Read Ekari MATIUS 21 Bible Online

MATIUS 21 - Ekari bible

MATIUS 21

¹Okei Jerusalim kapauto kijake Baitfagi, kou ko Zaitun Dimiida kodaa dakii tijake Jesus etope-tai wija ebadikumii,

²eteete mana, „Ikai doodouga maki okogoopa auwai; kouda wadoujo aakijake keledai idaana egadimi-toupagi aadoupiga, keledai joka ma; eekegajawijake aanaaoomei.

³Me ka mana kiti-toojogo, ikaija kii dani aetai, ’Tuhan gai peu kodaa,’ aetijake okai kou gaa kodo kijajaikaipagi,” etii.

⁴Kii dani kei tita tikauwa ka gokobaki tijawiidaiga wegai tita meja wegata mana koba-tijake, kou ko:

⁵Sion jagamo joka naaetii, Edodou, kajakimakita me kidi meete, Daba kijake keledai joka wado animakijake; Kou ko joka keledai kidi, Agijo doke-tai kidi.

⁶Etope-tai kede auwijake Jesus etita kidi danite aakei tai.

⁷Keledai ukakáija aaoomejake okeija kagaba kou wado mukajake, Jesus kou wado animakai.

⁸Me wedaba okeija ka kagaba ita maida mukajake-tai, daana me ino ko pija imo tuwa-mote tijake ita maida mukajake-tai.

⁹Okei tiga uweete bagee ma, nemouga eepeete bagee ma gaida-gaida teete mana, „Ajii kodo, Daud loka! Tuhan eka dubaiga meete me kidi muta neetuwawei! Ajii kodo, kii waiko monika makijo!”

¹⁰Okei Jerusalim wadoujo kijake maki utoma kodo gootoki tai. Me ka eteete mana, „Kii ke meime?” etii.

¹¹Tijake kotuu timakita bageido eteete mana, „Kii ke Jesus, gokobaki tijawiidaiga wega-tai kidi, Nazaret makijo Galilea dokoo ka,” etii.

¹²Jesus Ugatameja owaa duba wadoujo kijake owaa duba ka akaada te-tai bagee eebakikumii; mege akapaka te-tai bagee ka pejageido wadouga mijouga jatijake-tai, daana wonou kaa te-tai bagee ka animake-titaida maija

¹³Tijake eteete mana, „Kapogeije ebijamakita: Anija owaa ko sembahjang te-tai owaa ebataitai. Kodeja ikii ke oma bagee ka bijo jaikipa,” etii.

¹⁴Peka wanee ma kotiidogo ma Ugatameja owaa duba okaapa mejake okai beu jaawii.

¹⁵Imam iboudo ma kapogeije epi bagee ma okai ego takuu-takuu agijo kei tita kodo edojake, daana jokaido ka owaa duba gaida-gaida teete mana, „Ajii kodo, Daud Joka!” mana kodo juwijake emoge umina.

¹⁶Tijake Jesuspa eteete mana, „Aki juweege, mee? kei teete mana kodo,” etijake Jesus wo eteete mana, „Beu maa kou, ikii kapogeije ebatai beu, mee? Ajejoka ma ama no-tai ma ka ebeidaiga Muta etuwai mana boko duwajawita.”

¹⁷Tijake ejaikidokijake Jesus maki okogo make podomijake Baitani makijoopa uwijake kouda uno umii.

¹⁸Abata digii maki okogoopa metato uweetigo gaa naidi gai.

¹⁹Ita watija ara uta uti dojake kou doodouga uwijake utaana ma dou beu, kodeja ije to. Tijake eteete mana, „Aki maida uta te gou imo kidi to togoo.” Etijake okai kou gaa kodo uta uti kodo denadoke.

²⁰Etope-taido dojake ego takuu-takuu teete mana, „Kawe dani tijake pija kidi okai kii gaa kidaa denadoke tipi?” etii.

²¹Jesus wo eteete mana, „Beu maa kou ani kitii, ikii maakodo gajake dimi wija taawipa, kii uta uti maida kei tita danite ikii kei tai to ko beu, kodeja ikii bago ki ’Maikai duba wajagidodou’ etipa, kei tidoke taita.

²²Daana tumaana agijo sembahjang duba ediimipa ko, ikii maakodo gamaki-toojogo go-motiita.”

²³Okai Ugatameja owaa duba wadoujo kijake okai meido etopeetigo gaa imam iboudo ma, me ibouda ma okaapa mei. Tijake okei eteete mana, „Má bida agijo ka kei agijoudo kei teige? Daana meija bida bokouto kaneemegi?” etii.

²⁴Jesus wo eteete mana, „Ani na mana mutoona kigaado taipiga. Ikii joko natipa ko, anija kei teiga bida agijo maija kitiipiga.

²⁵Jahja baptis tei tita mana kodo kaija make? Epauto ko epaawado make, mee? meepa make,” etii. Tijake okei akado wegene teete mana, „Kou danite ’Epaawado make,’ etipe ko, ’Magijo ka maakodo egai beu?’ eniipagi kodaa.

²⁶Kodeja inii ’Meepa make’ etipe ko, inii me kotuu weda; meido utoma Jahja kidi gokobaki tijawiidaiga wegai tita me idaana egai kouja.”

²⁷Tijake okei Jesuspa wo eteete mana, „Inii ewo.” Etijake okaija wo eteete mana, „Keetigo ko ani maija kei agijoudo kei teiga bida agijo ko ti kitiipiga.

²⁸Ikiija ka gai ko kawe dani? Me idaana jame joka wija makijawii. Iboutoopa uwijake eteete mana, ’Ei, ani joka, ito naago uta taida kei te-uwii,’ etii.

²⁹Tijake wo eteete mana, ’Uwiine,’ kodeja uwii beu.

³⁰Tijake ipougaapa uwijake kii kidi mana etii. Tijake okaija wo eteete mana, ’Te uwiipiga.’ Kodeja nemouga tedemijake uwii.

³¹Kei wija kede kawi ka ki nakameja dimi jakei tai?” Tijake wo eteete mana, „Wijaago kidi.” Tijake Jesus eteete mana, „Beu maa kou ani kitii, mege kotuu te-tai bagee ma, mogai jago jagamo ma Ugatameja jakimakita makiida ikii keetigai.

³²Jahja maakodo bokoutoudaiga ikeepa mejake ikii maakodo egai beu kouja. Kodeja mege kotuu te-tai ma, mogai jago jagamo ma maakodo egata. Daana ikii kou mana kodo edojake maija kodeja nemouga tedemai beu, maakodo ega-tijake ko.

³³Joko ka ena dani awe-tai mana juwidowei: Owaa ipuwe me idaana uta buda táí wejake eda wagijawii. Utaadijo tigimaida utii ma, douto-tai owaa migii ma, tijake mune-tai bageepa jajaikijake joko ka makiida uwii.

³⁴Uta uwa kaine gaa jakei te-tai bagee mune-tai bageepa ebadikumii, uta motiine tijake.

³⁵Mune-tai bagee kedaa jakei te-tai bagee ejakimakijake me idaana kopa wagii; me idaana wagimakai; daana me idaana mogo ka wagigou.

³⁶Kigeena ma okai joko ka jakei te-tai bagee ebadikumii, edoga kede ma ko wedaba; tijake mune-tai bagee mijaato kei tita dani etai.

³⁷Nemouga okaija jokame kidi ebadikumii, kei teete mana, Ani joka okei ibo ejaikaitai, gajake.

³⁸Kodeja mune-tai bagee kede owaa ipuwe me kidaa joka kidi edojake okei kede wegaate mana, ’Kii ke okai komouto kaine me. Mewei, neewagei, jajaikaitagi agijo inii ipuwe ketita no,’ wegai.

³⁹Okei ejakimakijake taida make eemigimakijake wagimakai.

⁴⁰Okai kouja táí ipuwe me meitagiida kei mune-tai bagee maida magijo kei etaitagi?”

⁴¹Okeija wo eteete mana, „Kei peu bagee epa peu ka wagijake joko ka mune-tai bageepa táí kodo jajaikaitagi, uta uwa ko uta mene-tai bageepa.”

⁴²Tijake Jesus eteete mana, „Ikii kapogeije duba ebatai beu, mee? Owaa mige-tai bagee ka jamo jaikita mogo kodo Owaa butu ka kabo makita mogo pigu tijawita. Kii ke Tuhanja kei tijake Inii pekaida apai agijo

⁴³Okai kouja ani kitii, Ugatameja jakimakita makiida ikeepa make kijamotijake uta gojawe-tai tumaapa wo menijawii.

⁴⁴Meija kou mogo maida gootipi, juma duwadaa. Kodeja mogo kodaa mijo etagimai bagee tagi tidaa.”

⁴⁵Imam iboudo ma Parisi ma okaija ena dani awe-tai mana juwijake, okei maida make jawegaagi gamakai.

⁴⁶Kodeja ejakimakaine tijake me wedaba kede weda egai. Jesus kidi gokobaki tijawiidaiga wega-tai me okei egajake kouja.