Read Ekari MATIUS 28 Bible Online

MATIUS 28 - Ekari bible

MATIUS 28

¹Sabbat naago wadouto, kou ko dá putu ka edoga naago awe digii gaa kodaa, Marjam Magdalena ma, joko ka Marjam ma me oka kodo aadoune aamei.

²Okai kou gaa kodo maki pigi umina tidoke tai; Tuhan jaetigo-tai me idaana epaawado make mijo mejake kouja. Me oka takimijawita mogo kodo wo bikimijawijake kou wado animakai.

³Edou ko wakibego dani, daana kagaba ko pokadee waki tidoke.[11]

⁴Douto-tai bagee maija weda gajake pigi-pigi tai, tijake bokata bagee dani kidaa tai.

⁵Tijake jaetigo-tai kidaa jagamo kodoopa eteete mana, „Weda te gai. Ani epi ikii pija boko maida edajawita me Jesus kidi eubaate.

⁶Jakai beu topi; okai anigopi, okaija tika kiteetegi danite. Mewei, emakitaida dodowei.

⁷Tijake tibigi auwijake okai bokata bagee jupi make anigopi mana kodo etope-taidoopa aeti-menai. Daana okai tiga Galilea makijo uwiitagi. Okai kouda kodaa ikii edouta. Daana gai! Ani kiteega,” etii.

⁸Tijake okejai tibigi me okaapa make auwai, weda ma umina ideide ma. Okejai etope-taido aetaine tibigi auwai.

⁹Tijake Jesus okei ma akado tijake eteete mana, „Kojáá,” etii. Jagamo wija kodo okaapa aajawijake okaija bado aejakimakijake migaakobe aatai.

¹⁰Tijake Jesus eteete mana, „Weda te gai. Ani kenekaaneidoopa Galilea dokoo uwii kiteegi, aanaaete-auwai. Okai kouda kodaa okei nadoutai,” etii.

¹¹Okejai auweetigo gaa, kouda doutota bagee wija wido maki okogo jokoujo kijake ewaa kita mana kodo imam iboudo eti-menii.

¹²Okei me iboudo ma enaimo kotuu timakijake mana wegajake serdado mege menii,

¹³eteete mana, „Meido kede kii dani etii: ’Okaija etope-taido wanee jato mejake inii uno umi-toojogo oma emotigo-toogai.’

¹⁴Daana kou danite Gubernur kidi kou mana juwipi ko, inii dabaa etijake ikii enaa keewiitage,” etii.

¹⁵Kojoka okei mege motijake etita kidi danite kei tai. Kii mana muto ito kii naago kidi maija Jahudi bagee jupi wudikumii.

¹⁶Etope-tai ena ma gaati kede Galilea uwii, Jesusja etita dimi katoudaapa.

¹⁷Okei Jesus edojake migaakobe etai. Kodeja me ino ke dimi takaida kai.

¹⁸Jesus okeepa mejake okei ma mana oowegajake eteete mana, „E bida te bida epaawado ka ma, makiida ka ma ani maida boko naduwajawita.

¹⁹Okai kouja ikii uwijake me tuma tumaija anija etope-tai naawii, daana Nakame ma, Jokame ma, Rohulkudus ma eka dubaiga baptis etai.

²⁰Anija kitimakeetega mana manaija dijo do-tijake etopai. Epeepite gai, ani ki ikii wa enaimo, kii kidi wiwitiida naago to.”