Read Eastern Krahn Wlehvolesiehn' 3 Bible Online

Wlehvolesiehn' 3 - Eastern Krahn bible

Wlehvolesiehn' 3

¹'An 'bhorn :on 'ye wlu⧾ :daa 'chle, 'de 'enjor: :or :korn-a 'de 'chore :eh :ne-a 'de 'Saleh bo, :on 'dae:, Tubo-wlu:⧾ :en 'wluh-a 'de 'yu :or :korn-a :zulu⧾ :meheh' 'sorn :dao' :en za-a Nyorsoa-a' :weheh' wlu 'ken, 'de :or 'ble-a 'chuh :dhlaen :meheh' 'sorn :dao' 'de or 'kwa bo, me-: :dhe dih. 'On yubo: a-a' noo-deh⧾ 'weh. 'On yubo-eh' :ka nyor⧾-a 'da-dih-a a 'kmo :ne-nyor⧾. Jorwor: a gweh nyor⧾ :on 'meh-a 'do Nyorsoa ybei'.

²A 'wluh 'nyinor-'. A ku-dih, 'de :febeh' :deh⧾-bei: :en :sie:-a 'o a mla 'i, en :ne-' 'i :chehn klehkpeh klehkpeh. Deh no-eh, 'on 'ye-eh', a-a' noo-deh⧾ 'see :yih 'an Nyorsoa 'bhorn-a a 'ye-a' no, ken yeh-dih.

³A :na-dih: deh⧾ nyor⧾ :torne: a-uh-: 'dekorn: deh⧾ a 'worn-a-: :gwluhuh' dih. A dhe 'o en-' 'tele' dih. :Yee' a 'tali: a-a' deh⧾-zon⧾ dih. :Mor eh 'dhu, a se 'nyinor-' 'wluh, 'an mu a ken :ge-dih: :ka 'ylii'-nyor-a no-a. 'De mor a :se-' ti 'an mu-a 'de :ya yubo: i.

⁴Jorwor: nyor⧾-kpor-bei:, mo-: :ne 'de a 'nyne-' 'de 'Saleh, mo-: :se-' 'worn an-a'a: paa-tiei :se-' :vlehehn' pa. An mu 'tiei-plu⧾-' :pa, 'de on :ne 'on 'ye :dha :due' :na-dih:. Deh no-eh, on :bleh-dih-eh-: 'i.

⁵Jorwor: nyor :or du-a 'ku-a' tuh, 'ka-: or mu 'tiei-plu⧾-a' pa-a' :no :ke. 'De 'on :se 'de or-a' 'nyne 'de 'kmo :sie: :febeh'-chlee-deh 'di :za i. :Yee' 'do 'On-ba-: 'dekorn: or-a'a: 'enjor-nyor⧾ ybei'-: 'do :wor 'an mu-eh-' :za-dih: :ka or :korn-a 'noror 'on bo.

⁶:Yee' nyor :or 'ble-a :dou'⧾, 'nyi or :to deh⧾ :daa :dou'⧾ bo, :yih Nyorsoa-a' :Zulu-a za-a-' 'de 'chore-nyor⧾ bo.

⁷'An 'bhorn :on 'ye wlu⧾ :daa 'chle, 'de 'enjor: :or :korn-a 'de 'chore :eh :ne-a 'de 'Filadeh'fia bo, :on 'dae:, Tubo-wlu:⧾ :en 'wluh-a 'de 'yu :or :ne-a gban 'i, 'de :or no-a :dhehehn-nyor bo, me-: :dhe dih, :or :korn-a :Debe'-a' :koeh'eh wlu 'ken. :Mor or kan-dih: :kpaa' 'i, :yee' nyor :or 'ye-or 'o po, or se :ne. 'De mor :mor or po 'o :kpaa', :yee' nyor :or 'ye-or' 'i kan-dih:, or se :ne.

⁸'On yubo: a-a' noo-deh⧾ 'weh. A :gbee'e:. 'On kan-dih: :kpaa'-: 'i 'do a bo, :or nyor se-a 'o po-a' 'beh-dih:. 'On yubo-eh' :ka nyor⧾ se-a a zlo. Jorwor: a dhe 'o 'an 'tele'-: dih, 'de a no :dhehehn-nyor⧾ 'do 'an klei' :zi-eh bo 'gboror:.

⁹A :gbee'e:. :Yuh :dao' :on no-a :dha :due' 'kpa-nyor⧾ 'do 'ku-a' nyor⧾-a' 'gbon-dih: 'da, :an 'da-dih-a an-a' 'jeh :Jueh'-nyor:⧾ Nyorsoa gan-a, jorwor: on :se :yuh or gan-a, on no sih 'tmo-nyor:⧾, 'an mu-eh :no, on 'ye ya yi 'do a 'zorn, 'de on 'ye-eh' yubo: :ka 'on :ybeh-a a-uh'.

¹⁰:Yee' :ka a dhe-a 'o 'an 'tele' dih, :eh 'dhu-a, se sea, 'de :porluh-a' dih :kpon-eh 'di, ti a 'ye-a 'kle, :yee' :ka a no-eh :naa, :yee' 'kle 'ye-eh: :eh mu-a dha 'bluhba ken :yi, :eh 'ye-a nyor⧾-a' klehkpeh :on :ne-a dha 'bluhba ken 'dhen, 'an mu-eh :no, eh 'ye a 'zorn :zi-dih:.

¹¹'On :se 'o :gwle i, 'on 'ye 'de yi. A kpa 'an dhih 'jeh-' :po-eh 'dlu bo :chio'lo:, 'on 'ye 'de yi, 'de nyor :ne 'o geli' :za-dih: :gblaa' a mu-a 'ye-:, or-a' :gwie 'i a :za.

¹²:Yee' nyor :or du-a 'ku-a' tuh, 'an mu-or 'an Nyorsoa-a' 'sla-a' tu :on 'kpa-a deh ken-' :no. Or :se 'de on 'di 'wluh-: i. 'An mu 'an Nyorsoa-a' 'nyne 'chle-: 'do or ken, 'dekorn: 'an Nyorsoa-a' 'kwi gwlor-a' 'nyne-: :or 'dhu-a :Julu'slehn: :dele' :or mu-a 'de or bo yai' 'wluh-:. 'An mu 'an 'nyne :dele' 'chle-: 'do or ken :ke.

¹³:Yee' nyor :or 'ble-a :dou'⧾, 'nyi or :to deh⧾ :daa :dou'⧾ bo, :yih Nyorsoa-a' :Zulu-a za-a-' 'de 'chore-nyor⧾ bo.

¹⁴'An 'bhorn :on 'ye wlu⧾ :daa 'chle, 'de 'enjor: :or :korn-a 'de 'chore :eh :ne-a 'de 'Lolesi'a bo, :on 'dae:, Tubo-wlu:⧾ :en 'wluh-a 'de 'yu :or :korn-a 'nyne 'dhu-a, 'Ka-: eh 'ye :ne bo, me-: :dhe dih, :or no-a :dhehehn-nyor 'do Nyorsoa-a' tubo-wlu:⧾ :po 'da, 'de nyor⧾ 'beh-dih:-a on 'ye-a' :gwlii' dhe, :or Nyorsoa :yi-dih:-a, 'de or no-a deh⧾-a' klehkpeh.

¹⁵'On yubo: a-a' noo-deh⧾ 'weh. 'On yubo-eh' :ka a gweh-a tebe-ni, a se 'cheh-' :ne, 'de mor a se :sma :ke. 'An 'bhorn a 'ye 'ni 'cheh-: 'ni :smao-: en-' deh :due' no.

¹⁶Jorwor: :ka a se-a 'for :due' bo :ne, :yee' 'an mu a worn :za.

¹⁷A mu :ao', a bhan-'. Deh⧾-a' klehkpeh :nmor-: 'yi 'do a bo. Deh⧾-a' klehkpeh a 'bhorn-a, a 'ble-ih'. Jorwor: a se-eh yubo: :ka a no-a nyor⧾-gba-nyor⧾, 'de nyor⧾ :korn on 'ye-a a :wehlih 'ye, 'de a se-a deh-a' :za-da 'ble, a 'dor-a, 'de a chehn 'kpanua'.

¹⁸:Yee' eh-a' dhih, 'an 'dhu a 'slen, a dhen 'goo: :or no-a 'goo: 'jeh nor, 'noror 'on 'kwa, eh 'ye-eh' no, a 'ye bhan deh 'jeh. A dhen paa-tiei-plu⧾ 'noror 'on 'kwa, a 'ye a-a' 'jeh deh-' :pa-dih:, 'de a 'ye a-a' 'kpanua' :chehn-eh: :eh no-dih-a a dhen, a 'ye-eh' 'zile:. :Yee' a dhen kwein 'noror 'on 'kwa, a 'ye 'de a 'yli po, 'de a 'ye dih 'ye.

¹⁹:Yee' nyor⧾ :on :korn-a dhih 'on :kma-a, :mor on no deh-zon, 'an 'dhu-dih-uh kplen, 'de 'an po-uh 'o :gwie 'i de. :Yee' eh-a' dhih, :porluh:⧾ a 'ble-a 'do 'on bo, 'nyi en 'beh 'i, a 'tali: a-a' deh⧾-zon⧾ dih.

²⁰A :gbee'e:. 'On :nyna dih 'do :kpaa' ken :naa, 'de 'an bla-or. :Mor nyor 'worn 'an wlu, 'de or 'ye 'o :kpaa' :za, :yee' 'an mu 'de or 'bli 'gbu 'di :pa, 'de or :ne 'mor-: :a 'ye son⧾ ybei' kpuhba:.

²¹:Yee' nyor :or du-a 'ku-a' tuh, 'an mu-or 'tele' 'nyi-: or :ne 'on 'ye 'o 'an-a: 'keen :kpala' ken dih :dhe, :ka 'on no-a, 'de 'on du-a 'ku-a' tuh, 'de 'on :ne 'On-ba :dhe-a 'o or-a'a: 'keen :kpala' ken dih :ke.

²²:Yee' nyor :or 'ble-a :dou'⧾, 'nyi or :to deh⧾ :daa :dou'⧾ bo, :yih Nyorsoa-a' :Zulu-a za-a-' 'de 'chore-nyor⧾ bo.