Read Eastern Krahn Wlehvolesiehn' 2 Bible Online

Wlehvolesiehn' 2 - Eastern Krahn bible

Wlehvolesiehn' 2

¹:Yee' 'yu :dao', or kpa or-a' wlu 'dlu bo 'gboror:, or 'dae:, 'An 'bhorn :on 'ye wlu⧾ :daa 'chle, 'de 'enjor: :or :korn-a 'de 'chore :eh :ne-a 'de 'Ehfesor bo, :on 'dae:, Tubo-wlu:⧾ :en 'wluh-a 'de 'yu :or 'ble-a 'chuh :dhlaen :meheh' 'sorn 'de or-a' :dila-son 'kwa, 'de :or na-a 'de 'nape⧾ :meheh' 'sorn 'nyne-' bo dih, me-: :dhe dih.

²'On yubo: a-a' noo-deh⧾ 'weh. 'On yubo: :ka a no-a :koan-a' no-a' 'weh 'gabaa, 'de a kpon-a a-a' :porluh⧾ dih, a se-a sea 'do 'kle 'ye-dih-eh: on 'ye-dih: a-uh 'di. 'On yubo-eh' :ka a se-a nyor⧾ :an no-a deh⧾-zon⧾, an-a' dhih ken dih 'worn-dih: klehkpeh klehkpeh. 'De a 'dhen-a nyor⧾ :an 'da-dih-a an-a' 'jeh :Yusu'-a'a: dboo-nyor⧾, 'de a yubo-eh 'i :ka on :se-a or-a'a: dboo-nyor⧾ 'jeh.

³'On yubo-eh' :ka a kpon-a a-a' :porluh⧾ dih, 'de a 'ye-a 'kle 'do 'an dhih bo, 'de a se-a sea.

⁴Jorwor: deh-beh: 'on se-a-' :ybeh 'do a 'bhun, eh-: :dhe dih, :ka a no-a 'an :ybeh-a' :zai', a-a' 'worn, a-a' no-eh :neheh'.

⁵'An 'bhorn :ka a no-a 'an :ybeh-a' :zai', a 'ye eh-a' dhih :gwluhuh' dih :na-dih:. A 'tali: a-a' deh⧾-zon⧾ dih, a 'ye noo-deh:⧾ a no-a :zai' no. :Mor a se-eh no, 'an mu 'de a bo :yi, 'de 'on 'ye a-a'a: 'nape a-uh 'zorn :za.

⁶Jorwor: deh a no-a, 'de 'on po-a a dhih bo, eh-: :dhe dih. A 'nyeh deh⧾ nyor⧾ :an zi-a 'o 'Nakorlor klei' an no-a 'weh, 'ka-: 'an 'jeh, 'on no :ke, 'on 'nyeh-ih' 'weh.

⁷:Yee' nyor :or 'ble-a :dou'⧾, 'nyi or :to deh⧾ :daa :dou'⧾ bo, :yih Nyorsoa-a' :Zulu-a za-a-' 'de 'chore-nyor⧾ bo. :Yee' nyor :or du-a 'ku-a' tuh, 'an mu-or 'tele' 'nyi-: or 'ye tu :an 'nyi-a nyor⧾ :febeh', an-a' 'buo' di, :on :ne-a 'de Nyorsoa-a' 'dhuu'-deh⧾ 'nyne-'.

⁸'An 'bhorn :on 'ye wlu⧾ :daa 'chle, 'de 'enjor: :or :korn-a 'de 'chore :eh :ne-a 'de :Simo'na bo, :on 'dae:, Tubo-wlu:⧾ :en 'wluh-a 'de 'yu :or 'dhu-a eh-a' glu 'dhu 'da-: 'dekorn: eh-a' 'dlu-' :jla 'da-: :or 'meh-a :dee', 'de :or :ne-a 'kmo :naa bo, me-: :dhe dih.

⁹'On yubo: deh⧾ :en 'ye-dih a 'kle 'weh. 'De 'on yubo-eh :ka a se-a deh-a' :za-da 'ble. Jorwor: a no bhaan-nyor:⧾, 'de Nyorsoa-a' deh 'i yubo: ka 'di. 'On yubo-eh' :ka nyor⧾ :an 'da-dih-a an-a' 'jeh :Jueh'-nyor⧾ Nyorsoa gan-a, jorwor: on :se :yuh or gan-a, an za-dih a 'kulu-deh⧾ 'bhun dih. On no :dha :due' 'kpa-nyor:⧾ 'do 'ku-a' nyor⧾-a' 'gbon-dih: 'da.

¹⁰:Fano-a' :no-' a-uh 'do 'kle a yi-a 'ye 'da bo. A :gbee'e:. 'Ku-a mu-eh :no, a-a' :noo' 'ye 'de :kasue 'di :po-eh:, on 'ye a 'dhen. Nyor⧾-a mu a 'kle 'ye-dih: 'do 'we :bhue 'di. Eh-a' :yeh 'da a-a' 'meh-a', a po 'an dhih dhih 'jeh-' 'gboror:. :Yee' 'an mu a 'kmo :sie: :febeh'-a' :gblaa' geli' :za-dih:.

¹¹:Yee' nyor :or 'ble-a :dou'⧾, 'nyi or :to deh⧾ :daa :dou'⧾ bo, :yih Nyorsoa-a' :Zulu-a za-a-' 'de 'chore-nyor⧾ bo. :Yee' nyor :or du-a 'ku-a' tuh, or :se 'de 'ku 'bli-neh-' :po-eh: i, :eh 'dhu-a 'meh-a' 'sororn' nor-'.

¹²'An 'bhorn :on 'ye wlu⧾ :daa 'chle, 'de 'enjor: :or :korn-a 'de 'chore :eh :ne-a 'de 'Pehkama bo, :on 'dae:, Tubo-wlu:⧾ :en 'wluh-a 'de 'yu :or 'ble-a :bhla 'jlehn :eh 'nma-a, :eh 'ble-a worn⧾ 'sororn' bo, me-: :dhe dih.

¹³'On yubo-eh' :ka :gwlor a 'ti-a 'di, eh 'dhu-a 'de or 'di-', 'ku-a' 'keen :kpala' an dhe-a 'di dih, or :ne-a. A no :dhehehn-nyor:⧾ 'do 'on bo, 'de a :se-' 'an dhih 'jeh-' :po-eh dih 'tali: 'do ti on 'dba-dih:-a 'Antipa :sloror', :or no-a :dhehehn-nyor 'do 'an tubo-wlu:⧾ :po 'da, 'do :dha 'ku 'ti-a.

¹⁴Jorwor: deh⧾-kpor-bei: 'on se-a-' :ybeh 'do a 'bhun, me-: :dhe dih. Nyor⧾ :noo', mo-: :ne 'de a 'nyne-', mo-: :an zi 'o 'Benor-a' nyor⧾ deh :torne-eh klei', :or :torne:-a 'Keen 'Bela :ka or 'ye-a' no, 'de or 'ye-a' 'Ezlea-nyor⧾ 'de deh⧾-zon:⧾ :no-eh 'di po, 'de on 'ye dii-deh:⧾ :en 'dhu-dih-eh zuu⧾ gban 'i di, 'de on 'ye 'tmeor:⧾ :korn-eh 'di 'kpa :ke.

¹⁵:Yee' 'de :ka :ne-a :due' 'di, a 'ble nyor⧾ 'de a 'nyne-' mo-: zi 'o 'Nakorlor-nyor⧾-a' nyor⧾ deh :torne-eh klei'.

¹⁶:Yee' eh-a' dhih, a 'tali: a-a' deh⧾-zon⧾ dih. :Mor a se-eh no, 'on :se 'o :gwle i, 'on 'ye 'de a bo yi, 'de 'on 'ye :bhla 'jlehn :eh :ne-a 'noror 'on 'worn no, 'on 'ye nyor⧾ :dao' bo vorn.

¹⁷:Yee' nyor :or 'ble-a :dou'⧾, 'nyi or :to deh⧾ :daa :dou'⧾ bo, :yih Nyorsoa-a' :Zulu-a za-a-' 'de 'chore-nyor⧾ bo. :Yee' nyor :or du-a 'ku-a' tuh, 'an mu-or 'mana: :or 'zile-eh see 'nyi-:. 'De 'an mu-or sobu'-plu 'nyi-: :ke, :on :korn-a ken 'nyne :dele' 'chle-eh: :yih nyor :noror' se-a yubo:. Nyor :yor sobu' :daa an mu-a 'nyi-eh, or :due', or-: mu 'nyne :dele' :dao' yubo:.

¹⁸'An 'bhorn :on 'ye wlu⧾ :daa 'chle, 'de 'enjor: :or :korn-a 'de 'chore :eh :ne-a 'de :Taya'ta bo, :on 'dae:, Tubo-wlu:⧾ :en 'wluh-a 'de Nyorsoa-a' 'Yu bo, :or :korn-a 'yli-a' wan-a' gweh-a neh, 'de :or :korn-a buh⧾-a: wla bo-a, :eh gweh-a :dhiin: :en 'wla-eh 'chlan-', me-: :dhe dih.

¹⁹'On yubo: a-a' noo-deh⧾ 'weh, :ka a no-a 'an :ybeh-a'-: 'an dhih 'jeh-' :po-eh-: 'an :koan-a' no-a'-: 'dekorn: se sea 'do :porluh-a' dih :kpon-eh bo-:. 'De 'on yubo-eh, :ka a po-a 'de 'kpih, :eh :zi-a 'o :zai' neh-'.

²⁰Jorwor: deh 'on se-a-' :ybeh 'do a 'bhun, eh-: :dhe dih. A :mor :za 'nynor :dao' an 'da-dih-a 'Jehzebeh 'yli-eh dih, :or 'da-dih-a or-a' 'jeh Nyorsoa-a' wele-eh: :po-nyor, 'de or torne 'an-a: 'bhoi-nynuu deh, or bo-dih-uh dih, 'de on 'ye 'tmeor:⧾ :korn-eh 'di 'kpa, 'de mor on 'ye dii-deh:⧾ :en 'dhu-dih-eh zuu⧾ gban 'i di :ke.

²¹'On 'nyi-or ti, or 'ye or-a' deh⧾-zon:⧾ :dao' dih 'tali:. Jorwor: or :se-' 'bhorn or 'ye or-a' 'tmeor:⧾ :korn-eh: :dao' dih 'tali:.

²²A :gbee'e:. 'An mu-eh :no, 'weh 'ye-or' du 'do ken 'pehn-deh ken. 'De mor nyor⧾ :on :ne or no-a 'nyne :zaan', 'an mu-eh :no, on 'ye an-a' 'jeh worn 'ye 'gabaa, :mor eh 'dhu, on se 'bor.

²³'An mu or-a'a: 'nynuu 'dba-:. :Yee' 'chore-nyor⧾-a' klehkpeh mu-eh yubo: :ka 'on yubo:-a deh :eh :ne-a 'o nyor⧾ :porluh⧾ ken-: 'dekorn: deh⧾ an na-dih-a 'dlu 'di dih-:. :Ka a no-a :koan-a' no-a', 'ka-: 'an mu a-a' geli' :za-eh :no.

²⁴Jorwor: a :mor :yuh :sie:-a 'o 'do :Taya'ta, :or se-a 'o or-a' nyor⧾ deh :torne-eh: :daa klei' zi, 'de :or se-a 'o deh⧾ nyor⧾ :noo'-a 'da-dih-a 'ku-a' 'slan⧾ :en :tehn-a 'di 'chean', 'on :se-' a 'tele' :neheh' 'dlu :po i.

²⁵Jorwor: a kpa 'an dhih 'jeh-' :po-eh 'dlu bo :chio'lo:, 'on 'ye 'de yi.

²⁶:Yee' nyor :or du-a 'ku-a' tuh, 'de :or dhe-a 'o 'an 'tele' dih :chio'lo:, 'de 'on 'ye-a' de yi, :yee' 'an mu-or 'kpih 'nyi-: 'do 'dawor'⧾-dlu⧾-a' klehkpeh 'dlu.

²⁷:Ka 'on no-a, 'de 'on :za-a: 'de 'kpih 'de 'On-ba bo, 'ka-: nyor :dao', or mu :no :ke, 'on 'ye-or 'kpih 'nyi, or 'ye nene-eh-dhun 'ble, or 'ye 'dawor'⧾-dlu:⧾ :dao' wlu 'ken :korn, or 'ye-uh' dih :wa-dih: :ka nyor-a wa-dih-a maa-yabo'⧾ dih.

²⁸:Yee' 'an mu-or 'chuh :dhlaen-eh: :eh fan-a zorn bo-mlai' 'nyi-: :ke.

²⁹:Yee' nyor :or 'ble-a :dou'⧾, 'nyi or :to deh⧾ :daa :dou'⧾ bo, :yih Nyorsoa-a' :Zulu-a za-a-' 'de 'chore-nyor⧾ bo.