Read Ekari MATIUS 2 Bible Online

MATIUS 2 - Ekari bible

MATIUS 2

¹Judea dokoo ka Baitlahim makijo make Jesus pajake, Herodes maki jakimake-tai me toojogo gaa, awii jato make dimi jago bagee Jerusalim makijo mei,

²eteete mana, „Jahudi ejakimake-tai me kaija make pata? Inii awii jato ijapu jadojake migaakobe etaine meege,” etii.

³Kou mana muto maki jakimake-tai me Herodes juwijake gootoki umina, okai ma Jerusalim maki utoma.

⁴Tijake imam iboudo ma kapogeije epi bagee ma kotuu etijawijake, kaija make Keristus paitagi mana egaado tai.

⁵Tijake okei eteete mana, „Judea dokoo ka Baitlahim makijo make. Tikauwa ka gokobaki tijawiidaiga wegai tita me ka kapogeije ebijamakita kouja:

⁶Ei, Baitlahim, Judea dokoo, Aki ki mijo ko beu Jahuda ka ibo jupi, Aki dubaiga Monika Me podomaitagi kouja, Anija bagee Israil ejakimake-tijake.”

⁷Tijake Herodes dimi jago bagee kede gabo gabo manaa-tijake ijapu ewaa kita mana epeepite egaado tai.

⁸Tijake Baitlahim makijo ebadikumijake eteete mana, „Ikii uwijake joka kidi epeepite eubai. Ikii edomakipa ko mana joko natii; ani maija migaakobe ete-uwiine kojoka,” etii.

⁹Maki jakimake-tai me kidaa mana kodo juwijake okei uwii. Awii jato ka dota ijapu maija migougu oomakii, tijake joka kidi tota wado wedoke tai.

¹⁰Ijapu kidi dojake kegepa bego-bego tijake umina maa kou ideide timakai.

¹¹Okei owaa duba wadoujo kijake joka kidi ma ukame Marjam ma edojake mijouga kijake migaakobe etai. Okeija ka poto kebajawijake menija agijoudo menii; kou ko, mege ma, unu enaa utóú ma. unu enaa odijo ma.

¹²Ugatameja bagumeidaiga Herodespa amo te uwii etijake joko ka itaiga okeija ka makiida uwii

¹³Dimi jago bagee uwijake bagumeidaiga Tuhan jaetigo-tai me idaana Jusufpa ewaa kijake eteete mana, „Anigou, joka ki ma, ukame ma Masir makijoopa ouwii. Kouda kodaa tou, ani mana katigoutaida to. Herodes joka ki wagiine tijake eubaitagi kouja,” etii.

¹⁴Tijake okai anigojake joka kidi ma ukame ma wanee Masir makijo ouwii.

¹⁵Okai kouda kodaa Herodes bokaitagiida to tou, Tuhanja tikauwa ka gokobaki tijawiidaiga wegai tita me kidiidaiga wegata mana koba-tijake kou ko: Masir makijoopa make anija joka manaa-tita mana.

¹⁶Wadoutouga dimi jago bagee ka puja naukita kodo Herodes gajake okai emoge umina. Tijake jame jokaido utoma Baitlahim makijo ma, kou watija dokoo ma ka jokaido wage-tijake me ebadikumii; epajake taun wija umii beu jokaido kede. Dimi jago bageepa epeepite egaado tita gaa dani.

¹⁷Tijake tikauwa ka gokobaki tijawiidaiga wegai tita me Jermia kidi wegata mana kobata, kou ko:

¹⁸Rama makijo emeeme juwita, Jege teete ma jiijii umina teete ma; Kou ko, Rahil jokaaneido jege eteete; Okai jege jabudijawii beu, Jokaane igajake kouja.

¹⁹Herodes bokajake Tuhan jaetigo-tai me idaana Masir makiida bagumeidaiga Jusufpa ewaa kijake eteete mana,

²⁰„Anigou, joka ki ma ukame ma Israil ka makijo ouwii; joka ki wagiine tita bageido bokata kouja.”

²¹Okai anigojake joka kidi ma ukame ma ebukijake Israil ka makijo ouwii.

²²Kodeja Archilaus kidi Judea dokoo jakimake-tai me, nakame Herodes komouto kita mana kodo Jusuf juwijake kouda uwii weda gai. Kodeja Ugatame bagumeidaiga etijake, maki katouda Galilea dokoo wo uwii.

²³Wadoutouga maki kodoopa dakii tijake kouda kodaa tou, eka Nazaret. Tikauwa ka gokobaki tijawiidaiga wegai tita me ka wegata mana koba-tijake, kou ko: Jesus Nazaret ka me eka eebataitai mana kodo.