Read Ekari MATIUS 9 Bible Online

MATIUS 9 - Ekari bible

MATIUS 9

¹Tijake Jesus koma matakijake peku adii. Adijake okai kidaa makijoopa uwii.

²Tijake me ka bado ekogadaa tita me idaana uno umii kejage maida edokijake oomei. Okeija ka maakodo gai kodo Jesus jadojake, bado ekogadaa tita me kidiipa eteete mana, „Kegepa tipinimaki, ei, ani joka. Akija peu awitaido ipa kajaikidokii,” etii.

³Tijake kapogeije epi bagee wija wido munouga to gaawe teete mana, „Kii me kii ke Ugatame eduwaate,” dimi gai.

⁴Kodeja Jesus kidi okeija gaate dimi epi kouja eteete mana, „Magijo ka ikii munouga to peu dimi gaate?”

⁵Kawi ka ki ekowadoke, „Akija peu awitaido ipa kajaikidokii etii ki, mee? ’Anigojake uwina ti’ etii ki.

⁶Kodeja me Joka makiida kiija peu awitaido ipa ejaiketijake boko jaduwajawita me kidi ikii epi ke-tita” — tijake bado ekogadaa tita meepa eteete mana — „Anigou; akija uno umii kejage dokijake owaapa uwii,” etii.

⁷Tijake okai anigojake okaija owaapa uwii.

⁸Kou kodo me wedaba dojake weda umina gai. Okei Ugatame muta etuwai, kou danite meepa bida bokouto jaduwajawita kouja.

⁹Kouda kodaa make wo uweetigo, me idaana eka ki Matius mege kotuu te-taida animaki-toojogo edou. Tijake okaapa „Naapei,” etii. Okai joonidoke tijake eepei.

¹⁰Owaa duba animakijake nootigo gaa, mege kotuu te-tai begee ma, peu bagee wedaba ma mejake, Jesus ma etope-taido ma enaimo animakai.

¹¹Parisi bagee edojake, etope-taidoopa eteete mana, „Magijo ka kitope-tai me kidi mege kotuu te-tai bagee ma peu bagee ma enaimo noote?” etii.

¹²Kou mana kodo Jesus juwijake eteete mana, „Bida bagee doktoda dimi te egaja, kodeja didi bagee to.

¹³Kou mana muto dimi gaate uwei: Ani ide gata agijo ko ipa dimi boko kodo; jo-menii agijo ko beu. Ani enaa bagee ebukaine mei ko beu, kodeja peu bagee ebukaine mei,” etii.

¹⁴Tijake Jahjaja etope-taido mejake eteete mana, „Magijo ka inii ma Parisi bagee ma kigi inoudo te nai dijo do-tai, kodeja akija etope-taido ko beu?” etii.

¹⁵Tijake Jesus eteete mana, „Waka bukeete me kidi ogaaneido ma toojogo gaa kodaa, okei kogaa gaja, mee? Kodeja putu naago kaita kodo, waka bukeete me okeepa make beu kijake, okai kou gaa kodo okei te nai dijo doutai.

¹⁶Me idaana ka doga kagaba maida ija kagaba te puumija; puumita kodo ko doga kagaba maida make kigibidaa tija kouja, tijake umina kigibeenija.

¹⁷Kou danite maija ija utaadijo doga kado tapuja duba te wagaawija; kado tapuja wigodoke tijake utaadijo tuumidoke tai kouja, daana kado tapuja peu kai. Kodeja ija utaadijo ija kado tapujaida wagaawija kodaa, tijake okejaija mobu tou to.”

¹⁸Kou mana muto kodo wegaatigo gaa, me ibo idaana mejake okai jumaapa migaakobe eteete mana, „Anija jagamo joka bokaaga. Gane okai maida jamakiine mei kadiimai, ija kaipiga kojoka,” etii.

¹⁹Jesus joonijake eepei, etope-taido ma enaimo.

²⁰Jagamo idaana emo to ume-ume teete didi taun wija ma gaati umita nemouga mejake Jesus bado jato kagaba jawinikidou.

²¹Okaija dimi gajake, kou danite ani okaija kagaba jawinikidopa ko ani didi beu kaipiga kouja, gai.

²²Jesus wouga wakouga tijake edojake eteete mana, „Ei, ani joka, kegepa tipinimaki. Akija maakodo gai kodaa didi beu keege,” etii. Tijake okai kou gaa kodo maija jagamo kodo didi beu kai.

²³Jesus kidi me ibo owaapa dakii tijake mitoopi teete bagee ma, me wedaba nogee umina teete ma edou.

²⁴Tijake eteete mana, „Bikimiwei, joka kodo bokai beu, kodeja uno umeete,” etii. Tijake okei ewidogeete odijai etai.

²⁵Kodeja meido kodo juwouda epodomijawijake, Jesus jokoujo kijake gane ejakai, daana joka kodo anigou.

²⁶Kou mana muto kodo kou maki bobe ugo uwidoke tai.

²⁷Kouda kodaa make uweetigo peka wanee okejai wija aepejake emeeme aeteete mana, „Ei, Daud Joka, ipa nigai,” aetai.

²⁸Owaapa wadoujo kijake peka wanee kita wija okaapa aamei. Tijake Jesus eteete mana, „Ani kou agijo kei timakija mana ko ikai maakodo aanagai, mee?” Etijake joko aeteete mana, „Ii, Tuhan,” aetai.

²⁹Tijake okejaija ka peka jawinikidojake eteete mana, „Ikaija maakodo aanagaaga kodo danite kei tidoke ti,” etii.

³⁰Tijake okejaija ka peka enaa kidaa. Jesus umina maa kou etimakeete mana, „Epeepite gaawe-tai, kii mana ki me idaana ma epi te eewii,” etii.

³¹Kodeja okejai aapodomijake kou maki bobe mana ugo auwikumai.

³²Okei uweetigo manaawo enija jago me idaana me ka Jesuspa oomei.

³³Enija jaemigimakijake manaawo me kidi mana godai. Tijake me utoma ego takuu-takuu tijake wegaate mana, „Israil makiida kii mana muto dou beu agijo,” wegai.

³⁴Kodeja Parisi bagee wegaate mana, „Enija ukauto kodaa okai enijaido jaemigimakeigi kou ko,” wegai.

³⁵Maki okogo utoma ibo ma mijo ma Jesus uwina. Sembahjang owaido duba meido etopai, daana jakimakita makiida ka ajii mana wudii, daana didi bagee ma debuu bagee ma beu jaawii.

³⁶Me wedaba kotuu timaki-toojogo edojake okai ipa umina egai, okei gaagaa ma, uneune ma, domba dani, ooto-tai bagee beu kijake.

³⁷Tijake etope-taidoopa eteete mana, „Duwai agijo maa kou wedaba kodeja duwai bagee wija to.

³⁸Okai kouja uta ipuwe me kidi ediimiwei, duwai bagee duwa-taida ebadikume-tita tijake.”