Read Ekari MARKUS 13 Bible Online

MARKUS 13 - Ekari bible

MARKUS 13

¹Jesus Ugatameja owaapa make podomijake etope-tai kede idaana ka eteete mana, „Ei, Kuduu, dododou, mogo kei jegeenaka, daana migitaido kei na,” etii.

²Tijake Jesus eteete mana, „kei ibo migitaido kei aki dooge, mee? Kiija mogo kato mogo maida te tojake bogomidaa to taitai,” etii.

³Ugatameja owaapa wouwe Zaitun Dimiida Jesus animakitoojogo Peterus ma, Jakub ma, Jahja ma, andereas ma, okei to tojake egaado teete mana,

⁴„Menoka putu duwadoke taita gaa kodo niti-niimai. Daana putu muumai tidoke taine gaa tegee dou agijo magijo ewaa kaita?” etii.

⁵Tijake Jesus go-motijake eteete mana, „Epeepite gai, me ka uneune ti kitijawe-tita.

⁶Me wedaba aneeka dubaiga meitai, wegaate mana, ’Ani okai kii kidi,’ daana okei me wedaba uneune etijawiitai.

⁷Daana jape makeete ma, jape mana ma ikii juwipa, gootoki te tai. Ewaa kidaa tai beu kai peu kouja; kodeja kou ko wiwitiida ko beu gaa.

⁸Me tumaana ka tumaana ma akaije akaate taitai, daana jakimakita makiida ka joko ka jakimakita makiida ma akaije. Kiida kouda maki pigi taita, daana naidi uwa potu taita. Okai kou ko gaagaa agijoudo edoga makidaa.

⁹Kodeja ikii ke akaato domakai. Okei pika-tai kotuuda keekegajawiitai. Sembahjang owaa duba godijai kitaitai. Gubernur jumaapa ma, maki jakimake-tai bagee jumaapa ma, ani maida make ikii jooniita, mana naawega-tita tijake.

¹⁰Ajii mana kodo me tuma tumaijaapa wudikumii tiga beu kai peu.

¹¹Kodeja ikii mana pika-tai kotuuda keekegajawipai, ikii kawe dani wegaja juwa gaagaa te tai; kodeja okai kou gaa kodaa ete-tijake kinii agijo etii to, ikiija ka etii ko beu kojoka, kodeja Rohulkudus kodaa.

¹²Me ka kenekame boka-tijake eekegajawiitagi, daana nakame ka jokame maija; daana jokaane ka ukame nakame akaije ootijake boka-tijake eekegajawiitai.

¹³Daana utoma bagee aneeka maida make be kigaitai. Kodeja meija wiwitiida to bida peu tomakipi ko, ajii taitagi.

¹⁴Kigikuwa tijawii ka nokii agijo te tojaida kodaa jooni-toojogo ikii dopa ko, (kapogeije doote me kidi epeepite gai), okai kou gaa kodo Judea dokoo ka bagee dimi katouda okii.

¹⁵Owaimouda toutagi me owaa duba agijo motiine mijouwe te kai.

¹⁶Daana taida toutagi me kidi eba wo te motigou.

¹⁷Ipa no! modaago bagee ma, jokaago bagee ma, okai kou wagi kodo.

¹⁸Oo uwa te ke-tita sembahjang ediimai.

¹⁹Okai kou naagoudo kodo tetepepe peijo potu taita kouja, Ugatameja ugajawitaida make ito to utuuja ewaa kai beu mana, daana kou wadouto maija ewaa te kaita.

²⁰Okai kou wagi kodo Tuhanja pini taawii naako, me idaana ma petii te tija. Kodeja okaija ewitokita bagee maida make kou wagi kodo pini awii.

²¹Daana okai kou gaa kodo me ka kiteete mana, ’Edowei, kiija Keristus kidi’, juwa, ’Kouja topi’, juwa, kitipai ko, ikii maakodo te egai.

²²Keristus puga ma, puja mana wude-tai ma ewaa kidaa tijake ibo dou beu agijo ma, ego takuu-takuu agijo ma ewaa awiitai, ewitokita bagee maija uneune etijawiipage, mee? gajake.

²³Kodeja ikii ke epeepite ga-motii. Kei agijoudo utoma kei tidoke beu gaa kodo ani kiteega.

²⁴Kodeja okai kou gaa kodo tetepepe ibo wadouto ko, meuka wanee kaita, daana agoo kodo pa te timakaita;

²⁵ijapuudo epa maida make kigibidaa taitai, daana epa maida ka bidaido maija kigipapa tidaa taitai.

²⁶Tijake me Joka tá kapagu maidaiga meete okei edoutai, bidaidaiga ma, ibo ajiipiidaiga ma.

²⁷Wadoutouga jaetigo-tai bagee ebadikumiitagi, tijake maki butu uwo butu ewitokita bagee kotuu etimakaitai; kou ko maki momogiida make epa momogiida to.

²⁸Ara uta uti ka ena dani awe-tai mana topii: Bona pakamidaa tijake ije muugu-muugu ti-toojogo, awi uwa kapa keega kodo ikii gai.

²⁹Okai kou dani maija kei agijoudo ewaa kidaa teete ikii dopa ko, ikii gai, meine ijeida, damoutoopa topi kidaa.

³⁰Beu maa kou ani kitii, kii tuma ki te igaita, kei agijoudo utoma ewaa kai beu gaa ko.

³¹Epa ma maki ma beu kaita, kodeja anija mana beu te kaita.

³²Kodeja kou naago juwa, kou wagi juwa, me idaana ma epi beu, epaawado ka jaetigo-tai bagee na beu, Jokame na beu, kodeja Nakame to.

³³Epeepite ga-motii. Doutou ma, sembahjang ma. Putu kodo ikii gai beu kouja.

³⁴Okai kou mana kodo me idaana poto makijo uwija dani bukaa. Okaija owaa jaikidokijake jakei te-tai bageepa boko jaduwajawii. Me gakita kei tija agijo nana-nana jawudii. Tijake damoutoopa douto-tai me epeepite douto-tijake etimakai.

³⁵Okai kouja ikii doutou to tai; ikii ewo kouja kawo gaa kou owaa ipuwe me kidi mei ko: uwaataa juwa, wanee juwa, bedo manaano gaa juwa, abata juwa.

³⁶Okai egaa medoke tijake ikii uno umi-toojogo kidomakai na kojoka.

³⁷Anija kiteega mana kou maija ani me utomaapa etimakai: Douto-douto tai mana kodo,” etii.