Read Eastern Krahn Wlehvolesiehn' 8 Bible Online

Wlehvolesiehn' 8 - Eastern Krahn bible

Wlehvolesiehn' 8

¹:Yee' :yeh 'Blae'-yu zela:-a dhlun-a' :meheh' 'sorn no 'i, :yee' 'de Nyorsoa 'bli yai' no 'dhuan 'do 'yluh-buh-a' :gbor-tile 'di.

²:Yee' 'on 'ye 'enjor-nyor⧾ :meheh' 'sorn, :an nyna 'o Nyorsoa ybei' dih. :Gamu⧾ :meheh' 'sorn, me-: on 'nyi-uh.

³:Yee' 'enjor: :noror', or-: 'yle, or-: :nyna dih 'do 'slaa ken :za-dih-deh 'bhun. :Yee' deh nyor⧾-a po-a deh⧾ :mor nyor⧾ po-a 'yli, :en po-a 'no 'jeh no 'di, :eh no-a 'goo, eh-: or 'ble 'de or 'kwa. On 'nyi-or deh⧾ :en po-a 'no 'jeh :doru', or 'ye-ih 'o Nyorsoa-nyor⧾-a' klehkpeh, an-a' bale-wlu⧾ ken po, 'de or 'ye-ih' 'slaa :za-dih: 'do 'slaa ken :za-dih-deh: :eh no-a 'goo ken, :eh :ne-a 'o 'keen :kpala' :dao' ybei'.

⁴:Yee' deh⧾ :dao' :en po-a 'no 'jeh no, en-' :daluh'-: 'dekorn: Nyorsoa-nyor⧾-a' bale-wlu⧾-: en 'wluh 'de 'enjor: :dao' 'kwa, 'de en mu-dih :dha :due' 'de Nyorsoa bo yai'.

⁵:Yee' 'enjor: :dao', or 'duo: deh nyor⧾-a po-a 'no :po-deh:⧾ :dao' 'di-' 'weh. 'De or 'yi-dih-eh neh :eh 'wluh-a 'o 'slaa ken :za-dih-deh ken 'di, or 'vile-eh 'noror yao 'zorn. :Yee' dhehn-a chleh-' 'yli, 'de eh 'pona-' dih, 'de 'bluhba-a tleh.

⁶:Yee' 'enjor-nyor⧾ :meheh' 'sorn :dao', 'on 'ye-a, :on 'ble-a :gamu⧾ :meheh' 'sorn, on :ne buh⧾ ken, on 'ye-ih' bla.

⁷:Yeh :zai' nor 'on 'ye-a, or bla-a or-a' no, :yee' :chehbe' :kpuan'⧾-: 'dekorn: neh :eh zian-dih:-a nyomor-: me-: dba dha yao 'zorn. :Yee' :mor eh 'dhu 'bluhba :gble-eh 'do kpor⧾ taan 'di, :yee' or-a' 'for :due', or-: sin, :korn mor tu⧾-: 'dekorn: :peli'-: :en :ne-a 'o or ken-:.

⁸'De 'sororn' nor 'on 'ye-a, or bla or-a' no. :Yee' deh :eh gweh-a tluh :dhorno' :dhorno', 'de :eh :korn-a klehkpeh 'kpa-a neh-', eh-: :po-eh: 'do yobo' worn. :Yee' :mor yobo' :gble-eh 'do kpor⧾ taan 'di, :yee' or-a' 'for :due' no nyomor.

⁹'De 'kmo :ne-deh:⧾ :en :ne-a 'o or-a' 'for :dao' worn, en-' klehkpeh 'meh. 'De 'ni ken-meheh:⧾ :en :ne-a 'o or-a' 'for :dao' ken, en-' klehkpeh :wa-dih: dih :ke.

¹⁰'De taan nor 'on 'ye-a, or bla or-a' no. :Yee' 'chuh :dhlaen-eh: :klaba', eh-: kele: 'de yai', eh-: 'kpa 'zorn. Eh-: sin :ka :dhali-pu-a sin-a. :Yee' :mor eh 'dhu 'bluhba :gble-eh 'do kpor⧾ taan 'di, :yee' 'do 'for :due' ken, 'do :wor eh 'kpa, 'do 'ni⧾ :klaba'⧾-a' klehkpeh-: 'dekorn: 'ni⧾-a' 'dlu⧾-a' glu 'wluh 'da-: ken.

¹¹('Chuh :dhlaen-eh: :dao', eh-a' 'nyne :wor Worn :nyni-eh:.) 'De 'ni⧾ eh 'kpa-a 'o worn, or :nyni worn. Nyor⧾ :dhulu' :on 'na-a 'ni⧾ :dao', on 'meh-', deh no-eh, eh :nyni worn.

¹²'De :nyieh nor 'on 'ye-a, or bla or-a' no. :Yee' 'yluh-: 'chuh-: 'dekorn: 'chuh :dhlaen-: en :se-' fan 'do 'yluh-buh⧾ :nyieh 'di. 'Yluh :se-' fan 'do 'yluh-buh⧾ :nyieh 'di 'do zorn-we-eh-a' klehkpeh 'di. 'De 'chuh-: 'dekorn: 'chuh :dhlaen-: en :se-' fan 'do 'yluh-buh⧾ :nyieh 'di 'do glu-we-eh-a' klehkpeh 'di.

¹³:Yee' :yeh 'an pobo-a 'de, :yee' 'on 'worn :jili'-a' wlu, eh-: wan 'de yai' :dha :dhorno', eh-: 'wor, eh-: no, Eh no :wehlih-deh:, eh no :wehlih-deh:, eh no :wehlih-deh:, 'do nyor⧾ :on 'ti-a dha 'bluhba ken bo. Deh no-eh, 'enjor-nyor⧾ taan, :on :sie:-a 'o, an yi an-a'a: :gamu:⧾ :bla 'da :naa.