Read Eastern Krahn Wlehvolesiehn' 20 Bible Online

Wlehvolesiehn' 20 - Eastern Krahn bible

Wlehvolesiehn' 20

¹:Yee' 'on 'ye 'enjor :due', :or :ne-a 'de Nyorsoa 'bli yai', or-: 'dhle, or yi 'bluhbor. Or 'ble 'bie' :dhorno' :dao' :eh se-a :sie: 'da :korn, eh-a' :koeh'eh-: 'dekorn: 'chen-dubu' :klaba'-: 'de or 'kwa.

²'De or kpon dorsehn: :dao' :eh no-a sehn :soa: :eh :ne-a :chio'lo: an 'da-dih-a 'ku-: 'dekorn: 'Setorn-:. 'Ku-a' 'jeh :dao', mo-: or :san-dih: 'chen-dubu' :klaba' :dao', on 'ye zon⧾-a' 'wlu :due' no 'de dubu'⧾-'.

³:Yeh or san-uh-a, :yee' or 'vile-uh 'de 'bie' :dao' 'di, 'de or po 'o :kpaa', or gba-uh-: worn 'i, 'de or 'dhu 'o yubo-da, 'de on :ne-' 'bluhba⧾-dlu⧾ dih :bo-dih: :neheh', 'de zon⧾-a' 'wlu :due' :dao', en 'ye 'o dih :gweh. :Yee' :mor en :gweh 'o dih, :yee' on :korn on 'ye bhehn-dih-eh: :gbor, 'do ti-kpor-bei 'di.

⁴:Yee' 'on 'ye 'keen :kpala'⧾, :en :korn-a ken nyor⧾ :yuh 'kpih 'nyi-eh: :on 'ye-a zabe zi, on :dhe-a ken dih. 'De 'on 'ye nyor⧾ :on :korn-a 'dlu⧾ on chehn-a 'o, :Yusu'-a' tubo-wlu:⧾ :po-dhih-: 'dekorn: Nyorsoa-a' wlu-a' dhih-: an-a' :zulu⧾. On :se-' worn :kma-deh: :dao'-: 'dekorn: eh-a' 'yor-eh: on ma-a-: :weheh' :za. 'De mor eh :se-uh' yubo-da 'dhu 'do an-a' 'yuba-sehn 'i-: :eh beh 'do on son 'i-:. An-a' 'jeh :dao', mo-: yi 'kmo bo de, 'de on :ne 'Klae :korn nyor⧾ wlu 'ken, 'do zon⧾-a' 'wlu :due' 'di.

⁵Eh-: no 'meheh'-nyor⧾-a' nma-dih-deh 'di 'wluh-eh-a' :zai' neh. :Yee' 'meheh'-nyor⧾-a' :yuh :sie:-a 'o, on :se-' 'kmo bo yi :chio'lo: 'de zon⧾-a' 'wlu :due' :dao', en 'ye 'o dih :gweh.

⁶:Yee' nyor⧾ :an mu-a 'de :zai'-nyor:⧾ Nyorsoa :za-a: 'de nma-dih-deh 'di 'nyne-' :ne, Nyorsoa po-uh :bhorlie' bo, 'de an mu or-a' nyor⧾ no. On :se 'de 'ku 'bli-neh-' :po-eh: i, :eh 'dhu-a 'meh-a' 'sororn' nor-'. Jorwor: an mu Nyorsoa-: 'dekorn: 'Klae-: an-a' 'slaa: :za-nyor⧾ :no. 'De on :ne 'Klae 'ye nyor⧾ wlu 'ken :korn 'do zon⧾-a' 'wlu :due' 'di.

⁷:Yee' :mor zon⧾-a' 'wlu :due' :dao' en zi, :yee' 'ku-a mu dih 'tali-eh: on 'ye 'de :kasue 'di 'wluh,

⁸'de on 'ye 'bluhba-a' 'for⧾ :ne-a :nyieh ken dih mu, on 'ye 'bluhba⧾-dlu⧾ dih :bo-dih:, :eh 'wluh-a 'Goga, :eh mu-a 'Mega. 'Ku-a mu an-a' klehkpeh :dha :due' :po, on 'ye tuh kpa. Nyor⧾ on po-a :dha :due', :ka yobo'-a' :bhehneh' :dhie:-a, 'ka-: on :dhie:.

⁹'De nyor⧾-a' 'jeh :dao', on gweh 'bluhba-a' klehkpeh 'dlu, on bhin Nyorsoa-nyor⧾-a'a: sorye'-a' 'gbe-: 'dekorn: :gwlor or :ybeh-a-:. Jorwor: neh, eh-: 'wluh 'de Nyorsoa 'bli yai', eh-: :sin-dih: an-a' klehkpeh, 'de on no :bhuhbuh'.

¹⁰'De 'ku :on :bo-dih-uh-a dih, on :po-eh: 'de neh-pehnu worn :dha neh-sobu'⧾-a sin-dih-a, 'do :dha worn :kma-deh: :dao'-: 'dekorn: sih 'tmo :wele-eh: :po-nyor :dao'-: on :ne-a. Neh-a' yluh-a mu 'o on :gwlii' :di, 'gwie-: :glaa'e-: :ka ti-a mu-a 'dlu-' :tehn klehkpeh klehkpeh.

¹¹:Yee' 'on 'ye 'keen :kpala'-plu: :klaba', 'de 'yu :due' :dhe 'o or ken dih. 'De 'bluhba-: 'dekorn: yao-: en ple, en 'wluh 'o 'yu :or :dhe-a 'o or ken dih ybei', 'de :dha nyor 'ye-ih'-a 'ye-dih:, 'do se :ne.

¹²'De 'on 'ye nyor⧾ :on 'meh-a, :on 'dhu-a, 'nyne :korn-nyor⧾-: 'dekorn: :yuh nyor⧾ se-a yubo:-: mo-: :nyna 'o 'keen :kpala' :dao' ybei' dih. 'De nyor kan-dih: 'chlee-deh⧾ 'i. :Yee' 'chlee-deh: :neheh' :ne 'o, eh-: nyor kan-dih: 'i, :eh 'dhu-a 'kmo :sie: :febeh'-chlee-deh-'. 'De Nyorsoa-a zi 'meheh'-nyor⧾-a' zabe, :ka on no-a deh⧾-a' no-a', :en 'chle-eh 'de 'chlee-deh:⧾ :dao' 'di.

¹³:Yee' :yuh yobo' kpa-a, yobo' za-uh-: 'kwla, an-a' zabe 'ye :zi-eh:. 'De :yuh :on 'meh-a, 'de :on :ne-a 'de 'zinor', 'zinor'-: 'dekorn: 'meh-a'-: en za-uh-: 'kwla, an-a' zabe 'ye :zi-eh: :ke. :Ka on no-a deh⧾-a' no-a', 'ka-: on no an-a' klehkpeh-a' zabe: :zi-eh.

¹⁴:Yee' 'meh-a'-: 'dekorn: 'zinor'-: en 'vile-eh: 'de neh-pehnu worn. Neh-pehnu: :dao', eh-: 'dhu 'meh-a' 'sororn' nor-'.

¹⁵:Yee' nyor⧾ :on :korn-a 'nyne se-a 'chle-eh: 'de 'kmo :sie: :febeh'-chlee-deh: :dao' 'di, mo-: 'vile-eh: 'de neh-pehnu worn :ke.