Read Eastern Krahn Wlehvolesiehn' 4 Bible Online

Wlehvolesiehn' 4 - Eastern Krahn bible

Wlehvolesiehn' 4

¹:Yeh deh⧾ :daa en no :ao', :yee' 'mor :or 'dhu-a :Jororn'-', 'on 'ye :kpaa' :or :ne-a 'de Nyorsoa 'bli yai', or kan-dih: 'i. :Yee' :tehn 'i-wlu: :dao', 'on 'worn-a :zai', :on gweh-a :ka :gamu-a wlu-a, mo-: :wlu 'de 'on bo :neheh', on 'dae:, Yi 'ya 'noror 'on bo. 'An mu :on deh⧾ :en :korn :en 'ye-a' :no-eh: 'de ybei' :torne:.

²:Yeh 'an mu-a 'ye-:, :yee' Nyorsoa-a' :Zulu :ne 'o 'on ken, 'de 'on 'ye 'keen :kpala' 'de Nyorsoa 'bli yai', 'de 'yu :due' :dhe 'o or ken dih.

³'De 'yu :or :dhe-a 'o kpala' :dao' ken dih, or-a' 'yuba-a' fan-a' gweh-a sobu' an 'da-dih-a 'jaspa-: 'dekorn: :yuh an 'da-dih-a :kani'nior-:. 'De 'ni 'dba doeh kpala' :dao' 'de dih, 'de eh-a' fan-a' gweh sobu' an 'da-dih-a 'ehmlor.

⁴:Yee' 'keen :kpala'⧾-a' :kwlaa 'sorn 'yor :nyieh, me-: 'dleh kpala' :dao' 'de dih. 'De nyor⧾ :klaba'⧾-a' :kwlaa 'sorn 'yor :nyieh, mo-: pa 'tiei-plu⧾-' 'de on 'dhu 'keen :gblaa'⧾ :en no-a 'goo 'dlu, 'de on :dhe 'o kpala'⧾ :dao' ken dih.

⁵:Yee' 'de kpala' :dao' bo, dhehn-a chleh-' 'yli, 'de eh 'pona-' dih 'de mor. 'De :dhali-pu⧾ :meheh' 'sorn-a wan 'do kpala' :dao' ybei' :en no-a :zulu⧾ :meheh' 'sorn :dao' :en za-a Nyorsoa :weheh'.

⁶:Yee' 'do kpala' :dao' ybei', 'do gweh yobo' :or :no-dih-eh 'yela', :or :ne-a 'wlen 'wlen, :eh gweh-a :chehbe' :kpuan' 'i. :Yee' 'do or-a' 'for⧾-a' klehkpeh 'de dih, 'do :wor 'kmo :ne-deh⧾ :nyieh-a' :due' :due' :ne. En-' yau-a' klehkpeh gweh 'yli 'dlu, 'noror en ybei'-: 'dekorn: 'noror en 'kpuh 'i-:.

⁷:Zai' neh gweh :gbolo:. 'De 'sororn' neh gweh :blii'-gblor. Taan neh 'ble :gwlor-nyor-a' 'yuba:. 'De :nyieh neh gweh :jili' :eh wan-a.

⁸'De 'kmo :ne-deh⧾ :nyieh :dao', en 'ble :kpabuh'⧾ :meheh'lo: :meheh'lo: :due' :due'. 'De 'yli gweh en-' yau-a' klehkpeh 'dlu, :korn mor 'noror en-' :kpabuh'⧾ 'zorn-:. 'De en ble 'gwie-: :glaa'e-: en-' 'bor, en no, Gban 'i :ne-eh:, gban 'i :ne-eh:, gban 'i :ne-eh: 'do :Gwlor :baa' Nyorsoa :or 'ble-a 'kpih-a' klehkpeh kwa bo, :or :ne-a :chio'lo:, 'de :or :ne-a :naa, 'de :or mu-a :ne 'de ybei'.

⁹:Yee' :mor 'kmo :ne-deh:⧾ :dao', en ble dhih-a' 'i 'beh-duh⧾-: ya :dhe-duh⧾-: 'dekorn: 'zio :po-duh⧾-: 'do 'yu :or :dhe-a 'o 'keen :kpala' :dao' ken bo, :or :ne-a 'kmo :ka ti-a mu-a 'dlu-' :tehn klehkpeh klehkpeh,

¹⁰:yee' nyor⧾ :klaba'⧾-a' :kwlaa 'sorn 'yor :nyieh :dao', on 'jli-: dih 'do 'yu :dao' :or :dhe-a dih 'do 'keen :kpala' :dao' ken 'zorn, :or :ne-a 'kmo :ka ti-a mu-a 'dlu-' :tehn klehkpeh klehkpeh. 'De an za-or :weheh', an za an-a' 'keen :gblaa'⧾ 'dlu, 'de an po-ih 'o, 'keen :kpala' :dao' ybei' dih. 'De an ble, an no,

¹¹:A-a' Nyorsoa, :a-a' :Gwlor :baa', :on :bleh-dih-eh-: 'i, :on 'ye dhih-a' 'i 'beh-a'-: ya :dhe-eh-: 'dekorn: 'kpih-: 'ble. :Mor no deh⧾-a' klehkpeh :en :ne-a. 'De mor :on 'worn-dih-eh ken dih 'weh, 'de en-' klehkpeh :no-eh:, 'de en :ne.