Read Ekari MATIUS 12 Bible Online

MATIUS 12 - Ekari bible

MATIUS 12

¹Okai kou gaa kodo Sabbat naago Jesus gandum taidaiga wokaato kai. Etope-taido naidi tijake gandum jukuuno kodo duwa-motijake nai.

²Parisi bagee okai kou kodo dojake Jesuspa eteete mana, „Dododou, akija etope-taido Sabbat naago dijo beebu teete,” etii.

³Jesus eteete mana, „Ikii Daudja kei tita agijo kapogeije ebatai beu, mee? Okai ma, okai ma bagee na naidi tijake

⁴okai Ugatameja owaa duba wadoujo kijake makita goti kodo nai; okai ma, okai ma enaimo bagee ma nai ko dá kodeja; imam to pijo.

⁵Daana nitimakita mana duba ebatai beu, mee? Sabbat naago Ugatameja owaa duba imam Sabbat naago ekagumijake anaani beu kodo.

⁶Ani kitii, jakai Ugatameja owaa ma ko ibo kato topi.

⁷Daana kou danite ikii kou mana kodo epi naako, kou ko: Jo-menii agijo ma ko beu ani ide gata agijo ipa dimi kodo; no, peu beu me kidi ikii ijeije te etija kodaa.

⁸Me Joka kidaa Sabbat naago boko duwajawita me kidi.”

⁹Okai kouda kodaa make uwijake okeija sembahjang owaa duba woujo kai.

¹⁰Kouda kodaa enakaato gane bokata me idaana toojogo. Okei egaado taine tijake eteete mana, „Pijo, mee? Sabbat naago didi agijo beu jaawii.” Okei ijeije etaine tijake.

¹¹Jesus wo eteete mana, „Meime ikii jupi domba idaana makijake Sabbat naago komo duba gooti-toojogo ejakimakijake wado te egoja, mee?

¹²Domba ma ko me ki ibo, mee? Kojoka Sabbat naago enaa agijo kei tai ko pijo.”

¹³Tijake me kidiipa eteete mana, „Akija gane mapido ti.” Etijake me kidi gene mapido atijake bida kidoke tai, enakaato ka gane danite.

¹⁴Kodeja Parisi bagee podomijake kawe danite wagimakija mana kodo amo wegai joko wegai tai.

¹⁵Jesus kou mana kodo epi kouja, okai kouda make uwii. Me wedaba eepejake okai me utoma beu jaawii.

¹⁶Okai maida make mana ugo te uwikume-tijake bida peu etimakai.

¹⁷Tikauwa ka gokobaki tijawiidaiga wegai tita me Jesaja wegata mana koba-tijake, kou ko:

¹⁸Edodou, anija ewitokita nakei te-tai, Anija ei egajake juma dege-dege etita kidi. Anija Roh okai maida jamakijawijake Okai ojaa bageepa boko petaitagi.

¹⁹Okai akaije juwa, mana pitokai juwa te tijake Okaija mana wuu itaidaiga te jajuwii.

²⁰Tuwata mome te tuwajawii, Daana nakagi utine te dinijawii, Okai boko petajawiitagiida to.

²¹Okaija eka maida ojaa bagee kede dimi ekotopijawiitai.

²²Peka wanee ma manaawo ma enija jago me idaana me ka oomejake okai beu jaawii; tijake me kidi mana godai ma dou ma tai.

²³Me utoma ego takuu-takuu tijake eteete mana, „Beu, mee? kii ke Daud Jokame,” etii.

²⁴Kodeja Parisi bagee juwijake eteete mana, „Kii ke enijaido jaemigimakeigi ko beu, kodeja Baalzebul ka to, enija ukauto kodo,” etii.

²⁵Okeija dimi kodo epi kouja, Jesus eteete mana, „Jakimakita maki gakita okai akaato akaije ti-toojogo peu kaita; daana maki okogo juwa, me uguwoona juwa, akaato akaije ti-toojogo te touta.

²⁶Daana Teege ka Teege eemigimaki-toojogo, okai akaato akaije teete; kawe dani tijake okaija jakimakita makiida toja?

²⁷Dedaana ani ki Baalzebul ka enijaido jaemigimakipa ko, ikiija jokaane meima ka eedadijake jaemigimakai ko? Okai kouja okei kede boko kipetaitai.

²⁸Kodeja Ugatameja Roh ka ani enijaido jaemigimakipa ko, Ugatameja jakimakita makiida ikeepa keega.

²⁹Kawe dani tijake me idaana ka bida jago me ka owaa wadouja kija, edepedeido jamo-motiine tijake, bida jago me tiga buda te egadimi-toojogo? kou dani to tijake okaija agijo jamomotii.

³⁰Ani jato kai beu me kidaa ani akaije natai. Daana ani ma kotuu naatai beu me kidaa kigipapa tijawii.

³¹Okai kouja ani kitii, me ka peu awitaido ma, me eduwai ma, utoma ipa ejaikija; kodeja Roh eduwai kou ko ipa te ejaikija.

³²Meija me Joka akaije mana mutoona godapi, ipa ejaikija; kodeja meija Rohulkudus akaije mana godapi, ipa te ejaikija, makiida kiija maija, wado ka wagi kodo maija.

³³Uti enaa tijawijake uta maija enaa kija juwa, Uti peu tijawijake uta maija peu kija juwa; Uta uti kou ko akiuta uta gojake gaja.

³⁴Kowaa kei, ikii jina tuma! kawe dani tijake ikii enaa mana godaja? Ikii peu kojoka. Kegepa duba bokouto kodo ebeiga godajake kojoka.

³⁵Enaa me okaija enaa awuda make enaa agijo podomijawe-tai, daana peu me okaija peu awiida make peu agijo podomijawe-tai.

³⁶Ani kitii, wogidaa mana gakita me ka godajawii ko, boko petai naago okei dokiitai.

³⁷Ikiija mana maida make maakodo keewija kouja, daana ikiija mana maida make peu keewija.”

³⁸Tijake kapogeije epi bagee ma, Parisi bagee ma Jesuspa wo eteete mana, „Ei, Kuduu, akeepa make dou beu agijo doune kodaa,” etii.

³⁹Kodeja okai wo eteete mana, „Peu ma mogai jago ma tuma ki dou beu agijo doune ubaate, kodeja dou beu agijo tumaana ma te emuwakaita, kodeja tikauwa ka gokobaki tijawiidaiga wegai tita me Junus kidi to.

⁴⁰Junus kidi agapi wido uno wido ikan peijo modo duba danite, kou danite maija me Joka agapi wido uno wido maki duba toutagi.

⁴¹Boko petai naago Ninewe ka bagee kii tuma ma enaida anigojake ewidogaitai; Junus mana japitokijake tedemita kouja; daana beu maa kou, jakai kiija Junus ma ko ibo topi.

⁴²Jamaato ka maki jakimakita jagamo kodo boko petai naago kii tuma ki ma enaida anigojake ewidogaita; okai maki momogiida make Sulemanja dimi boko mana jajuwiine mei kouja; daana beu maa kou, jakai kiija Suleman ma ko ibo topi.

⁴³Enija me duba make podomidoke tijake uwo beuda jawina tai, ee duwaineida ubaate, kodeja domakai beu.

⁴⁴Tijake kei teete mana, ’Ani jaikidokeetega owaapa wo uwiine,’ wegai. Okai dakii tijake gekoo ma, jimu demakijake ma, diiti awi-toojogo ma dou.

⁴⁵Okai uwijake okai ma ko umina peu enija pituwo ebukigojake oomei. Okai ma enaimo woujo kijake tou. Kii me kidi tika kodo ma ko muumai jato umina peu. Okai kou dani kii peu tuma kidi maida kei tidoke taita.”

⁴⁶Okai meido kodoopa mana wegaatigo gaa, ukame ma kenekaane ma juwouda jooni-toojogo, okai ma mana wegatijake ediimeete gaa.

⁴⁷Me ka Jesuspa eteete mana, „Edodou, akuukai ma aki kenekaane ma juwouda topai, aki mana kaawegaine,” etii.

⁴⁸Kodeja etipi meepa wo eteete mana, „Meime noukai ko, daana meima ani keneka ke?” etii.

⁴⁹Tijake etope-taido doodouga gane mapido tijake eteete mana, „Edowei, noukai ma ani kenekaane ma,” etii.

⁵⁰„Meija epaawado ka Naitai kidaa gata dimi kei tipi ko, okai kii ke ani keneka ma, ani paneka ma, noukai ma,” etii.