Read Eastern Krahn Wlehvolesiehn' 5 Bible Online

Wlehvolesiehn' 5 - Eastern Krahn bible

Wlehvolesiehn' 5

¹:Yee' 'on 'ye 'chlee-deh-fluh: :on 'fean'-eh, 'de 'yu :or :dhe-a dih 'do 'keen kpala' :dao' ken, 'de or-a' :dila-son 'kwa. 'De an-a' 'for⧾ :ne-a 'sororn' 'chle-eh: ken dih, 'de on no dhlun, on kan-eh worn 'i, kpor⧾ :meheh' 'sorn.

²:Yee' 'on 'ye 'enjor :due', :or 'ble-a dhih-a' 'i 'beh-kpih, or-: 'wor, or-: dhele deh dih, or 'da, :Or :bleh-dih-eh 'i :or 'ye dhlun-a' 'dlu⧾ :meheh' 'sorn :dao' 'i zela:, 'de :or 'ye 'chlee-deh: :dao' 'i kan-dih: :eh?

³Jorwor: nyor se 'de Nyorsoa 'bli yai' :ne, nyor se dha yao 'zorn :ne, 'dekorn: 'de 'zinor'-: :or 'ye-eh 'i kan-dih:, 'de :or 'ye-a deh :eh :ne-a 'de eh 'di zlo.

⁴:Yeh 'on 'ye-eh, :yee' 'on 'vin-' 'gabaa. Deh no-eh, nyor :or 'ye-eh 'i :bleh-dih:, 'de :or 'ye-eh 'i kan-dih:, 'de :or 'ye-a deh :eh :ne-a 'de eh 'di zlo, or se :ne.

⁵:Yee' nyor⧾ :klaba'⧾ :dao', an-a' nyor :due' :wlu-' 'de 'on bo, or 'da, 'Bor 'vin-a'. :Gbee'e:. 'Yu an 'da-dih-a :Gbolo :or 'wluh-a 'de 'Juda 'di-a' 'cheh-dlu 'nyne-', :Debe' 'di-a' 'yu :or :korn-a nyor⧾ wlu 'ken, or du 'ku-a' tuh 'weh. :Yee' or 'beh-dih: or 'ye dhlun-a' 'dlu⧾ :meheh' 'sorn :dao' 'i zela:, 'de or 'ye 'chlee-deh: :dao' 'i kan-dih:.

⁶:Yee' 'do 'keen :kpala' :dao' 'bhun, 'do :wor 'on 'ye-dih: 'Blae'-yu[1] :due' eh :nyna dih. 'De 'kmo :ne-deh:⧾ :en :ne-a :nyieh-: 'dekorn: nyor⧾ :klaba'⧾ :dao'-: on bhin-eh. 'Blae'-yu: :dao', eh gweh deh on 'dba-a :zai'. Eh 'ble 'gbon⧾ :meheh' 'sorn-: 'dekorn: 'yli :meheh' 'sorn-: :en 'dhu-a :zulu⧾ :meheh' 'sorn :en za-a Nyorsoa :weheh', :yih or dbo-a dha 'bluhba-a' klehkpeh ken dih.

⁷'De 'Blae'-yu mu, or kpon 'chlee-deh: :dao' dih, 'de 'yu :or :dhe-a dih 'do 'keen :kpala' :dao' ken, 'de or-a' :dila-son 'kwa.

⁸:Yee' :yeh or no-a deh :dao', :yee' 'kmo :ne-deh⧾ :nyieh :dao'-: 'dekorn: nyor⧾ :klaba'⧾-a' :kwlaa 'sorn 'yor :nyieh :dao'-: on 'jli-: dih 'do 'Blae'-yu 'zorn. An-a' klehkpeh 'ble :dholo:⧾ 'de on 'kwa :due' :due', 'dekorn: 'koba:⧾ :en no-a 'goo, :yih deh⧾ :mor nyor⧾ po-a 'yli :en po-a 'no 'jeh no, en 'yi-a 'de 'di-: :en 'dhu-a Nyorsoa-nyor⧾-a' bale-wlu⧾.

⁹'De an ble 'duh :dele', an no, 'Blae'-yu:, :on :bleh-dih-eh-: 'i :on 'ye 'chlee-deh: :dao' 'duo:, 'de :on 'ye dhlun-a' 'dlu⧾ :meheh' 'sorn :dao' 'i zela:. Deh no-eh, on 'dba :on 'weh :dee'. 'De mor 'de :an-a' 'meh-a' :dao' 'di, 'do :wor :on :dhen-dih: :gwlor-nyor⧾ 'do Nyorsoa bo, :on 'wluh-a :bai' 'di dih-: wlu⧾ 'doror: 'dor :po-nyor⧾-: 'dawor'⧾-dlu⧾-: 'dekorn: 'bluhba⧾-dlu⧾-: en-' klehkpeh ken dih.

¹⁰'De :on no-uh 'dawor'-dlu: :an za-a 'slaa 'do :a :Baa' Nyorsoa bo, 'de on 'ye dha 'bluhba ken wlu 'ken :korn.

¹¹:Yee' :yeh 'on pobo:-a 'de :neheh', :yee' 'on 'worn 'enjor-nyor:⧾ :dhulu'-a' wlu⧾, :on zi-a zlo :zloo: pa 'o :pebeh'-' dih. Mo-: bhin 'keen :kpala' :dao'-: 'kmo :ne-deh⧾ :nyieh :dao'-: 'dekorn: nyor⧾ :klaba'⧾ :dao'-: 'de dih.

¹²'De an 'wor, an ble, an no, 'Blae'-yu: on 'dba-a, or :bleh-dih-eh-: 'i, or 'ye 'kpih-: bhan-a'-: :toror'-: 'kpih ken :ne-eh-: ya :dhe-eh-: dhih-a' 'i 'beh-a'-: 'dekorn: 'nyne ya :po-eh-: 'ble.

¹³'De 'on 'worn 'kmo :ne-deh⧾-a' klehkpeh Nyorsoa no-a, :en :ne-a 'de Nyorsoa 'bli yai'-: :yih :en :ne-a dha yao 'zorn-: :yih :en :ne-a 'de 'zinor'-: 'dekorn: :yih :en :ne-a 'de yobo' 'worn-: en-' klehkpeh :daa, me-: ble, :en no, 'Nyne ya :po-eh-: ya :dhe-eh-: dhih-a' 'i 'beh-a'-: 'dekorn: 'kpih-: 'do 'yu :or :dhe-a dih 'do 'keen :kpala' ken-: 'dekorn: 'Blae'-yu-: bo, :ka ti-a mu-a 'dlu-' :tehn klehkpeh klehkpeh.

¹⁴:Yee' 'kmo :ne-deh⧾ :nyieh :dao', en 'da, 'Ka-: eh 'ye :ne. :Yeh en no :ao', :yee' nyor⧾ :klaba'⧾ :dao', on 'jli-: dih, an za Nyorsoa-: 'dekorn: 'Blae'-yu-: :weheh'.