a' ne-: 'kpih 'ble-nyor⧾-a' ne-: :soo'⧾-a' ne-: 'dekorn: nyor⧾ :an na-dih-ih-a, an-a' ne-: nyor⧾-a' klehkpeh, an-a' ne-: :on 'dhu-a 'ge-nynuu-: 'dekorn: :yuh :se-a 'ge-nynuu-: 'nyne :korn-nyor⧾-: 'dekorn: :yuh nyor⧾ se-a yubo:-: a 'yle, a 'ye an-a' klehkpeh-a' 'meheh'-kwia di o.

¹⁹:Yee' 'on 'ye worn :kma-deh: :dao'-: 'dekorn: 'keen-boi' :on :ne-a dha 'bluhba ken-: mo-: an-a'a: sorye'-: on 'kpa :dha :due', on 'ye 'yu :or :dhe-a 'o :soo'o-plu: :dao' ken dih-: 'dekorn: or-a'a: sorye'-: bo vorn.

²⁰'De tuh kpon worn :kma-deh: :dao'-: 'dekorn: sih 'tmo :wele-eh: :po-nyor: :or no-a nyor⧾ 'di dih 'ma-dih-deh⧾, 'do eh-a' dhih bo. Me-: 'o or no, 'de or :bo-dih: nyor⧾ :on worn :kma-deh 'dhu-a yubo-da-: 'dekorn: :yuh :on :za-a, eh-a' 'yor-eh: on ma-a :weheh'-:. Sih 'tmo :wele-eh: :po-nyor: :dao'-: 'dekorn: worn :kma-deh: :dao'-: an-a' klehkpeh :po-eh: 'de neh-pehnu worn :dha neh-sobu'⧾-a sin-dih-a.

²¹:Yee' 'yu :or :dhe-a 'o :soo'o: :dao' ken dih, :bhla 'jlehn :eh 'wluh-a 'de or 'worn, eh-: or no, 'de or 'dba sorye' :yuh :sie:-a 'o, 'de neme-a' klehkpeh, en di an-a' 'meheh'-kwia :di :dii:, 'de en-' 'kwli⧾ :ne 'zoo.