Read Eastern Krahn Wlehvolesiehn' 9 Bible Online

Wlehvolesiehn' 9 - Eastern Krahn bible

Wlehvolesiehn' 9

¹'De 'enjor-a' :mm' nor 'on 'ye-a, or bla or-a'a: :gamu :ke. :Yee' 'on 'ye 'chuh :dhlaen-eh: eh-: 'wluh 'de yai', eh-: 'kpa 'zorn dha 'bluhba ken. 'De on 'nyi-eh 'bie' :dhorno' :eh se-a :sie: 'da :korn, eh-a' :koeh'eh.

²'De 'chuh :dhlaen-eh: :dao', eh kan-dih: 'bie' :dao' 'i. :Yee' :daluh' :on 'wluh-a 'de eh 'di, on gweh :gborlu-gle-a' :daluh', 'de on :kpe-dih: 'de yai' dih, 'de 'yluh-a' 'worn-dih: faan-dhih.

³:Yee' :kpamu'⧾, me-: 'wluh 'de :daluh' :dao' 'nyne-', 'de en yi dha 'bluhba ken. :Yee' 'kpih 'jaan' 'ble-a, me-: on 'nyi-ih.

⁴:Yee' on zela-ih-: :gwluhuh', on 'da en 'bor :peli' deh-' :no-dih-eh, :korn mor 'dhuu'-deh⧾-: 'dekorn: tu⧾-:. Jorwor: nyor-beh-nyor-beh: :or se-a Nyorsoa-a' yubo-dih-deh 'ble 'do or 'yuba-sehn 'i, or-: en 'ye deh-' :no-dih:.

⁵En :se-' 'tele' 'nyi-eh: en 'ye-uh' 'dba, jorwor: en 'ye-uh' 'kle 'ye-dih: 'gabaa 'do 'chuh⧾ :mm' 'di. En-' puhbeh: :dao', eh gweh :ka 'jaan'-a no-a puhbeh :ke.

⁶:Yee' 'do 'chuh⧾ :mm' :dao' 'di, nyor⧾ :dao', an mu 'meh-a' 'kwla⧾-' dih 'bhorn-:. Jorwor: on :se-or' 'ye-: i. Eh mu-uh 'ton :korn 'gabaa, on 'ye 'meh, jorwor: 'meh-a' :se-uh' dih 'koan'-dih: i.

⁷:Yee' :kpamu'⧾ :dao', en gweh :soo'o:⧾ :en :nyna-a buh⧾ ken, :en 'ye-a' tuh :vorn 'da mu. Deh⧾ :en :ne-a 'o en 'dlu, en gweh 'keen :gblaa'⧾ :yih no-a 'goo, 'de en 'ble :gwlor-nyor-yuba.

⁸En-' 'mii gweh 'nynor-a' 'mii:, 'de en-' 'nyne gweh :gbolo-a' 'nyne.

⁹'Do en :gwlii' gweh nene-eh: nyor⧾-a kan-dih-a 'o 'do on :gwlii', 'de an vorn-a tuh. 'De en-' :kpabuh'⧾-a' :dhlumeh' gweh :ka deh⧾ nyor⧾-a dhe-a ken, 'de :soo'o⧾-a jli-a en-' :dhlumeh' :eh gweh-a :ka en-' :dhulu'-a 'dhobo-a en mu-a tuh-'.

¹⁰:Ka 'jaan'-a' gon⧾ :ne-a, 'ka-: en-' gon⧾ :ne. 'De en sun nyor⧾ :ka 'jaan' no-a nyor⧾ :sun-eh. :Yee' 'de en-' gon⧾ 'di, 'do :wor 'kpih :ne, :en 'ye-a' nyor⧾ dih puhba: 'do 'chuh⧾ :mm' 'di.

¹¹En 'ble 'keen 'do en 'dlu, or-: 'dhu 'kwla 'ye-dih-deh: :eh :korn-a 'de 'bie' :dao' :eh se-a :sie: 'da :korn, eh-a' wlu bo. :Hiblu'-nyor⧾-a 'da-dih-or :Aba'dorn:. 'De 'Glii-nyor⧾-a 'da-dih-or :Aporlion' :en :bleh-dih:-a 'i, Deh⧾ 'kor-dih-nyor:.

¹²:Yee' :zai' :wehlih-deh zi-'. Jorwor: eh :sie: 'o :wehlih-deh⧾ 'sororn', me-: :korn :en 'ye 'de yi 'gboror:.

¹³:Yee' 'enjor-a' :meheh'lo: nor 'on 'ye-a, or bla or-a'a: :gamu 'weh. :Yee' 'on 'worn wlu, mo-: 'wluh 'de Nyorsoa-a' 'slaa ken :za-dih-deh: :eh no-a 'goo, :eh :nyna-a 'o or ybei' dih, eh-a' 'for⧾ :ne-a :nyieh bo dih.

¹⁴Mo-: :wlu 'de 'enjor-nyor⧾-a' :meheh'lo: :nor :or 'ble-a :gamu bo, on 'dae:, Bhehn-dih: 'kwla 'ye-dih-deh⧾ :nyieh :dao', :en :san-eh 'do 'ni :klaba' an 'da-dih-a :Yufle'ti worn 'i.

¹⁵:Yee' 'kwla 'ye-dih-deh⧾ :nyieh :dao', :en :dhe-dih-eh 'for 'i, :mor 'yluh-buh: :dao'-: 'we-eh: :dao'-: 'chuh :dao'-: zon :dao'-: en nyni 'o, :yee' en bhehn-dih-eh:-', en 'ye :mor eh 'dhu, :gwlor-nyor⧾-a' klehkpeh 'wluh 'dlu⧾-kpor taan-' dha 'bluhba ken, en 'ye an-a' 'dlu-kpor :due' 'dba.

¹⁶On zela: 'on :gwluhuh' :ka tuh :vorn-nyor:⧾ 'kwla 'ye-dih-deh:⧾ :dao', en 'ble-a, :an na-dih-a :soo'o⧾, on no-a zlo :zloo: pa 'o :pebeh'.

¹⁷:Yee' :soo'o⧾-: 'dekorn: nyor⧾ :an na-dih-ih-a-: 'on 'ye-a, ti 'an 'yli-eh 'kpa-a deh 'i, 'ka-: on :ne :aa. Nyor⧾ :an na-dih-a :soo'o:⧾ :dao', deh⧾ an kan-dih-a 'o on :gwlii', 'de an vorn-a tuh, :en no-a nene, en :ne 'zoo, :ka neh :ne-a, 'de en :kpe gbor, en zani: ya dih, en gweh 'soeh: :ka neh-sobu'⧾ :ne-a. 'De an-a' :soo'⧾-a' 'dlu⧾ gweh :gbolo⧾-a' 'dlu⧾. Neh-: :daluh'-: 'dekorn: neh-sobu'⧾-: me-: 'wluh 'de en 'worn.

¹⁸:Yee' :mor eh 'dhu, :gwlor-nyor⧾-a' klehkpeh 'wluh 'dlu⧾ taan-' dha 'bluhba ken, :yee' nyor⧾ 'kle 'ye-dih-deh⧾ taan :daa, :en 'dhu-a neh-: :daluh'-: 'dekorn: neh-sobu'⧾-: :en 'wluh-a 'de en 'worn, me-: 'dba :gwlor-nyor⧾-a' 'dlu-kpor :due'.

¹⁹:Soo'o:⧾ :dao', en-' 'kpih :ne 'de en 'worn-: 'dekorn: 'de en-' gon⧾ 'di-:. En-' gon⧾ :dao', :en 'ble-a 'dlu⧾, 'de :en gweh-a sane, me-: en no, 'de en tba nyor⧾ deh⧾ dih.

²⁰Jorwor: nyor⧾ :yuh :sie:-a 'o, deh⧾ :daa, en se-a 'dba, on :se-' zuu⧾ an-a' 'jeh 'yor-eh-a' son⧾ no-a, 'kpuh ya :to 'gboror:. On :se-' 'kwla 'ye-dih-deh⧾-: 'dekorn: zuu⧾-: on 'wla-a 'goo-: 'sebla-: :dhiin-: :yih on :no-dih:-a sobu'⧾-: 'dekorn: tu⧾-: :weheh' :za-eh dih 'tali:, deh⧾ :daa, :en-' 'ye-a dih, :en-' 'worn-a dih, 'de mor :en-' :na-a.

²¹'De mor on :se-' an-a' nyor⧾ 'dba-eh-: gu :po-eh-: 'tmeor:⧾ :korn-eh-: 'dekorn: 'yli-a'-: dih 'tali: :ke.