Read Ekari MARKUS 15 Bible Online

MARKUS 15 - Ekari bible

MARKUS 15

¹Abata digii imam iboudo ma, me iboudo ma, kapogeije epi bagee ma, mana pika-tai kotuu ma mana wegai. Okei Jesus buda egadimijake Pilatuspa eekegajawigou.

²Tijake Pilatus egaado teete mana, „Aki ki Jahudi ejakimaketai me kidi, mee?” Etijake Jesus eteete mana, „Akija eneege dani,” etii.

³Imam iboudo ka mana muto wedaba Jesus ewidogai.

⁴Tijake Pilatus kigeena ma egaado teete mana, „Aki manaana ma wo te etii, mee? Juwidodou, mana muto wedaba aki maida kawidogeete,” etii.

⁵Kodeja Jesus manaana ma wo etii beu kouja Pilatus ego takuu-takuu.

⁶Ibo naago kodo Pilatus kidi wanee owaa duba ka me idaana jajaikeigi, okeija ka ediimija me kidi.

⁷Me idaana eka ki Barabbas kidi okaija ogaaneido ma enaimo wanee owaa duba toojogo, tetepepe ewaa awijake okai me wagimakai kouja.

⁸Meido kodo Pilatuspa uwijake kei teigi danite nijakei tetijake ediimai.

⁹Tijake Pilatus wo eteete mana, „Jahudi ejakimake-tai me kijajaikai ide, mee?” etii.

¹⁰Imam iboudo kede be egajake kouja eekegajawii Pilatus epi kouja.

¹¹Kodeja imam iboudo ka meido kodo monoo etai, Barabbas jajaikai ediime-tijake.

¹²Tijake Pilatus kigeena ma wo eteete mana, „Keetigo ko ani magijo Jahudi ejakimake-tai me eebateegai kidi kei etai ko?” etii.

¹³Tijake okei emeeme teete mana, „Pija boko maida edajawii,” etii.

¹⁴Tijake Pilatus eteete mana, „Má peu agijo kei tijake ka?” etii. Kodeja okei umina emeeme teete mana, „Pija boko maida edajawii to tai.”

¹⁵Tijake Pilatus meido ideide etijawiine tijake Barabbas kidi jajaikai. Okai Jesus godijai etijake pija boko maida edajawetijake eekegajawii.

¹⁶Serdado ka owaapa ouwii, mana pika-tai kotuu ka owaapa kodaa. Tijake serdado imouto kotuu timakai.

¹⁷Okei Jesus maida digijo kagaba jamakijawii, daana dogo buda bubukajake dagi maida kobeigido makita jatijawii.

¹⁸Tijake okei migaakobe eteete mana, „Ei, Jahudi ejakimake-tai Ibo kidi!” etii.

¹⁹Mome ka okaija dagi maida wagii, daana epoge etuwai. Tijake okei bado donimakijake migaakobe etai.

²⁰Ewidogijake digijo kagaba kodo jabeja-motijake okaija makita kagaba jamakijawijake ouwii, pija boko maida edajawiine tijake.

²¹Me idaana mudeida make meetigo, eka ki Simon, Kireni makijo ka me, Iskandar ma Rufus ma nakame kidi; kii me kidi pija boko jadoke-tijake tapa-tapa etai.

²²Eka ki Golgota ouwii, me manaida awi-toojogo ko, Dagi Mitoo Kotuuda.

²³Utaadijo enege peu uwo ma takaa tijake menii kodeja okai motii beu.

²⁴Okei pija boko maida edajawijake okaija kagaba okei wudii. Tipa po momogo tija dani kei tijake okei me gakita aki-motii-motii taine tijake.

²⁵Meuka tegemiida gaa okei pija boko maida edajawii.

²⁶Ewidogai mana kodo okai wadouto kii dani ebijamakita, „Jahudi ejakimake-tai me.”

²⁷Oma mote-tai wija okai ma enaimo etikaato meena, akaato meena pija boko maida edajawita.

²⁸Kou dani kapogeija mana kobadoke tita: Peu bagee ma enaimo egakita.

²⁹Koudaiga jaweete bagee ka migo kuneewatii tijake ewidogeete mana, „Jee! Aki ki Ugatameja owaa bogomijawija, daana naago wido to migijawija kidi,

³⁰aki akaato petii tidodou, daana pija boko maida make mijouwe kidodou!” etii.

³¹Kou dani maija imam iboudo ma, kapogeije epi bagee ma ewidogeete mana, „Okai joko ka bagee petii etijawita. Okai akaato petii te timake.

³²Keristus kidi, Israil ejakimake-tai me kidi ki, pija boko maida make ito ki mijouwe kai enaa, inii edojake maakodo egaipage kojoka,” etii. Okai ma enaimo pija boko maida edajawita kede maija ewidogai.

³³Dagi epouda make kou makiida maki utoma wanee kijake kou kodo meuka amouwe dagiida to.

³⁴Meuka amouwe dagiida gaa Jesus kuutakaa emeeme teete mana, „Eloi, Eloi, lama sabachtani?” Me manaida awi-toojogo ko, „Ei, anija Ugatame, anija Ugatame, magijo ka najaikeege?” etii.

³⁵Okai kouda kodaa joonita bagee wija wido juwijake kei teete mana, „Juwidowei, okai Elias manaa-teete,” wegai.

³⁶Me idaana tibigi uwijake enege utaadijo duba oobaa tokamijake mome momogiida juku atii; tijake no-tijake menii, kei teete mana, „Todowei, Elias mejake mijouwe eewiipagije, beuje, dou no,” wegai.

³⁷Tijake Jesus kuutakaa emeeme tijake ebeejo wo motidoke.

³⁸Ugatameja owaa bede duwajawita kagaba petaago jupiidaiga wija kai, waiko make wako to.

³⁹Serdado migougu kidi okai jumaapa joonita kidi kou dani bokapi mana kodo dojake okai wegaate mana, „Beu maa kou, me kii ke Ugatame Joka,” wegai.

⁴⁰Kouda kodaa jagamoudo maija poto make edoutou. Kou kodo ko Marjam Magdalena ma, weneka Jakub ma Josias ma ukame Marjam ma, daana Salome ma.

⁴¹Okei Jesus eepejake eedadita bagee, okai Galilea toojogo gaa. Daana ino ka jagamoudo maija okai ma enaimo Jerusalim wado uwita.

⁴²Uwaataa kijake, kou naago kodo epeepi timakai naago kodo, aweetaa Sabbat naago kouja,

⁴³Arimatea ka me Jusuf kidi, kii ke mana pika-tai kotuu ka ibo ejaikita me idaana kidi mei. Okai maija Ugatameja jakimakita makiida douto-tai me idaana. Okai uu peu kidi Pilatuspa Jesusja má jato ediime-uwii.

⁴⁴Pilatusja Jesus bokapi mana juwijake ego takuu-takuu. Tijake serdado migougu kidi manaa-tijake, maakidi Jesus bokai tiki, mee? beu tijake etidou.

⁴⁵Serdado migougu kidiipa make epi kijake okai Jesusja má jato Jusuf kidiipa menii.

⁴⁶Jusuf enaa kagaba edajake Jesusja má jato mijouwe eewijake etonimakai. Tijake mogo duwimakita me oka duba emakijawii. Me oka damouto mogo taki atii.

⁴⁷Marjam Magdalena ma, Josias ukame Marjam ma Jesus emakitaida aadou.