Read Eastern Krahn Wlehvolesiehn' 21 Bible Online

Wlehvolesiehn' 21 - Eastern Krahn bible

Wlehvolesiehn' 21

¹:Yee' 'on 'ye yao: :dele'-: 'dekorn: 'bluhba: :dele'-:. :Yih :en no-a :zai' ne, en se dha :ne :neheh'. 'De yobo' se dha :ne :ke.

²:Yee' 'on 'ye gban 'i :ne :gwlor :or 'dhu-a :Julu'slehn: :dele'-', or-: 'dhle, :or 'wluh 'de Nyorsoa bo 'de or 'bli yai'. :Gwlor :dao', or :po-eh: 'kpa :eh gweh-a :ka 'nynor :or yi-a nyina, 'de :or :bheh-dih:-a, :or :ne-a buh⧾ ken, :or 'ye-a or-a'a: yibeor ken :yeh-dih:.

³:Yee' 'on 'worn wlu, mo-: 'wor, :on 'wluh 'de 'keen :kpala' :dao' bo, mo-: 'da, :Eh 'wluh-a dha 'zean' 'bli, Nyorsoa-a mu 'noror :gwlor-nyor⧾ 'nyne-' 'ti-:, 'de on 'ye or-a'a: nyor⧾ no. Nyorsoa-a' 'jeh 'yor-eh mu 'o on bo :ne, 'de or 'ye an-a' Nyorsoa-' 'dhu-eh:.

⁴Or mu-uh 'mii-tehn-a' klehkpeh 'yi dih 'slan-:. 'Meh-a' :se-' :ne i :neheh'. 'Zlu-a'-: 'vin-a'-: :an-a' 'jeh worn 'ye-eh-: en :se-' :ne i :neheh'. Deh no-eh, deh⧾ :soa:⧾ klehkpeh se dha :ne :neheh'.

⁵:Yee' 'yu :or :dhe-a dih 'do 'keen :kpala' ken, or 'dae:, A :gbee'e:. 'An po deh⧾-a' klehkpeh :dele' :naa. :Yee' or 'dae: :neheh' 'de 'on bo, 'An 'bhorn :on 'ye deh⧾ :daa 'chle, deh no-eh, wlu⧾ :daa 'an za-a-', en no :gwlii' :dhe-wlu:⧾, 'de en no dhih-a' 'yor-eh :ke.

⁶'De or :wlu 'de 'on bo :neheh', or 'da, Deh⧾-a' klehkpeh, en :jla 'dlu-' :weh. 'Mor-: no eh-a' :zai'-nyor-: 'dekorn: eh-a' 'yi :gweh-nyor-:. 'Mor-: no eh-a' glu 'dhu 'da-: 'dekorn: eh-a' 'dlu-' :jla 'da-:. :Yee' nyor⧾ :yuh 'ni 'na-ton-a no-a, 'an mu-uh 'ni :eh 'wluh-a 'o 'ni-a' 'dlu-a' glu 'wluh 'da :eh 'nyi-a nyor⧾ :febeh' 'nyi-:, on 'ye-eh' 'na. On :se-eh' :dhen i.

⁷:Yee' nyor⧾ :on du-a 'ku-a tuh, mo-: :an mu 'nyii'-deh: :daa 'ye-:. 'De mor 'mor-: mu an-a' Nyorsoa :no, 'de on 'ye 'an-a: 'nynuu-' 'dhu-eh:.

⁸Jorwor: :fano-' dih 'yi dih-nyor⧾-: :yuh :on 'tali:-a 'Klae-a' klei' :zi-eh dih-: :yuh :on se-a :vlehehn'-' :gweh 'do Nyorsoa ybei'-: :nyor⧾ 'dba-nyor⧾-: 'dekorn: 'tmeor:⧾ :korn-nyor⧾-: gu :po-nyor⧾-: zuu⧾-a' :weheh' :za-nyor⧾-: 'dekorn: sih 'tmo-nyor⧾-a' klehkpeh-: 'de on 'bli :wor 'dhu 'do neh-pehnu worn-' :dha neh-sobu'⧾-a sin-dih-a, :eh no-a 'meh-a' 'sororn' nor.

⁹:Yee' 'enjor-nyor⧾ :meheh' 'sorn :dao' :on 'ble-a 'koba⧾ :meheh' 'sorn :en 'kle 'ye-eh-a' 'dlu⧾ :meheh' 'sorn :en 'bor-dih:-a 'o, en 'yi-a 'de 'di, an-a' nyor :due' yi 'o 'on bo, 'de or 'dae:, 'Yle o. 'An mu :on 'Blae'-yu-a'a: 'nynor :or yi-a nyina :torne:.

¹⁰:Yee' Nyorsoa-a' :Zulu: mo-: :ne 'o 'on ken, 'de 'enjor :dao', or kpa 'on 'de tluh :klaba' :dhorno' ken. 'De or :torne: 'on gban 'i :ne :gwlor :or 'dhu-a :Julu'slehn-', or-: 'dhle, :or 'wluh 'de Nyorsoa bo 'de or 'bli yai'.

¹¹'De Nyorsoa-a' dhih-a' 'i 'beh-a' no-eh 'de :gwlor :dao', or fan. Or-a' fan-a' gweh sobu' :on 'kpa-a deh ken, :yuh an 'da-dih-a 'jaspa, :on :ne-a 'wlen 'wlen, :eh gweh-a :chehbe' :kpuan' 'i.

¹²Gba-dih-gba :or bhin-a :gwlor :dao', or :tehn ya, 'de or ku dih. Or 'ble worn⧾-a' :bhue: 'yor 'sororn'. 'De 'enjor-nyor:⧾ :on :korn-a :bhue: 'yor :ne-a 'sororn', mo-: :korn 'de or-a' worn⧾ :dao', eh-a' wlu bo. 'Do eh-a' :kpaa'⧾ ken, 'do :wor 'Ezlea 'di-a' 'dlu⧾-a' :bhue: 'yor :ne-a 'sororn', an-a' 'nyne 'chle-dih-eh:.

¹³:Yee' gba-dih-gba :dao', or-a' worn⧾ taan :ne 'de 'yluh-a' 'kwla 'wluh-dih: 'da. 'De worn⧾ taan :ne 'de an-a' 'kwla 'wluh-dih: 'da-a' :dila-for bo, 'de taan :ne 'de an-a' kona-for bo, 'de taan :ne 'de an-a' 'nior: 'kpa 'da.

¹⁴Gba-dih-gba :dao', or-a' glu 'dhu 'da :no-dih-eh: sobu'⧾-a' :bhue: 'yor 'sororn'. 'De 'Blae'-yu-a'a: dboo-nyor:⧾ :on no-a :bhue: 'yor 'sororn', an-a' 'nyne 'chle-eh: 'do sobu'⧾ :dao' ken :due' :due'.

¹⁵:Yee' 'enjor: :dao', :or wlu-a 'de 'on bo, or 'ble deh⧾ :yba-dih-tu: :on no-a 'goo, or 'ye 'kwi :gwlor :dao'-: or-a' gba-dih-gba-a' :kpaa'⧾-a' 'worn⧾-: 'dekorn: or-a' gba-dih-gba-a' :kpalu-: :yba-dih:.

¹⁶'Kwi :gwlor :dao', or-a' 'for⧾ :ne-a :nyieh, en 'beh-dih:-'. :Ka or-a' ken :chehn-eh 'beh-a, 'ka-: or-a' dih :tehn-eh 'beh. 'De or no or-a'a: tu, or :yba-dih: :gwlor :dao'. :Gwlor :dao', or-a' dih :tehn-eh no tluh⧾ 'bor⧾-a' 'wlu :due' :kehehn' :mm'. 'Ka-: or no ken dih 'beh-eh-: 'dekorn: or-a' ya :tehn-eh-: :ke.

¹⁷Or :yba-dih: or-a' gba-dih-gba-a' :kpalu: :dao' 'weh :ke. Or-a' ku-a' no buh⧾-a' :kehehn' 'sororn' :bhue: 'yor :meheh'lo:. Tu :gwlor-nyor⧾-a yba-dih-a deh, mo-: or no, 'de or :yba-dih-eh.

¹⁸Sobu'⧾ an 'da-dih-a 'jaspa, me-: on :po-dih: gba-dih-gba :dao', or-a' :kpalu. 'De 'kwi gwlor-a' 'jeh 'yor-eh :po-dih-eh: 'goo-a' 'bleh 'bleh, :or :ne-a 'wlen 'wlen, :ka 'yela' :ne-a.

¹⁹Gba-dih-gba :dao', or-a' glu 'dhu 'da :no-dih-eh: sobu'⧾ 'doror: 'dor :en 'kpa-a deh ken. :Zai' no-a' 'nyne :wor 'jaspa:. 'Sororn' no-a' 'nyne :wor :sofa'. Taan no-a' 'nyne :wor :ageh'. :Nyieh no-a' 'nyne :wor 'ehmlor:.

²⁰:Mm' no-a' 'nyne :wor 'orneh:. :Meheh'lo: no-a' 'nyne :wor :kani'nior:. :Meheh' 'sorn no-a' 'nyne :wor 'klesola:. :Meheh' na no-a' 'nyne :wor 'behlor:. :Meheh' :nyieh no-a' 'nyne :wor 'topa:. :Bhue: no-a' 'nyne :wor 'chaselor:. :Bhue: 'yor-eh :due' no-a' 'nyne :wor 'tokwa:. 'De :bhue: 'yor 'sororn' no-a' 'nyne :wor 'amehte.

²¹:Yee' gba-dih-gba-a' 'worn⧾ :eh :ne-a :bhue: 'yor 'sororn', eh-a' :kpaa'⧾ :no-dih-eh: 'za⧾-kon:⧾ :en 'kpa-a deh ken. 'Za-kon :due', mo-: :no-dih-eh: :kpaa' :due'. 'Kpa :gwie: :eh :ne-a 'o :gwlor :dao' 'di, eh no 'goo-a' 'bleh 'bleh, :or :ne-a 'wlen 'wlen, :ka 'yela' :ne-a.

²²'On :se-' Nyorsoa-a' 'sla 'ye 'de 'kwi :gwlor :dao' 'di. Deh no-eh, or-a' 'sla :wor 'dhu 'Blae'-yu-: 'dekorn: :Gwlor :baa' Nyorsoa :or 'ble-a 'kpih-a' klehkpeh kwa-:.

²³'De mor 'yluh-: :eh beh 'chuh-: en se :koan :korn 'do or ken. Deh no-eh, Nyorsoa-a' dhih-a' 'i 'beh-a' zorn-pli-a fan-' 'do or ken. 'De 'Blae'-yu :wor 'dhu 'nape-' 'do :gwlor :dao' bo.

²⁴:Gwlor :dao', or-a' zorn-pli:, me-: 'bluhba⧾-dlu⧾-a' klehkpeh :en :ne-a dha 'bluhba ken, me-: an mu-' dih 'ye-dih:. 'De 'keen-boi'-a' klehkpeh :on :ne-a dha 'bluhba ken, an mu 'de an-a'a: bhan-a' klehkpeh :ya 'de or 'di.

²⁵:Gwlor :dao', or-a' gba-dih-gba-a' :kpaa'⧾ :se 'o :po-eh: i, 'de zorn-we-eh-a' klehkpeh 'di. En :se 'o :po-eh: i, 'do 'we-a' klehkpeh 'di, deh no-eh, glu :se-' :gor i 'de mor.

²⁶'Bluhba⧾-dlu⧾-a' klehkpeh, an mu 'de an-a'a: bhan-a'-: 'dekorn: an-a'a: 'nyii'-deh⧾-: :en 'kpa-a deh ken, 'de :gwlor :dao' 'di :kpa.

²⁷Jorwor: deh :eh se-a :vlehehn'-' :gweh 'do Nyorsoa ybei' eh :se 'de or 'di :pa i. 'De nyor⧾ :an no-a dhen-deh⧾-: 'dekorn: sih 'tmo-nyor⧾-: on :se 'de or 'di :pa i :ke. :Yuh :on :korn-a 'nyne 'chle-eh: 'de 'Blae'-yu-a' 'kmo :sie: :febeh'-chlee-deh 'di, on :due', :an mu 'de or 'di :pa.