Read Eastern Krahn Wlehvolesiehn' 6 Bible Online

Wlehvolesiehn' 6 - Eastern Krahn bible

Wlehvolesiehn' 6

¹:Yee' 'on 'ye 'Blae'-yu: :dao', or zela: dhlun-a' 'dlu⧾ :meheh' 'sorn :dao', en-' :due' 'i. 'De 'on 'worn 'kmo :ne-deh⧾ :nyieh :dao', en-' :due'-a' wlu, :eh gweh-a :ka dhehn 'plan-a, eh 'da, 'Yle o.

²:Yee' :yeh 'an pobo-a 'o, :yee' 'on 'ye :soo'o-plu:. 'Yu :or :dhe-a 'o or ken dih, or 'ble 'sehn⧾ :po-dih-pluh: 'de or 'kwa. 'De on 'nyi-or 'keen :gblaa'. 'De or na-dih :soo'o: :dao' :eh gweh-a :ka tuh :vorn-nyor mu-a tuh :du 'da.

³:Yee' :yeh 'Blae'-yu: :dao', or zela: dhlun-a' 'sororn' no 'i, :yee' 'on 'worn 'kmo :ne-deh:⧾ :dao', en-' 'sororn' neh-a' wlu 'weh, eh 'da, 'Yle o.

⁴:Yee' 'on 'ye :soo'o: :noror', or-: 'si 'zorn, :or :ne-a 'zoo. 'De Nyorsoa 'nyi 'yu :or :dhe-a 'o or ken dih 'kpih, or 'ye wlu-' dih 'worn-eh dha 'kmo bo :za, 'de :gwlor-nyor⧾ 'ye 'dba :on 'be, :on 'be 'dba :on no. :Yee' :bhla 'jlehn :klaba', eh-: on 'nyi-or.

⁵:Yee' :yeh 'Blae'-yu zela:-a taan no 'i, :yee' 'on 'worn 'kmo :ne-deh⧾ :nyieh :dao' en-' taan neh-a' wlu 'weh, eh 'da, 'Yle o. :Yee' :yeh 'an pobo-a 'o, :yee' 'on 'ye :soo'o: :bhlin :bhlin. 'De 'yu :or :dhe-a 'o or ken dih, or 'ble deh :eh 'dhen-a deh⧾ kwa, 'de or 'kwa.

⁶'De 'on 'worn deh-a' wlu :eh gweh-a :gwlor-nyor-a' wlu, 'de 'kmo :ne-deh⧾ :nyieh :dao' 'nyne-', on 'da, :Mor nyor no :koan 'do 'we-eh :due' 'di, deh or 'ye-a, eh-: mu deh⧾-yor: an 'da-dih-a 'wii, en-' 'saa: 'korbuh⧾ 'sororn' :dhen-dih-eh. 'De mor eh-: :ne-a :due', eh-: mu deh⧾-yor: an 'da-dih-a 'bale, en-' 'saa: 'korbuh⧾ :meheh'lo: :dhen-dih-eh. Jorwor: nyor-a' 'tuh-:-' 'orle-tu⧾-: 'dekorn: dubu'⧾ nyor⧾-a no-dih-a 'glee-nomor-: dih kele'a: o.

⁷:Yee' :yeh 'Blae'-yu zela:-a :nyieh no 'i, :yee' 'on 'worn 'kmo :ne-deh⧾ :nyieh :dao', en-' :nyieh neh-a' wlu 'weh, eh 'da, 'Yle o.

⁸:Yee' :yeh 'an pobo-a 'o, :yee' 'on 'ye :soo'o: :or 'plu-a gbor. 'De 'yu :or :dhe-a 'o or ken dih, or-a' 'nyne :wor 'Meh-a', 'de 'zinor' zi 'o or klei'. 'De 'bluhba-a' 'for⧾ :ne-a :nyieh, or-a' 'for :due' :za-eh: 'kwla 'de en bo, en 'ye-eh' no, 'de nyor⧾ :on :ne-a 'de or 'di, on 'ye :bhla 'jlehn⧾-: 'moeh: :eh 'kpa-a Ji Kou'-moeh-: 'weh⧾-: 'dekorn: kpoon-nimi⧾-: on 'ye-ih 'i 'meh-dih:.

⁹:Yee' :yeh 'Blae'-yu zela:-a :mm' no 'i, :yee' deh an za-dih-a Nyorsoa-a' 'slaa ken, 'do eh 'zorn, 'do :wor 'on 'ye-dih: nyor⧾ :on no-a :dhehehn-nyor⧾, 'de :on 'dba-eh 'do Nyorsoa-a' tubo-wlu:⧾ :po-eh-a' dhih bo an-a' :zulu⧾.

¹⁰'De an po 'geh⧾, an no, :Gwlor :baa' Nyorsoa :or :ne-a gban 'i, :or no-a :dhehehn-nyor, ti :yihih :eh, :an mu nyor⧾ :on :ne-a dha 'bluhba ken, an-a' zabe :zi, 'de :on 'ye-uh' 'kle 'ye-eh 'dlu po, 'do deh on 'dba :a-uh, eh-a' dhih bo :eh?

¹¹'De or :pa-dih: an-a' klehkpeh :gba 'vuu:⧾-plu⧾-', 'de or zela-uh :gwluhuh', on 'ye 'o dih :forn-dih: :weh-beh:, 'de an-a' 'Klae :de-di'-boi' :yuh :sie:-a 'o, 'de :on no-a Nyorsoa-a' 'bhoi-nynuu, :on :korn on 'ye-a 'meh-a' :dao' or 'be 'meh, an-a' klehkpeh 'ye 'meh :ke.

¹²:Yee' :yeh or zela:-a :meheh'lo: no 'i, 'de 'an pobo-a 'de, :yee' 'bluhba-a tleh-' 'gabaa. :Yee' 'de 'yluh 'yli 'de :ne dih :bhlin :bhlin :eh gweh-a 'munu :yli-eh 'i. 'De 'chuh bele: bo, 'de on 'yli 'de :ne 'zoo :eh gweh-a nyomor 'i.

¹³'De 'chuh :dhlaen: :en :ne-a 'de yai', en 'kpa 'zorn 'do 'bluhba ken, :eh gweh-a :ka :pobor' :dhulu' yi-a 'de, 'de or gbua:-a 'fe-tu 'i, 'de an-a' 'bi :en se-a 'vlu, 'de en-' :dhumu⧾ 'kpa-a 'zorn.

¹⁴'De yao 'ma-dih: 'de yai' dih, :eh gweh-a :ka nyor 'fean'-a :sleheh'. 'De tluh⧾-a' klehkpeh-: 'dekorn: 'ni-a' dubeh⧾-a' klehkpeh-: en 'wluh-dih:-' :gwliin'.

¹⁵:Yee' 'keen-boi' :on :ne-a dha 'bluhba ken-: 'nyne :korn-nyor⧾-: sorye'-a' :janbe-boi'-: bhaan-nyor⧾-: 'kpih 'ble-nyor⧾-: 'ge-nynuu-: 'dekorn: :yuh :on :se-a 'ge-nynuu-: an-a' klehkpeh, on 'zile: an-a' 'jeh 'weh 'de wor⧾ 'di-: 'dekorn: 'de sobu'⧾ :en :ne-a 'de tluh⧾ ken 'zorn-:.

¹⁶:Yee' on :wlu-' 'de en bo, on 'da, A 'yli :a ken, a 'ye :a 'zile: 'de 'yu :or :dhe-a dih 'do 'keen :kpala' :dao' ken, or :ne-' :a 'ye, 'de mor 'zile: :a-uh 'do 'Blae'-yu-a' 'chehn-yuba: :or yi-a 'de bo :ke.

¹⁷Deh no-eh, 'yi :kma-we-eh: an-a' 'chehn-yuba-a mu-a 'noror :a bo 'bili:, eh nyni 'o :weh. Nyor :yoror :or 'beh-dih: :or 'ye-eh' 'i :nyna :eh?