Read Ekari MARKUS 6 Bible Online

MARKUS 6 - Ekari bible

MARKUS 6

¹Jesus kouda make uwijake okai kidaa makiida wadoujo kai. Etope-taido maija eepei.

²Sabbat naago sembahjang owaa duba mana etopai. Ejuwita bagee kede ego takuu-takuu umina, eteete mana, „Kii me kii ke kaija make kou mana muto go-moteegi? Kawe dani dimi bokouto menita? Daana ego takuu-takuu agijoudo kei teigi ko boko jato ko magijo?

³Beu, mee? pija kei te-tai kidi ki, Marjam jokame, Jakub ma Joses ma Judas ma Simon ma aikame kidi. Daana beu, mee? panekaane ineepa topai,” wegai. Tijake okei gaagaa.

⁴Kodeja Jesus eteete mana, „Gokobaki tijawiidaiga wegatai me idaana me ka ibo ejaikai, kodeja okaija makiida ma, okaija keneka bagee jupi ma, okaija owaapa ma ko beu,” etii.

⁵Kouda kodaa ego takuu-takuu agijo te kei timake, kodeja didi bagee wija wido dani to gane okei maida jamakijake beu jaawii.

⁶Okeija maakodo gai beu maida make Jesus ego takuu-takuu umina. Kou watija ka maki okogoudo etopeete uwina tai.

⁷Okaija etope-tai wija ma gaati kede manaa-tijake meijaija ebadikumiine go-motii. Enija maida make bida boko jaduwajawii.

⁸Okaija etimakai mana, „Ita maida tumaana ma te dokii,” etii, „kodeja bado kopa to. Goti na beu, agija na beu, daana potó duba mege watakijawii na beu.

⁹Egaida tepatu makii kodeja, kagaba kakade wija te makii.”

¹⁰Tijake eteete mana, „Me ka owaapa ikii wadoujo kipa ikii kouda tojake kouda kodaa make uwii.

¹¹Maki katouda ka bagee ka ti kijakimakipai ko, daana ti kijuwipai ko, ikii kouda kodaa make podomija gaa kodo, bado maida ka maki puugee kigi atidokii, okei dimi ga tijake,” etii.

¹²Okei uwijake me tedemai beu kai peu mana wudii.

¹³Okei enija wedaba jaemigimakai. Didi bagee wedaba jeboo ka widii jatijake beu jaawii.

¹⁴Maki jakimake-tai me Herodes kidi Jesus maida make mana juwii; Jesus eka ugo uwidoke kouja. Tijake Herodesja wegaate mana, „Baptis tei tita me Jahja kidi bokata bagee jupi make anigojake kouja okai duba bida agijoudo ewaa keete,” wegai.

¹⁵Tijake me ino ka wegai ko, „Kii ke Elias kidi.” Daana me ino ka ko, „Mana wude-tai me idaana, tikauwa ka mana wudei tita bagee dani,” wegai.

¹⁶Kodeja Herodes okai kou mana kodo juwijake eteete mana, „Kii ke Jahja kidi ani ogo eduwaatega me kidi. Okai anigopi kojoka,” etii.

¹⁷Herodes kidaa me ebadikumijake Jahja ejakimakita kouja, tijake wanee owaa duba buda egadimigoo amo eewita, kenekame Pilipus kidi waka Herodiah maida make. Herodes waka ebukijake kouja.

¹⁸Jahjaja Herodespa etita mana kouja, „Umina dá didéé kojoka aki kenekaja waka aki waka ebukeemege kou ko,” etita.

¹⁹Tijake Herodiahja Jahja be umina egajake wagimakaine kodeja, te wagimake.

²⁰Herodes kidi Jahja weda egai kouja. Jahja kidi enaa me jimubeu me kijoka epi kouja. Tijake okai edoutou to. Herodes kidi Jahjaja mana ejuwijake gaagaa umina kodeja, okaija mana ejuwai ide.

²¹Enaa wagi kijake, kou ko Herodes pata naago kodo, okai ma enaimo ibo bageido ma, jape migougu mak-tai bagee ma, Galilea dokoo ka ekaago daniido ma, okei buka nai.

²²Kou kei tijake Herodiahja jagamo joka wadoujo kijake gaida-gaida tai, tijake Herodes ma, okai ma enaimo bagee ma ide umina egai. Tijake Herodes api kodoopa eteete mana, „Akija dimi gaipage agijo nadiimai, kaniipiga kojoka,” etii.

²³Okai baita makijawijake eteete mana, „Tumaana agijo nadiimipe ko kaniipiga, anija jakimakita makijo amoonaato kipa maija,” etii.

²⁴Api kodo podomijake ukameepa etido teete mana, „Ani magijo ediimaipiga?” etii. Tijake ukame eteete mana, „Baptis tei tita me Jahja kidi dagi ko ediimai,” etii.

²⁵Okai kou gaa kodaa okai egaa wadoujo kijake maki jakimake-tai meepa ediimeete mana, „Ani ide ito kii gaa kiija baptis tei tita me Jahja kidi dagi ko tapuja dokouda naimi,” etii.

²⁶Maki jakimake-tai me kidi gaagaa umina. Kodeja baita makijake kouja, daana nopaido maida make kouja, okaija ediimipa agijo ekonai beu.

²⁷Okai kou gaa kodaa maija ooto-tai serdado idaana ebadikumii, Jahjaja dagi jamote-uwe-tijake. Okai uwijake wanee owaa duba make ogo eduwai.

²⁸Dagi kodo tapuja dokouda jadoke-mejake api kodoopa menii, tijake api kodaa ukame menigou.

²⁹Kou mana kodo Jahjaja etope-taido juwijake okei má jato motigojake me oka emakijawii.

³⁰Eti-awitaido Jesuspa joko mejake okeija kei tita mana ma, etopita mana ma eti-menii.

³¹Tijake Jesusja, „Mewei,” etii. „Me beuda ikii kede ikiiniinii ee duwajawe-uwii no,” etii. Me wedaba uweike meike kouja okei nai ma peu.

³²Okei komaiga uwijake me beuda okeiniinii kaine.

³³Okei uweetigo me wedaba edojake egai. Okeija maki okogoopa make podomijake adaiga uwii. Okei tibigi tijake okei tiga edouto-uwii.

³⁴Jesus komaida make mijouwe keetigo me wedaba kotuu timaki-toojogo edojake okai ipa egai; okei domba dani, oototai bagee beu kijake. Tijake okai mana muto wedaba etopai.

³⁵Uwaataa digii etope-taido okaapa mejake eteete mana, „Kiija me beu makijo, daana uwaataa keega.

³⁶Meido kodo uwei, neetii, maki okogoodoopa naija agijo eda-tita no. Naija agijo tumaana ma dokii beu kouja,” etii.

³⁷Tijake Jesus wo eteete mana, „Ikii ke naija agijo menii,” etii. Tijake okei eteete mana, „Inii mege muto wido ka goti jaeda-uwii, mee? meido kodo naija agijo meniine ko,” etii.

³⁸Tijake Jesus eteete mana, „Goti magoo topai, do-uwei,” etii. Dojake eteete mana, „Goti kemo idibi ma, binei ida wija ma to,” etii.

³⁹Tijake okeepa eteete mana, „Meido kou kotoona kotoona bopu wado animake-tai etei,” etii.

⁴⁰Tijake okei kotoona kotoona animake-tai, kotoonaida ko mutoona ma mepiija ma, kotoonaida ko gaatibeu tijake.

⁴¹Goti kemo idibi ma, binei ida wija ma, motijake epa maida wado dojake mobu ediimai. Goti utijake etope-taido menii, meido kodoopa jawude-tijake. Binei ida wija kede maija meido kodoopa jawudikumii.

⁴²Okei utoma nojake mobu kai.

⁴³Utita abu kitaija kodo mo-motijake edu tapuja wija ma gaati awimakai, binei kodo maija.

⁴⁴Goti nota bagee jame ida muto muto to ko muto, kou wado maija.[1]

⁴⁵Okai kou gaa kodaa maija okaija etope-taido koma matake-tijake bida peu kidi etimakai, okei tiga Baitsaida makijo ade-tijake; okai kidaa meido uwei eteetigo gaa kodaa.

⁴⁶Okai meido ejaikijake dimiida sembahjang taine uwii.

⁴⁷Wanee kijake koma kodo peku epouda keetigo. Jesus adaida okai kidi to tou.

⁴⁸Ukija tuwajake gita ukii kana kana teetigo Jesus edou. Awiine jato gaa kodaa Jesus okeepa mei, peku wadouga ita meete okei eetigadokiine tijake.

⁴⁹Kodeja Jesus peku wadouga meete okei edojake, enija gajake emeeme tai.

⁵⁰Okei utoma Jesus edojake gootoki umina kouja. Kodeja okai kou gaa kodo mana oowegajake eteete mana, „Ei, kegepa tipinimakai. Ani no. Weda te gai,” etii.

⁵¹Tijake Jesus okeepa komaida wadouwe kijake ukija kodo duwadoke tai. Okei utoma umina maa kou ego takuu-takuu timakai.

⁵²Okei goti menita kodo gai beu tita kouja, daana okeija ka kegepa bida ka.

⁵³Okei adijake Genesaret makijo dakii tijake iteida koma mijimakai.

⁵⁴Okei komaida make mijouwe kijake okai kou gaa kodo meido Jesus edomakai.

⁵⁵Tijake okei kou maki bobe tibigi uwijake didi bagee uno umii kejage maida edoke-mei, Jesus topi wegapaida kodaa.

⁵⁶Okai uwijaida, maki okogo keetigo maija, maki dokoonaapa keetigo maija, mijo maki keetigo maija, didi bagee kede akaada te-taidaapa edokijake Jesusja bado jato kagaba jawinikidoune ediimai. Jawinikidota daniija beu kidaa tai.