Read Ekari MARKUS 11 Bible Online

MARKUS 11 - Ekari bible

MARKUS 11

¹Okei Jerusalim kapauto kijake Baitfagi ma, Baitani ma kodoopa, Zaitun Dimiidaapa make Jesus etope-tai wija ebadikumii,

²eteete mana, „Ikai doodouga maki okogoopa auwai; kouda wadoujo aakijake ko keledai joka egadimi-toupagi aadoupiga; me idaana ma edokai beu kidi; aekegajawijake aanaaoomei.

³Me ka ’Magijo aakei teete?’ kitipai ko, ikaija aetai ko, ’Tuhan gai peu kodaa. Egaa amo kaaoojawiipagi’ aetai,” etii.

⁴Auwijake keledai joka juwouda ita maida damoutoopa egadimi-toojogo aadomakai, tijake buda aekegai.

⁵Kouda kodaa jooni-tota bagee kedaa eteete mana, „Magijo ka keledai joka aekegajawai?” etii.

⁶Tijake okejai Jesusja etipi kidi danite wo aetai. Tijake auwe-tijake ejaikai.

⁷Keledai joka kidi Jesuspa aaoomei. Okeija ka kagaba keledai wado mukajake Jesus kou wado animakai.

⁸Me wedaba okeija ka kagaba ita maida mukajake-tai; daana me ino ko pija imo tuwa-mote tijake ita maida mukajake-tai.

⁹Okei tiga uweete bagee ma, nemouga eepeete bagee ma gaida-gaida teete mana, „Ajii kodo! Tuhan eka dubaiga meete me kidi muta neetuwawei!

¹⁰Muta neetuwawei, iniija aijame Daudja jakimakita maki kodo meete. Ajii kodo, kii waiko monika makijo!”

¹¹Okai Jerusalim ka Ugatameja owaapa wadoujo kai. Kou watija utoma doumigijake uwaataa kouja Jesus Baitani uwii, etope-tai wija ma gaati ma enaimo.

¹²Aweetaa naago, Baitani makijo make okei podomijake okai naidi gai.

¹³Poto dani ara uta uti ije tukuwo dojake uta topa, mee? tijake dou uwii. Okai kouda kodaa dakii tijake utaana ma dou beu, kodeja ije to, uta uwa ko beu kouja.

¹⁴Tijake Jesus wo eteete mana, „Akija uta me idaana ma wado te nai imo kidi to togoo.” Kii mana kidi etope-taido juwii.

¹⁵Okei Jerusalim makijo dakii. Jesus Ugatameja owaa duba wadoujo kijake owaa duba ka akaada te-tai bagee ebakeete gomotii; mege akapaka te-tai bagee ka pejageido maija wadouga mijouga jatijake-tai. Daana wonou kaa te-tai bagee ka animaketitaida maija.

¹⁶Daana me idaana ma tumaana agijo dokijake owaa kodo ekagume-tijake ejaikai beu.

¹⁷Tijake okai etopai, eteete mana, „Beu, mee? kapogeije ebijamakita: Anija owaa kii ko e tuma e tuma sembahjang tetai owaa ebataitai. Kodeja ikii ke oma bagee ka bijo jaikipa,” etii.

¹⁸Kii mana muto ki imam iboudo ma, kapogeije epi bagee ma juwijake wagiine dimi ubai; okei weda egai kouja; meido utoma okaija mana muto ego takuu-takuu kouja.

¹⁹Uwaataa gakita kou maki okogoopa make podomai.

²⁰Okei abata jaweetigo uta uti kodo mani ma denadoke ti-toojogo dou.

²¹Peterus gajake eteete mana, „Kuduu, dododou, akija ewidogeetege ka uta uti kodo denapa,” etii.

²²Tijake Jesus wo eteete mana, „Ugatame maakodo egai.

²³Beu maa kou ani kitii, meija kii bago ki ’Maikai duba wajagidodou’ etijake, kegepa duba bego te ti-toojogo kodeja etipi danite kaipiga bida peu maakidi gamaki-toojogo, kei tidoke tija.

²⁴Okai kouja ani kitii, tumaana agijo ikii sembahjang ediimipa, ikii moteega kodo maakodo ga-toojogo ikii go-motiita.

²⁵Ikii joonijake sembahjang taine gaa, tumaana agijo maida make me idaana be ega-toojogo, ipa ejaikai tiga. Tijake epaawado ka Ikiitai ikiija ka peepu tijawitaido ipa kijaike-tita kodaa.

²⁶Kodeja kou danite ikii ipa te ejaikipa, epaawado ka Ikiitai maija ipa ti kijaikai,” etii.

²⁷Okei kigeena ma Jerusalim makijo wadoujo kai. Jesus Ugatameja owaa duba uwina uwina teetigo, imam iboudo ma, kapogeije epi bagee ma, me iboudo ma okaapa mei.

²⁸Tijake okei eteete mana, „Má bida agijo ka kei agijoudo kei teige? Daana meija bida bokouto kaneemegi, kei manaido kei teige kou?” etii.

²⁹Tijake Jesus eteete mana, „Ani na mana mutoona kigaado taipiga kojoka ikii joko enii. Tijake anija kei teiga bida agijo maija kitiipiga kojoka.

³⁰Jahja baptis tei tita mana kodo epauto ko epaawado make, mee? meepa make. Enidodowei,” etii.

³¹Tijake okei akado wegene teete mana, „Kou danite ’Epaawado make’ etipe ko, ’Magijo ka maakodo egai beu?’ eniipagi kodaa.

³²Kodeja inii ’Meepa make’ etipe ko . . .” okei meido kodo weda egai; meido utoma Jahja kidi maakidi gokobaki tijawiidaiga wegai tita me idaana egai kouja.

³³Tijake okei Jesuspa wo eteete mana, „Inii ewo.” Etijake Jesus eteete mana, „Keetigo ko ani maija kei agijoudo kei teiga bida agijo ko ti kitiipiga,” etii.