Read Ekari MATIUS 24 Bible Online

MATIUS 24 - Ekari bible

MATIUS 24

¹Jesus Ugatameja owaapa make podomijake uweetigo gaa etope-taido okaapa mejake Ugatameja owaa migitaido emuwakaine mei.

²Kodeja okai wo eteete mana, „Keido kei ikii dooga kei ke, mee? Beu maa kou ani kitii, kiija mogo kato mogo maida te tojake bogomidaa to taitai,” etii.

³Okai Zaitun Dimiida animaki-toojogo etope-taido okeiniinii okaapa mejake eteete mana, „Menoka putu duwadoke taita gaa kodo niti-niimai. Daana akija meitageida ma, wiwitiida gaa ma tegee dou agijo magijo ewaa kaita?” etii.

⁴Tijake Jesus wo eteete mana, „Epeepite gai, me ka uneune ti kitijawe-tita.

⁵Me wedaba aneeka dubaiga meitai kouja, wegaate mana, ’Ani ki Keristus kidi,’ daana okei me wedaba uneune etijawiitai.

⁶Daana jape makeete ma, jape mana ma ikii juwiita. Kodeja gootoki te tai. Ewaa kidaa tai beu kai peu kouja; kodeja kou ko wiwitiida ko beu gaa.

⁷Me tumaana ka tumaana ma akaije akaate taitai, daana jakimakita makiida ka joko ka jakimakita makiida ma akaije. Kiida kouda naidi uwa ma, maki pigi ma potu tidaa taita.

⁸Okai kou ko gaagaa agijoudo edoga makidaa.

⁹Okai kou gaa kodo peepu kitaine keekegajawijake kigimakaitai. Daana me tuma tumaija aneeka maida make be kigaitai.

¹⁰Tijake me wedaba duwaa-duwaa tijake me idaana ka me idaana eekegajawii ma, be akaga dimi ma.

¹¹Puja mana wude-tai bagee ewaa kijake me wedaba uneune etijawiitai.

¹²Peu abuma kidaa tijake kouja me wedaba ipa dimi ko beu kidaa tai.

¹³Kodeja meija wiwitiida to bida peu tomakipi ko, ajii taitagi.

¹⁴Daana Ugatameja jakimakita makiida ka ajii mana kodo uwoje makije ugo uwikumiitai, me tuma tumaija jawegaate. Tijake wiwitiida kodo kaita.

¹⁵Okai kouja, gokobaki tijawiidaiga wegai tita me Daniel kidi wegata ka kigikuwa tijawii ka nokii agijo dáida joonitoojogo ikii dopa ko, (kapogeije doote me kidi epeepite gai),

¹⁶okai kou gaa kodo Judea dokoo ka bagee dimi katouda okii.

¹⁷Owaimouda toutagi me owaa duba agijo motiine mijouwe te kai.

¹⁸Daana taida toutagi me kidi eba wo te motigou.

¹⁹Ipa no! modaago bagee ma, jokaago bagee ma, okai kou wagi kodo.

²⁰Oo uwa juwa, Sabbat naago juwa, te oke-tijake ikii sembahjang ediimai.

²¹Okai kou gaa kodo tetepepe peijo potu taita kouja, maki ugataida make ito to utuuja ewaa kai beu mana, daana kou wadouto maija ewaa te kaita.

²²Okai kou wagi kodo pini taawii naako, me idaana ma petii te tija. Kodeja ewitokita bagee maida make kou wagi kodo pini awii.

²³Okai kou gaa kodo me ka kiteete mana, ’Edowei, kii Keristus kidi’, juwa, ’Kouja topi’ juwa, kitipai ko, ikii maakodo te egai.

²⁴Keristus puga ma, puja mana wude-tai ma ewaa kidaa tijake ibo dou beu agijo ma, ego takuu-takuu agijo ma ewaa awiitai, ewitokita bagee maija uneune etijawiipage, mee? gajake.

²⁵Kojoka gai, kei tidoke beu gaa kodo ani kiteega.

²⁶Okai kouja, okeija ka ’Edowei, okai gei tapa topi’, kitipai kouda kodaa te podomai. Juwa, ’Edowei, kugu duba topi’ kitipai, ikii maakodo te egai.

²⁷Wakibego awii jato make uwai jato to tekebego wakibego dani bukaa, okai kou dani maija me Joka meitagiida gaa.

²⁸Katouda má jato topa ko, okai kouda kodaa bedowagija kotuu tigoo.

²⁹Kodeja kou gaa ka tetepepe ibo ko wadouto, okai kou gaa kodo meuka wanee kaita, daana agoo kodo pa te timakaita; ijapuudo epa make kigibidaa taitai, daana epa maida ka bidaido maija kigipapa tidaa taitai.

³⁰Okai kou gaa kodo me Joka tegee dou epa maida ewaa kaita, tijake uwoje makije ka tuma tumaija didi gaduwaitai. Me Joka epa maida ka tá kapagu maidaiga meete okei edoutai, bidaidaiga ma, ibo ajiipiidaiga ma.

³¹Mitoopi kuutaka ewe-tijake jaetigo-tai bagee ebadikumiitagi, tijake maki butu uwo butu ewitokita bagee kotuu etimakaitai; kou ko epa kabo makitaida make joko ka aguuda to.

³²Ara uta uti ka ena dani wae-tai mana topii: Bona pakamidaa tijake ije muugu-muugu ti-toojogo, awii uwa kapa keega kodo ikii gai.

³³Okai kou dani maija, kei agijoudo utoma ikii dopa ko, ikii gai, meine ijeida, damoutoopa topi kidaa.

³⁴Beu maa kou ani kitii, kii tuma ki te igaita, kei agijoudo utoma ewaa kai beu gaa ko.

³⁵Epa ma maki ma beu kaita, kodeja anija mana beu te kaita.

³⁶Kodeja kou naago juwa, kou wagi juwa, me idaana ma epi beu, epaawado ka jaetigo-tai bagee na beu, Jokame na beu, kodeja Nakame to.

³⁷Nu tota wagiida danite, okai kou dani me Joka meitagiida maija.

³⁸Uwo degii beu gaa kodaa okei nogoo ma, waka bukii ma, waka eumai ma, Nu owaa jago komaida matakitaida to.

³⁹Daana dimi te gajake uwo pegemijake beu eewita gaa to. Okai kou dani me Joka meitagiida maija.

⁴⁰Okai kou gaa kodo jame ida wija taida aatojake idaana wado ebuki-motijake idaana ejaikidokii.

⁴¹Jagamo ida wija jugee tijaida uta jugee aateetigo idaana wado ebuki-motijake idaana ejaikidokii.

⁴²Okai kouja ikii doutou to tai, ikiija Tuhan meitagi naago ikii ewo kouja.

⁴³Kodeja gai, oma me meipagi gaa owaa ipuwe me epi naako, okai douto-toja, owaa te jakeba-tijake.

⁴⁴Okai kouja ikii na epeepi timakai. Ikii ewouda gaa me Joka meitagi kojoka.

⁴⁵Enanauto ma dimi jago ma kei te-tai me ki meime? owaa douto-tijake jajaikita me, okeija naija agijo menija gaa oowudetita.

⁴⁶Ideide no! kei te-tai ne kidi kei jate-tai me meitagiida okai kou kei teetigo edomakipi ko.

⁴⁷Beu maa kou ani kitii, okaija aagijo taagijo douto-tijake jajaikaitagi.

⁴⁸Kodeja kou danite peu kei te-tai me kidi kegepa duba kii dani mana wegapi, ’Anija kei jate-tai me mei ipee,’

⁴⁹tijake okai ma ookei te-tai bagee wageete go-motii, daana uneune bagee ma oonogoo,

⁵⁰edoutou beu naago, daana gai beu wagi kei te-tai me kidi ibo kidi medoke tijake

⁵¹umina wegedege etijawijake matabe bagee ma enaimo jamo ejaikaitagi. Okai kouda kodaa jege ma egaagede ma to touda.