Read Ekari MATIUS 13 Bible Online

MATIUS 13 - Ekari bible

MATIUS 13

¹Okai kou naago kodo Jesus owaapa make podomijake itei watija animakai.

²Me wedaba okaapa kotuu timakijake okai koma matakijake animakai. Me wedaba kede adaida jooni-toojogo.

³Okai mana muto inoudo ena dani awe-tai manaidaiga oowegai, eteete mana, „Juwidowei, pi kigii te-tai me kidi pi kigii taine podomai.

⁴Okai pi kigii teetigo pi ino ko ita watija gootidaa; tijake bedoudo mejake nojawigou.

⁵Ino ko mogo makiida gootidaa, maki beu daniida; tijake egaa kodo pakamai, maki beu dani kouja.

⁶Kodeja meuka wadoujo kijake denadaa tai; tijake mani beu kouja wei kogi tai.

⁷Ino ko dogo jupi gootida; dogo ejajake pi kodo mijo gape-gape tai.

⁸Ino ko enaa makiida gootidaa tijake uta gojawii; ino ko mepija ka wija, ino ko mutoona, ino ko jokagaati ajaago tidaa.

⁹Gapa jago bagee juwii to tai,” etii.

¹⁰Tijake etope-taido okaapa mejake eteete mana, „Magijo ka ena dani awe-tai manaidaiga oowegai?” etii.

¹¹Tijake wo eteete mana, „Epaawado ka jakimakita makiida ka boone-boone manaido epi ke-tijake kinita, kodeja okeepa menii ko beu.

¹²Agijo jago bageepa abuma menii kouja; tijake okai euga abuma ewaa kai. Kodeja agijo tagu bageepa make makita agijo jamotii.

¹³Okai kouja ani ena dani awe-tai manaidaiga oowegai, okei dojake domakai beu kouja, daana juwijake juwimakai beu; tijake gamakai beu kouja.

¹⁴Okei maida tikauwa ka gokobaki tijawiidaiga wegai tita me Jesaja kidi mana kobadoke, kou ko: Ikii maa kou juwiita, kodeja te gamakai, Daana ikii maa kou douta, kodeja te domakai;

¹⁵Kou bageeja ka kegepa ko bida kita kouja; Gapa ko udo kijake gapa daba kita; Peka ko bugumita; Okei peka ka domakai na kojoka. Daana gapa ka juwijake, Daana kegepa duba gamakijake Ani beu jaawe-tijake aneepa wouga kai na kojoka.

¹⁶Kodeja ikii ke ideide no! ikiija ka peka kodo domake kouja; daana ikiija ka gapa kodo maija juwimake kouja.

¹⁷Beu maa kou ani kitii, tikauwa ka gokobaki tijawiidaiga wegai tita bagee wedaba ma, enaa bagee wedaba ma ikii do-tai manaido doune tijake didi gai, kodeja dou beu; daana ikii juwe-tai manaido juwiine tijake, kodeja juwii beu.

¹⁸Okai kouja pi kigii te-tai me ena dani awe-tai mana boko jato kodo juwidowei.

¹⁹Me idaana jakimakita makiida ka mana muto juwijake gai beu ti-toojogo, peu bokouto jago me mejake okaija kegepa duba kigii tita mana japitaki-motii; kii ke ita watija ka kigii tita kidi.

²⁰Mogo makiida ka kigii tita kidi, okai mana muto juwijake okai kou gaa kodo egaa ideide ma jakimakai.

²¹Kodeja okai duba mani wejawii beu kouja mijo gaa to jakimakai; tijake mana kodo maida make gaagaa juwa, peepu juwa eti-toojogo, okai kou gaa kodaa jaikidokii.

²²Dogo jupi kigii tita kidi, kii ke mana muto juwita me kidi; tijake makiida ka gai peu agijoudo ma, tonawi agijoudo eukai mana ma kodaa mana muto kodo mijo gape-gape tai, tijake uta gou beu.

²³Enaa makiida ka kigii tita kidi ki, kii ke mana muto juwijake gamakai; okai kidi uta gojake mepiija ka wija juwa, mutoona juwa, jokagaati juwa ajaago tidaa.”

²⁴Joko ka ena dani awe-tai mana okeepa jabejajawii, eteete mana, „Epaawado ka jakimakita makiida kou ko me idaana ka enaa ijoo okaija taida kigii tai dani bukaa.

²⁵Kodeja me uno umi-toojogo akaije oote-tai me mejake gandum ijoo jupi ojaa ijoo kigii tijake uwii.

²⁶Daana taka wudidaa tijake uta goja gaa, okai kou gaa kodo ojaa ijoo maija ewaa tapa kai.

²⁷Tijake táí ipuwe me jakei te-tai bagee mejake eteete mana, ’Ei, naitai, beu mee? akaa taida enaa ijoo weetege. Kaija make ojaa ijoo kou ko?’

²⁸Etijake okaija wo eteete mana, ’Akaije nate-tai me kidaa kei tipi ga,’ etii. Tijake jakei te-tai bagee eteete mana, ’Ide mee? ojaa ijoo witoki-mote-uwii,’ etii.

²⁹Kodeja okaija ’Beu’ etii; ’kou danite ojaa ijoo badi-toojogo gandum ijoo maija enaimo badidaa tija kouja.

³⁰Kojoka okejai enaimo ejajake duwaitaida to jaikai. Duwai naago ani duwa-tai bageepa kii dani etiita: Ojaa ijoo kou tiga badikumijake boda gadimijake bodija jookogai, kodeja gandum ko anija makija owaa duba woujo naawii, etiita,’ etii.”

³¹Joko ka ena dani awe-tai mana okeepa jabejajawii, eteete mana, „Epaawado ka jakimakita makiida kou ko sesawi miteena me idaana motijake okaija taida wejawii dani bukaa.

³²Joko ka miti ma ko umina mijo daba, kodeja ejajake naapoudo ma ko euga ibo kijake uteena kai. Tijake epa bede maki bede ka bedoudo mejake kago maida geka migii.”

³³Joko ka ena dani awe-tai mana maija kii dani eteete mana, „Epaawado ka jakimakita makiida kou ko goti ejajawe-tai agijo dani bukaa. Jagamo idaana motijake tepong ebijadou wido duba awijake utoma ejajawii.”

³⁴Kei manaido kei kotuu timakita meidoopa ena dani awe-tai manaidaiga etii. Ena dani awe-tai mana beudaiga tumaana ma etii beu.

³⁵Kii dani tikauwa ka gokobaki tijawiidaiga wegai tita meja wegata mana koba-tijake, kou ko: Ena dani awe-tai manaidaiga mana godaita, Maki kabo makitaida make boonita agijoudo wegakumiita.

³⁶Tijake okai me wedaba kede ejaikidokijake owaapa wadoujo kai. Etope-taido okaapa mejake eteete mana, „Ojaa ijoo taida ejata ki ena dani awe-tai mana kodo boko jato niti-niimidou,” etii.

³⁷Tijake wo eteete mana, „Enaa ijoo kigii tita me kidi ki me Joka kidi.

³⁸Táí kii ko uwoje makije ki. Enaa ijoo kii ke jakimakita makiida ka jokaane kede. Ojaa ijoo kii ko peu bokouto kidi jokaane.

³⁹Akaije te-tai me ka ojaa ijoo kigii tita kidi ki Teege kidi. Duwai wagi ko wiwitiida naago kodo, daana duwa-tai bagee jaetigo-tai bagee kede.

⁴⁰Ojaa ijoo kotuu timakijake bodija jookogata kidi danite, okai kou dani maija wiwitiida gaa kei tidoke taita.

⁴¹Me Joka jaetigo-tai bagee ebadikumijake okaija jakimakita makiida make peu epauto ma, peu awe-tai ma kotuu etimakaitai.

⁴²Tijake bodija no-taida eemigimakaitai. Okai kouda kodaa jege ma egaagede ma to touda.

⁴³Tijake enaa bagee meuka danite ganimakaitai, Nakame ka jakimakita makiida. Gapa jago bagee juwii to tai.”

⁴⁴„Epaawado ka jakimakita maki kou ko, me idaana agakaato dani agijo maki duba boonita kodo domakijake boonijawii dani bukaa. Tijake ideide umina ma uwijake okai maida ka aagijo taagijo kaa tijake kou maki kodo edai.

⁴⁵Daana epaawado ka jakimakita maki kou ko munaa uwe-tai me idaana ka enauto pakooba ubaate dani bukaa.

⁴⁶Ibo age pakooba domakijake okai maida ka aagijo taagijo kaa te-uwii. Tijake pakooba kodo eda-motii.

⁴⁷Daana epaawado ka jakimakita maki kou ko me ka ebai maikai duba menijake ikan tuma tumaija muga-motija dani bukaa.

⁴⁸Ebetume tidoke tijake me ka adaida wado gou. Animakijake okaakai tijawii; enaa kaija awimakai, daana peu kaija emigimakai.

⁴⁹Okai kou dani maija wiwitiida gaa kei taita. Jaetigo-tai bagee podomijake enaa bagee jupi make peu bagee okaakai tijawiitai.

⁵⁰Tijake bodija no-taida eemigimakai. Okai kouda kodaa jege ma egaagede ma to touda.

⁵¹Ikii kei manaido kei gamakeega, mee?” Etijake joko eteete mana, „Ii, gaage,” etii.

⁵²Jesus eteete mana, „Okai kouja kapogeije epi me gakita epaawado ka jakimakita makiida maida topi-toojogo owaa ipuwe me idaana dani bukaa. Okaija tonawi agijo awijaida make ija ma doga ma podomijake te-tai.”

⁵³Kei ena dani awe-tai manaido wegajawijake Jesus kouda make uwii.

⁵⁴Okai kidaa makiida dakii tijake sembahjang owaa duba meido etopai. Tijake okei ego takuu-takuu etijake eteete mana, „Kii me kii ke kou dani dimi bokouto ma, ego takuu-takuu kodo ma kaijaiga go-moteegi?

⁵⁵Beu, mee? pija kei te-tai me joka kidi. Daana beu, mee? ukame eka ko Marjam kodo. Daana kenekaane kei Jakub ma, Jusuf ma, Simon ma, Judas ma kede ke.

⁵⁶Daana panekaane utoma ineepa topai ko, beu mee? Kaija make kou manaido ko googi?” wegai.

⁵⁷Tijake okei gaagaa. Kodeja Jesus eteete mana, „Gokobaki tijawiidaiga wega-tai idaana me ka ibo ejaikai, kodeja okaija makiida, daana okaija owaapa to ko beu,” etii.

⁵⁸Okai kouda kodaa ego takuu-takuu agijoudo wedaba kei tai beu, okei maakodo egai beu kouja.