Read Ekari MATIUS 14 Bible Online

MATIUS 14 - Ekari bible

MATIUS 14

¹Okai kou gaa kodo wiijago kabuuda maki jakimake-tai me Herodes kidi Jesus maida make mana juwii.

²Tijake jakei te-tai bageepa eteete mana, „Kii ke baptis tei tita me Jahja kidi, okai bokata bagee jupi make anigojake kouja okai duba bida agijoudo ewaa keete,” etii.

³Herodesja Jahja ejakimakijake wanee owaa duba buda egadimigoo amo eewita kouja, kenekame Pilipus kidi waka Herodiah maida make,

⁴Jahjaja etita mana kouja, „Umina dá didéé kodo, ebukeemege ko,” etita kouja.

⁵Herodes wagiine gajake meido weda egai. Okeija ka gai ko Jahja kidi Ugatameja gokobaki tijawiidaiga wega-tai me idaana egajake kouja.

⁶Kodeja Herodes pata naago kijake, Herodiahja jagamo joka kodo kotuu timakita me jupi gaida-gaida tai. Herodes ide umina egai.

⁷Okai kouja okaija ediimija agijo meniine tijake Herodes jatogijawita manaida baita makijawii.

⁸Api kodo ukame ka eti-mene-tijake kouja, Herodespa eteete mana, „Kiija baptis tei tita me Jahja kidi dagi ko tapuja dokouda naimi,” etii.

⁹Tijake maki jakimake-tai me kidi gaagaa umina. Kodeja baita makijake kouja, daana okai ma enaimo nopaido maida make kouja, mene-tijake me etimakai.

¹⁰Okai me ebadikumijake Jahja wanee owaa duba make ogo eduwai.

¹¹Dagi kodo tapuja dokouda jadoke-mejake api kodoopa menii, tijake api kodaa ukame menigou.

¹²Jahja etope-taido má jato motigojake emakijawii; tijake Jesus ete-uwii.

¹³Jesus okai kou mana kodo juwijake, okai kouda kodaa make wo kijake komaidaiga me beuda okainiinii uwii. Kodeja me wedaba kou mana juwijake okeija maki okogoopa make adaidaiga eepeete uwii.

¹⁴Jesus adijake me wedaba kotuu timaki-toojogo edou; okai ipa egajake okeija didi bagee beu jaawii.

¹⁵Uwaataa kijake etope-taido okaapa mejake eteete mana, „Kiija me beuda makijo, daana uwaataa keega. Meido kodo uwei neetii, maki okogoudoopa naija agijo eda-tita no,” etii.

¹⁶Jesus eteete mana, „Me te uwii. Ikii ke naija agijo menii,” etii.

¹⁷Okeija eteete mana, „Inii tumaana agijo ma beu, kodeja goti kemo idibi ma, binei ida wija ma to,” etii.

¹⁸Tijake Jesus eteete mana, „Aneepa naadoke-mewei,” etii.

¹⁹Tijake meido kodo bopu wado animake-tei etii. Daana goti kemo idibi ma, binei ida wija ma motijake epa maida wado dojake mobu ediimai. Goti utijake etope-taido menii, daana etope-taido meidoopa jawudii.

²⁰Okei utoma nojake mobu kai. Utita abu kitaija kodo momotijake edu tapuja wija ma gaati ebetume awimakai.

²¹Goti nota bagee jame ida muto muto to ko muto, kou wado maija[2], daana jagamoudo ma, jokaido ma.

²²Okai kou gaa kodaa maija etope-taido koma mataketijake bida peu kidi etimakai, okei tiga amo ade-tijake; okai kidaa meido uwei eteetigo gaa kodaa.

²³Meido kodo uwei etimakijake okai kidi dimiida sembahjang taine wado uwii. Wanee kijake okai kidi to tou.

²⁴Kodeja koma kodo peku epouda awijake ukija tuwai kouja gaagaa umina.

²⁵Awiine jato gaa kodaa Jesus peku wadouga ita meete okeepa mei.

²⁶Peku wadouga ita meete etope-taido edojake gootoki tijake wegaate mana, „Enija!” Okei weda ka emeeme tai.

²⁷Kodeja okai kou gaa kodo Jesus mana oowegajake eteete mana, „Ei, kegepa tipinimakai. Ani no. Weda te gai,” etii.

²⁸Tijake Peterus wo eteete mana, „Ei, Tuhan, maakidi aki kipe ko, akeepa uwo wadouga jawiine mei enii,” etii.

²⁹Tijake Jesus „Mei” etijake Peterus koma duba make mijouwe kijake uwo wadouga Jesuspa ita uwii.

³⁰Kodeja okai ukija kodo dojake weda gai. Gibu taine dani emeeme teete mana, „Ei, Tuhan, naadadai!” etii.

³¹Jesus kou gaa kodo gane mapido atijake ejakai, eteete mana, „Ei, epaapate maakodo gai beu me, magijo ka aki dimi takaida keege?” etii.

³²Komaida wadouwe aakijake ukija kodo duwadoke tai.

³³Tijake komaida tota bageido migaakobe eteete mana, „Beu maa kou, aki ki Ugatame Joka,” etii.

³⁴Okei peku adijake Genesaret makijo dakii tai.

³⁵Kou makijo ka bageido kede Jesus edomakijake, kou makijo bobe meido ebadikumijake didi bagee utoma oomei;

³⁶ediimeete mana, okaija bado jato kagaba to jawinikido-tita. Jawinikidota daniija didi beu kidaa tai.