Read Eastern Krahn Wlehvolesiehn' 7 Bible Online

Wlehvolesiehn' 7 - Eastern Krahn bible

Wlehvolesiehn' 7

¹:Yee' :yeh eh 'wluh-a 'o, :yee' 'on 'ye 'enjor-nyor⧾ :nyieh, mo-: :nyna dih 'de 'bluhba-a' 'for⧾ :ne-a :nyieh bo, 'de on kan 'bluhba-a' 'for⧾ :ne-a :nyieh :pobor'-a 'wluh-dih-a bo 'i, 'de :pobor' 'ye 'noror 'bluhba ken-a' yi-a' 'bor, :korn 'de yobo' ken-: 'dekorn: tu⧾-a' 'yi :bla-eh-:.

²:Yee' 'on 'ye 'enjor: :noror', or-: 'wluh-dih: 'de 'yluh-a' 'kwla 'wluh-dih: 'da, 'de or 'ble 'kmo :ne-Nyorsoa-a' deh or 'dhu-dih-a nyor⧾ yubo-da 'de or 'kwa. 'De or wele: 'enjor-nyor⧾ :nyieh :dao', :on 'kpih 'nyi-eh :on 'ye-a 'bluhba-: 'dekorn: yobo'-: 'kor-dih:.

³Or 'dae:, A-a' 'kor-dih:-' 'bluhba-: yobo'-: 'dekorn: tu⧾-: kele'a: o, :a 'ye Nyorsoa-a' 'bhoi-nynuu yubo-da 'dhu 'do an-a' 'yuba-sehn 'i o.

⁴'De on zela: 'on :gwluhuh', on 'da, nyor⧾ :on :korn-a 'yuba-sehn 'i 'dhu-eh yubo-da, on no nyor⧾-a' 'wlu-a' :kehehn' :due' 'wlu-a' :kwlaa :nyieh 'wlu :nyieh (144,000), on 'wluh 'de 'Ezlea 'di-a' 'dlu⧾-a' klehkpeh 'nyne-'.

⁵Nyor⧾-a' 'wlu-a' :bhue: 'yor 'sororn', mo-: 'wluh 'de 'Juda 'di 'nyne-', mo-: 'dhu-eh yubo-da. 'Wlu-a' :bhue: 'yor 'sororn', mo-: 'wluh 'de :Wluben' 'di 'nyne-'. 'Wlu-a' :bhue: 'yor 'sororn', mo-: 'wluh 'de 'Gaeh 'di 'nyne-'.

⁶'De 'wlu-a' :bhue: 'yor 'sororn', mo-: 'wluh 'de 'Aseh 'di 'nyne-'. 'Wlu-a' :bhue: 'yor 'sororn', mo-: 'wluh 'de 'Natali 'di 'nyne-'. 'Wlu-a' :bhue: 'yor 'sororn', mo-: 'wluh 'de :Mana'sa 'di 'nyne-'.

⁷'De 'wlu-a' :bhue: 'yor 'sororn', mo-: 'wluh 'de 'Simior 'di 'nyne-'. 'Wlu-a' :bhue: 'yor 'sororn', mo-: 'wluh 'de 'Livae 'di 'nyne-'. 'Wlu-a' :bhue: 'yor 'sororn', mo-: 'wluh 'de 'Esaka 'di 'nyne-'.

⁸'De 'wlu-a' :bhue: 'yor 'sororn', mo-: 'wluh 'de 'Zehbilor 'di 'nyne-'. 'Wlu-a' :bhue: 'yor 'sororn', mo-: 'wluh 'de 'Joseh 'di 'nyne-'. 'De 'wlu-a' :bhue: 'yor 'sororn', mo-: 'wluh 'de 'Behnjemeh 'di 'nyne-'. 'De an-a' klehkpeh :daa, on 'dhu-eh: yubo-da.

⁹:Yee' :yeh deh⧾ :daa, en no :ao', 'de en zi-a, 'de 'an pobo-a 'de :neheh', :yee' 'on 'ye :gwlor-nyor:⧾ :doru' nyor⧾ se-a zlo-a' 'beh-dih:, :on 'wluh-a 'bluhba⧾-dlu⧾ ken dih-: :bai' 'di dih-: 'dawor'⧾-dlu⧾-: 'dekorn: wlu⧾ 'doror: 'dor :po-nyor⧾-: an-a' klehkpeh, mo-: :nyna 'o 'keen :kpala' :dao'-: 'dekorn: 'Blae'-yu: :dao'-: ybei' dih. 'De on pa :gba 'vuu:⧾-plu⧾-', 'de on 'gba yuh⧾-wlon⧾ kwa.

¹⁰'De an po 'geh⧾, an no, :A-a' Nyorsoa :or :dhe-a dih 'do 'keen :kpala' ken-: 'dekorn: 'Blae'-yu-: on 'puh-dih: :a 'weh.

¹¹'De 'enjor-nyor⧾-a' klehkpeh, on :nyna 'keen :kpala' :dao'-: nyor⧾ :klaba'⧾ :dao'-: 'dekorn: 'kmo :ne-deh⧾ :nyieh :dao'-: 'de dih. 'De on 'jli dih 'do :kpala' :dao' ybei', 'de an za Nyorsoa-a' :weheh',

¹²an no, 'Ka-: eh 'ye :ne. 'Nyne ya :po-eh-: dhih-a' 'i 'beh-a'-: :toror'-: 'zio :po-eh-: ya :dhe-eh-: 'kpih-: 'dekorn: 'kpih ken :ne-eh-: 'do :a-a' Nyorsoa bo :ka ti-a mu-a 'dlu-' :tehn klehkpeh klehkpeh. 'Ka-: eh 'ye :ne.

¹³:Yee' nyor⧾ :klaba'⧾ :dao', an-a' nyor :due' dhele: 'on-: dih, or 'da, Deh 'i-deh-nyor:⧾ 'o :on :dhe dih, :on pa :gba 'vuu:⧾-plu⧾-' :eh? 'De mor, dha on 'wluh :eh?

¹⁴'De 'on :wlu 'de or bo, 'on 'da, Nyor :Klaba', :mor yubo-eh. 'De or 'da, Nyor⧾ :on :yi-dih:-a 'de 'kle 'ye-eh: 'kawehn 'di, mo-: 'o :on :dhe dih. 'Blae'-yu: :daa, or-: :korn nyomor on no, 'de on worlor: an-a'a: :gba 'vuu:⧾ :dao', 'de en :ne 'pu-'.

¹⁵Eh-: :korn dhih on :nyna 'o Nyorsoa-a' 'keen :kpala' ybei' dih, 'de an no or-a' 'bhoi-nynuu-deh 'gwie-: :glaa'e-: 'de or-a' 'sla 'zorn. :Yee' 'yu :or :dhe-a 'keen :kpala' :dao' ken, or mu-uh 'yli-eh bo 'dhu-:, deh :se-uh' :no i.

¹⁶'Moeh: :se-uh' :no i :neheh'. 'Ni 'na-ton: :se-uh' :no i :neheh'. 'De mor 'yluh-: :eh beh 'yluh-a' :fuun'-: en-' deh-beh :se-uh' :no i :neheh'.

¹⁷Deh no-eh, 'Blae'-yu: :or :ne-a 'de 'keen :kpala' :dao' 'bhun, or-: mu an-a' 'blae'⧾-a' 'yli-eh bo 'dhu-nyor :no. Or-: mu-uh son bo :na-dih:, 'de on 'ye 'ni :eh 'nyi-a nyor⧾ 'kmo :sie: :febeh' ken :yeh-dih:. :Yee' Nyorsoa-a mu-uh 'mii-tehn-a' klehkpeh 'yi dih 'slan-:.