Read Ekari MATIUS 27 Bible Online

MATIUS 27 - Ekari bible

MATIUS 27

¹Abata digii imam iboudo ma, me iboudo ma utoma mana wegai, Jesus wagiine tijake.

²Buda egadimijake Gubernur Pilatus jumaapa eekegajawigou.

³Eekegajawita me Judas kidi okei wagiine mana wegaate kodo edojake gaagaa tai. Tijake mege jokagaati kede imam iboudo ma, me iboudo ma amo jamenigou,

⁴eteete mana, „Ani peu keega, peu beu me kidi kijaekegajaweega kouja.” Etijake okei joko eteete mana, „Initai, mee? akitai no,” etii.

⁵Tijake kei mege kede Ugatameja owaa duba emigijake okai podomai. Okai uwijake akaato buda dajawijake bokai.

⁶Kodeja imam iboudo ka mege kede motijake wegaate mana, „Kei mege kede mege awijaida awii ko dá; me emo edata mege kouja.”

⁷Kojoka mana wegajake kei megeido ka tapuja kei te-tai maki edai, ojaa bagee emakaida jaawiine tijake.

⁸Okai kouja maki kou ko eka Emo Maki ebateigai, ito kii naago ki maija.

⁹Tijake tikauwa ka gokobaki tijawiidaiga wegai tita me Jermia ka wegata mana kobata, kou ko: Okei mege jokagaati kodo motii, Okai age ko Israil jokaane ka egakijawita.

¹⁰Tijake tapuja kei te-tai ka maki age ke-tijake menita, Tuhanja mana enimakita danite.

¹¹Jesus Gubernur jumaapa jooni-toojogo. Tijake Gubernur egaado eteete mana, „Aki ki Jahudi ejakimake-tai me kidi, mee?” Etijake Jesus eteete mana, „Akija eneege dani,” etii.

¹²Kodeja imam iboudo ma, me iboudo ma ewidogijake okai manaana ma wo etii beu.

¹³Tijake Pilatus eteete mana, „Okeija kawidogeete manaido juwii beu, mee?” etii.

¹⁴Kodeja manaana ma wo etii beu kouja Gubernur kidi ego takuu-takuu umina.

¹⁵Ibo naago kodo Gubernur kidi wanee owaa duba ka me idaana jajaikeigi, okeija ka ediimija me kidi.

¹⁶Okai kou gaa kodo epa peu me idaana eka ki Barabbas ejakimaki-toojogo.

¹⁷Me wedaba kede kotuu timakijake, Pilatus eteete mana, „Ikii meime ide ani kijajaikai? Barabbas, mee? Jesus, Keristus eebateigai me kidi,” etii.

¹⁸Okei be egajake kouja eekegajawii okai epi kouja.

¹⁹Okai boko peta-taida animaki-toojogo jagamome okaapa ebadikumijake eteete mana, „Enaa me maida make kiija tumaana ma te kei tai, ito naago bagume dubaiga okai maida make gaduwai umina tipa kouja,” etii.

²⁰Imam iboudo ma, me iboudo ma ka meido kodo monoo etai, Barabbas jajaikai ediime-tijake, daana Jesus wage-tijake.

²¹Tijake Gubernur kigeena ma wo eteete mana, „Kei wija kei kawi ki ide ani kijajaikai ko?” Etijake joko eteete mana, „Barabbas kidi,” etii.

²²Tijake Pilatus eteete mana, „Keetigo ko, ani magijo Jesus kidi, Keristus eebateigai kidiipa kei etai ko?” etii. Tijake okei utoma eteete mana, „Pija boko maida edajawii,” etii.

²³Tijake Pilatus eteete mana, „Má peu agijo kei tijake ka?” etii. Kodeja okei umina emeeme teete mana, „Pija boko maida edajawii to tai.”

²⁴Pilatusja mana epa beu kijake, tetepepe ewaa kaineega dojake uwo motii. Me kotuu pekaida gane witogeete mana, „Kii me ki emo kou maida ani peu beu. Ikii dokiwei,” etii.

²⁵Tijake me utoma wo eteete mana, „Okaija emo kou ko inii wado ma inii jokaane wado ma dokeenii enaa!”

²⁶Tijake okai Barabbas jajaikai. Kodeja Jesus godijai etijake pija boko maida edajawe-tijake eekegajawii.

²⁷Tijake Gubernurja ka serdado kedaa Jesus owaa duba ouwijake serdado imouto kotuu timakai.

²⁸Kagaba jabeja-motijake emo dani kagaba jamakijawii.

²⁹Dogo buda bubukajake dagi maida kobeigido makita jatijawijake mome maana etikaato ganeida jadokijawii. Okai jumaapa migaakobe etijake ewidogeete mana, „Ei, ajii kodo, Jahudi ejakimake-tai Ibo kidi!”

³⁰Okei epoge etuwajake mome kodo jamotijake dagi maida wagii.

³¹Ewidogijake emo dani kagaba kodo jabeja-motijake okaija makita kagaba jamakijawijake ouwii, pija boko maida edajawiine tijake.

³²Okei podomeetigo gaa, Kireni ka me idaana eka Simon ma akado tai. Kii me kidi pija boko jadoke-tijake tapa-tapa etai.

³³Eka ki Golgota, kou ko, Dagi Mitoo Kotuuda okei dakii tai.

³⁴Tijake utaadijo enege peu uwo ma takaa tijake menii, kodeja igi wagidojake nai beu.

³⁵Okei pija boko maida edajawijake okaija kagaba okei wudii, tipa po momogo tija dani kei tijake.

³⁶Kouda kodaa animakijake edoutoojogo.

³⁷Okaija dagi wado ewidogita mana ebijajake tawajawu: Kii ke Jesus, Jahudi ejakimake-tai me.

³⁸Oma mote-tai wija okai ma enaimo, etikaato meena, akaato meena, pija boko maida edajawii.

³⁹Koudaiga jaweete bagee ka migo kuneewatii tijake

⁴⁰ewidogeete mana, „Jee! Aki ki Ugatameja owaa bogomijawija, daana naago wido to migijawija kidi, aki akaato petii tidodou! Kou danite aki Ugatame Joka keetigo ko, pija boko maida make mijouwe kidodou!” etii.

⁴¹Kou dani maija imam iboudo ma, kapogeije epi bagee ma, me iboudo ma ewidogeete mana,

⁴²„Okai joko ka bagee petii etijawita. Okai akaato petii te timake. Okai Israil ejakimake-tai me kidi. Ito okai pija boko maida make mijouwe kai enaa, inii maakodo egaipage kouja.

⁴³Okai Ugatame maida dimi ekotopijawii. Kou danite Ugatameja ide egapi ko, petii etijawii enaa. ’Ani ki Ugatame Joka’ wegata kouja.”

⁴⁴Okai ma enaimo edajawita oma mote-tai bagee maija okai kou dani ka ewidogai.

⁴⁵Dagi epouda gaa kodaa kou maki utoma wanee kijake kou kodo meuka amouwe dagiida to.

⁴⁶Meuka amouwe dagiida gaa Jesus kuutaka emeeme teete mana, „Eli, Eli, lama sabachtani?” Me manaida awi-toojogo ko, „Ei, anija Ugatame, anija Ugatame, magijo ka najaikeege?” etii.

⁴⁷Okai kouda kodaa joonita bagee wija wido juwijake kei teete mana, „Me kii ke Elias manaa-teete,” wegai.

⁴⁸Okai kou gaa kodaa okeepa ka me idaana tibigi uwijake oobaa motii; enege utaadijo duba tokamijake mome momogiida juku atii; tijake no-tijake menii.

⁴⁹Kodeja joko kaido eteete mana, „Todowei, kou danite Elias mejake petii etijawiipagije beuje, dou no,” etii.

⁵⁰Jesus kigeena ma kuutaka emeeme tijake okaija dimi mana kodo wado ekegajawii.

⁵¹Okai kou gaa kodo Ugatameja owaa bede duwajawita kagaba petaago jupiidaiga wija kai, waiko make wako to. Daana maki pigi-pigi tai, daana mogo akagidaa tai.

⁵²Me oka maija kebadaa tijake jimubeu bagee wedaba anigodaa tai.

⁵³Me oka duba make podomijake Jesus anigojake wadouto jimubeu makijo wadoujo kai, tijake me wedaba kedeepa ewaa kidaa tai.

⁵⁴Serdado migougu me ma, okai ma enaimo Jesus edoutota kede ma maki pigi dojake, daana kei titaido utoma, okei weda gai, eteete mana, „Beu maa kou, me kii te Ugatame Joka kidi ki,” wegai.

⁵⁵Kouda kodaa jagamoudo wedaba maija tojake poto make edoutou. Kou ko Jesus Galilea make eepejake eedadita bagee.

⁵⁶Kou kodo ko Marjam Magdalena ma, Jakub ma Josias ma ukame Marjam ma, daana Zabdi jokaane ukame ma.

⁵⁷Uwaataa digii Arimatea ka tonawi me idaana Jusuf kidi mei. Okai maija Jesus etope-tai idaana.

⁵⁸Kii me kidi Pilatus jumaapa Jesusja má jato ediime-uwii. Tijake Pilatusja mene-tijake etimakai.

⁵⁹Jusuf má jato kodo motigojake jimubeu enaa kagaba ka etonimakai.

⁶⁰Tijake okaija ka ija me oka duba emakijawii, mogo duwimakita duba. Tijake mogo peijo me oka damoutoopa taki atijake uwii.

⁶¹Kouda kodaa Marjam Magdalena ma, joko ka Marjam ma, me oka watija kodaa aanimakeetigo.

⁶²Aweetaa naago kodo, kou ko epeepi tita naago muumai tijake, imam iboudo ma, Parisi bagee ma Pilatus jumaapa kotuu timakai.

⁶³Eteete mana, „Ei, Tuan, inii gaage, uneune tijawe-tai kidaa ija tota gaa wegata mana, ’Uno wido umijake ani anigouta,’ wegata.

⁶⁴Okai kouja naago wido kei nijadoutoote bagee nijaebadikumii, etope-taido gabouga mejake emotigota, daana meidoopa eteete mana, okai bokata bagee jupi make anigopi wegai na kojake. Kou danite edoga ka uneune tijawii ma ko nemouga ka ko wo etige kaita,” etii.

⁶⁵Pilatus eteete mana, „Serdado douto-tijake ouwii. Ikii maa kou doutoote ekowai.”

⁶⁶Okei uwijake me oka bida-bida timakai. Mogo maida tegee dojake edouto-tai bagee „Nijaadoutou” etii.