Read Eastern Krahn Wlehvolesiehn' 22 Bible Online

Wlehvolesiehn' 22 - Eastern Krahn bible

Wlehvolesiehn' 22

¹:Yee' 'enjor: :dao', or-: :torne: 'on 'ni :klaba' :eh :korn-a 'ni-a: 'nyi-a nyor⧾ :febeh', :eh :ne-a 'slih 'slih, :eh gweh-a :chehbe' :kpuan' 'i, 'de eh 'wluh 'de Nyorsoa-: 'dekorn: 'Blae'-yu-: an-a' 'keen :kpala' 'zorn.

²Eh :yi-dih: 'de 'kpa :gwie: :eh :ne-a 'o :gwlor :dao' 'di, eh-a' gwea:. Tu⧾ :en 'nyi-a nyor⧾ :febeh', me-: :nyna 'o eh-a' 'for⧾ :ne-a 'sororn' bo dih. Tu⧾ :dao', en no 'bi :po-eh-a' kpor⧾-a' :bhue: 'yor 'sororn' 'do zon :due' 'di, :eh 'dhu-a 'de 'chuh⧾-a' klehkpeh 'di-'. En-' wlon⧾ :ne 'o 'weh, en 'ye 'dawor'⧾-dlu⧾-a' klehkpeh-a' puhba-deh⧾ 'bor-dih:.

³Deh :yeh Nyorsoa po-a 'chlo bo, eh :se 'o 'kwi :gwlor :dao' 'di :ne i. Nyorsoa-: 'dekorn: 'Blae'-yu-: an-a' 'keen :kpala', or-: mu 'o or 'di :ne. 'De Nyorsoa-a' 'bhoi-nynuu 'ye or-a' :weheh' :za.

⁴An mu or-a' 'yuba 'ye-:. 'De or-a' 'nyne-a mu 'chle-eh: 'do on 'yuba⧾-sehn⧾ 'i.

⁵:Yee' glu :se-' :gor i :neheh'. 'De mor 'yluh-: 'dekorn: 'nape⧾-: en se :koan :korn 'de or 'di. Deh no-eh, :Gwlor :baa' Nyorsoa, or-: an mu dih 'ye-dih:. :Yee' an mu nyor⧾ wlu 'ken :korn :ka ti-a mu-a 'dlu-' :tehn klehkpeh klehkpeh.

⁶:Yee' 'enjor: :dao', or :wlu-' 'de 'on bo, or 'dae:, Wlu⧾ :daa, 'an za-a-', en no :gwlii' :dhe-wlu:⧾, 'de en no dhih-a' 'yor-eh :ke. 'De :Gwlor :baa' :or 'nyi-a or-a' :Zulu or-a' wele-eh: :po-nyor⧾, or-: 'o :or dbo or-a' 'enjor, 'noror or-a' 'bhoi-nynuu bo, or 'ye-uh deh⧾ :en :se-a 'o :gwle i :en 'ye-a' :no-eh: :torne:.

⁷:Yee' :Yusu' 'dae:, A :gbee'e:. 'On :se 'o :gwle i, 'on 'ye 'de yi. :Bhorlie' 'do nyor :or dhe-a 'o Nyorsoa-a' wele-eh: :po-eh: :eh :ne-a 'noror 'chlee-deh: :daa 'di, eh-a' 'tele' dih.

⁸'Mor :or 'dhu-a :Jororn'-', 'an 'jeh 'yor-eh-a' 'yli-eh: 'ye deh⧾ :daa, 'de 'on 'worn-ih. :Yeh 'on 'ye-ih-a, 'de 'on 'worn-ih-a, :yee' 'on 'jli-: dih, 'do 'enjor: :daa, :or :to-dih:-a 'on deh⧾ :daa 'i, 'do or 'zorn, 'on 'ye-or' :weheh' :za.

⁹Jorwor: or :wlu-' 'de 'on bo, or 'dae:, 'Bor, :an-a' :no-' :ao', :ka mor-: :an-a' 'Klae :de-di'-boi'-: :on no-a Nyorsoa-a' wele-eh: :po-nyor⧾-: 'dekorn: nyor⧾-a' klehkpeh :on dhe-a 'o 'chlee-deh: :daa, eh-a' 'tele' dih, a no-a, 'de a 'dhu-a 'bhoi-nynuu-' 'do Nyorsoa bo, 'ka-: 'on :ne :ke. Nyorsoa, or-: :on 'ye :weheh' :za.

¹⁰'De or :wlu 'de 'on bo :neheh', or 'dae:, :An-a' 'zile:-' deh⧾ :en :korn-a wele-eh: :po-eh: 'noror 'chlee-deh: :daa 'di nyor⧾ dih. Deh no-eh, deh⧾ :daa, en :se 'o :gwle i, en 'ye :no-eh:.

¹¹:Yee' 'nyi nyor :or no-a deh⧾-zon⧾, or kpa or-a' deh⧾-zon:⧾ :no-eh 'dlu bo 'suh. Nyor :or se-a :vlehehn'-' :gweh 'do Nyorsoa ybei', 'nyi or kpa or-a' se :vlehehn'-' :gweh-deh 'dlu bo :ke. Nyor :or no-a 'yi 'sleh-deh⧾, 'nyi or kpa or-a' 'yi 'sleh-deh⧾-a' no-a' 'dlu bo :ke. Nyor :or :gweh-a :vlehehn'-' 'do Nyorsoa bo, 'nyi or kpa or-a' :vlehehn'-' :gweh-eh 'dlu bo.

¹²:Yee' :Yusu' 'dae:, A :gbee'e:. 'On :se 'o :gwle i, 'on 'ye 'de yi. 'An mu 'de a-a'a: geli' :za-dih-deh⧾ :ya, 'on 'ye a geli' :za, :ka a no-a :koan-a' no-a' :due' :due'.

¹³'Mor-: no eh-a' :zai'-nyor-: 'dekorn: eh-a' 'yi :gweh-nyor-:. 'Mor-: no eh-a' glu 'dhu 'da-: 'dekorn: eh-a' 'dlu-' :jla 'da-:.

¹⁴:Bhorlie' 'do nyor⧾ :on worlor:-a an-a'a: :gba 'vuu⧾ bo. An mu 'tele' 'nyi-eh: on 'ye 'o 'kwi :gwlor :dao' or-a' gba-dih-gba 'worn⧾ :yi-dih:, on 'ye tu :an 'nyi-a nyor⧾ :febeh' an-a' 'bi 'di.

¹⁵Jorwor: :yuh :on :se-a' :pa i, mo-: 'dhu, gu-kplen: :no-nyor⧾-: gu :po-nyor⧾-: 'tmeor:⧾ :korn nyor⧾-: :nyor⧾ 'dba-nyor⧾-: zuu⧾-a' :weheh' :za-nyor⧾-: 'dekorn: sih 'tmo-nyor:⧾ :on :ybeh-a sih 'tmo-deh-' 'de :an no-eh 'do ti-a' klehkpeh bo-:.

¹⁶'Mor :or 'dhu-a :Yusu'-', 'on dbo 'an-a: 'enjor 'de a bo, or 'ye deh⧾ :daa, en-' wele-eh po 'do a-a'a: 'chore-nyor⧾ bo. 'On no :Debe' 'di-a' 'yu. 'Mor-: 'dhu 'chuh :dhlaen-eh: :eh fan-a 'gabaa zorn bo-mlai'.

¹⁷:Yee' Nyorsoa-a' :Zulu-: 'dekorn: 'nynor :or yi-a nyina 'do 'Blae'-yu bo-: on 'da, :Gwlor :baa' :Yusu', 'yle o. 'De 'mor :or 'dhu-a :Jororn'-', 'on 'da, Nyor :or 'worn-a wlu :daa, 'nyi or 'da, 'Yle, :ke o. 'De mor 'on 'da :neheh', :Mor 'ni 'na-ton :taa nyor no, 'nyi or 'yle. Nyor :or 'bhorn-a 'ni :eh 'nyi-a nyor⧾ :febeh', 'nyi or 'duo-eh' yaa'e.

¹⁸Nyor⧾-a' klehkpeh :on 'worn-a wlu⧾ :daa :en :korn-a wele-eh: :po-eh: 'noror 'chlee-deh: :daa 'di, mo-: 'an 'dhu 'slen. :Mor nyor po-ih ken, Nyorsoa-a mu 'kle 'ye-eh-a' 'dlu⧾ :en :ne-a 'noror 'chlee-deh: :daa 'di, 'do or-a'a: 'kle 'ye-eh: or :korn or 'ye-a 'ye ken :po.

¹⁹'De mor :mor nyor za-ih ken, :yee' Nyorsoa-a mu or-a' :bhorlie' :eh :korn-a wlu or po-a :dhama'-' 'noror or-a' 'chlee-deh: :daa 'di, or 'kwa :za. :Yee' 'tele' or 'nyi-or, or 'ye-a' tu :an 'nyi-a nyor⧾ :febeh', an-a' 'bi di-: 'dekorn: 'for or 'ble-a 'de gban 'i :ne :gwlor :dao' 'di-: or mu-ih or 'kwa :za.

²⁰:Yee' nyor :or zela: deh⧾ :daa ken dih 'noror 'on bo, or-: 'da, Dhih 'jeh, 'on :se 'o :gwle i, 'on 'ye 'de yi. 'Ka-: eh 'ye :ne. :Gwlor :baa' :Yusu', 'yle o.

²¹'Nyi :Gwlor :baa' :Yusu'-a' mla :ne 'o Nyorsoa-nyor⧾-a' klehkpeh bo o. 'Ka-: eh 'ye :ne.