Read Ekari MARKUS 7 Bible Online

MARKUS 7 - Ekari bible

MARKUS 7

¹Parisi bagee ma, kapogeije epi bagee ma Jerusalim make mejake Jesuspa kotuu timakai.

²Jesusja etope-taido gane utoopa goti nootigo, gane te witogijake kodaa, okei edou.

³(Parisi bagee ma, Jahudi bagee utoma, gane epi witoge tijake to nai, aijaane muumaane ka mijo makii makii mana dijo doote.

⁴Akaada te-taidaapa make wado mejake maija gane witogai beu ki-toojogo te nai. Daana ino ka mana muto maija jakimakijake dijo dou to; uwaawe ma, awe-tai ma, pute uwaawe ma, witoge-tai kou maija.)

⁵Tijake Parisi bagee ma, kapogeije epi bagee ma eteete mana, „Magijo ka akija etope-taido kede aijaane muumaane ka mijo makii makii mana dijo dou beu, kodeja gane witogai beu tijake goti no-tai?” etii.

⁶Tijake Jesus wo eteete mana, „Umina maakidi ikii matabe bagee maida make Jesaja douja kijadojawita, kapogeija ebijamakita danite: Kei bagee ebe ka to ibo najaikai kodeja, Kegepa ko aneepa make poto.

⁷Okeija migaakobe natai wogidaa ibo, Me ka kuba-mote mana okei etope-tai kouja.

⁸Ugatameja mana ikii jaikidokii; me ka kuba-mote mana ikii jakimakaine tijake,” etii.

⁹Daana kigeena ma eteete mana, „Beu maa kou, ikii Ugatameja mana ekonai, ikiija mijo makii makii mana dijo doune tijake.

¹⁰Musaja nitimakita kouja: Akaitai akuukai ibo ejaikai. Daana: Meija nakame ukame ewidogipi, wagigoo jamaawija.

¹¹Kodeja ikiija ka wegai ko, ’Me idaana ka nakame juwa, ukame juwa, eteete mana: Aneepa make motija agijo ko Korban’ (me manaida awi-toojogo ko, Ugatameepa menii) eti-toojogo ko,

¹²okai tumaana agijo ma nakame ukameepa te jakei tija.

¹³Ikiija ka mijo makii makii mana maida kouja Ugatameja mana beu puga tijawii. Kou dani manaido wedaba ikii kei teiga,” etii.

¹⁴Jesus me wedaba kodo manaa-tijake eteete mana, „Ikii utoma najuwijake gaawe-tai!

¹⁵Tapouda make me duba amoujo kija agijo tumaana ma me peu taawija. Kodeja me duba make podome-tai agijo kouja me peu eewii.

¹⁶Meija juwe-tijake gapa jago kipi juwii to tai,” etii.

¹⁷Okai meido ejaikidokijake owaapa wadoujo kai. Etope-taido mejake ena dani awe-tai mana kodo maida make etidou.

¹⁸Tijake okai eteete mana, „Ikii maija gai beu keega, mee? Ikii gai beu, mee? tapouda make tumaana agijo me duba amoujo ki-toojogo peu taawija.

¹⁹Kegepa duba amoujo kai ko beu kouja, kodeja modo duba kijake podomijawii.” (Kii dani tijake naija agijo utoma pijo awii.)

²⁰Tijake kigeena ma eteete mana, „Me duba make podometai agijo, kii kidaa peu eewija.

²¹Tugouda make, kou ko kegepa duba make no te, peu dimi ewaa kai; utoopa wo uwe, oma, me wagii,

²²mogai, kibigi gaawe, peu agijo, puja mana, dimi mogai, me peu eewiine dimi, me eduwai, ibo puga, me dimi beu;

²³kei peudo kei ke tugouda make ewaa kijake me peu eewii,” etii.

²⁴Jesus kouda kodaa make uwijake Sur ma Sidon ma dokoo uwii. Owaa katoopa wadoujo kijake okaija dimi me idaana ma epi te ke-tijake kodeja, te boonimake.

²⁵Jesus topi mana egaa jagamo idaana juwii, jokame enija jago kodo. Okai mejake Jesus jumaapa mijouga kai.

²⁶Kou jagamo kodo Gerika ka jagamo, Siro Puniki makijo ka. Jokame duba make enija jaemigimake-tijake ediimai.

²⁷Kodeja jagamo kodoopa Jesus eteete mana, „Jokaido tiga mobu eewii enaa. Jokaido ka goti jamotijake dodi jamo menii ko peu,” etii.

²⁸Tijake jagamo kodo wo eteete mana, „Maa kou, Tuhan, kejage mijo ka to-tai dodi kodaa jokaido ka puugeido kodo mo-no-tai kouja,” etii.

²⁹Tijake Jesus eteete mana, „Akaa eneege mana kiija uwii. Aki joka duba make enija podomidoke no,” etii.

³⁰Jagamo kodo okaija owaapa dakii tijake jokame kodo uno umii kejageida toojogo edomakai, enija okai duba make podomijake.

³¹Jesus Sur makijo podomijake Sidon makijouga jawii. Okai Galilea pekuuda dakii tai, Dekapolis makijo wokaato kijake.

³²Gapa daba ma, mana momo ma me idaana kidi me ka oomei; gane okai maida jamake-tijake okei ediimai.

³³Me wedaba kodoopa make okainiinii eewijake, gapa dubaiga kipo amo jaawii. Epoge tuwajake eta jawinikidou.

³⁴Epa maida wado dojake eeki tijawijake eteete mana, „Eppata.” Kii me manaida awi-toojogo ko, „Kadidoke tidodou.”

³⁵Okai kou gaa kodaa maija gapa kebadoke tai, daana eta mana godadoke. Tijake epeepite mana wegai.

³⁶Tijake Jesus bida peu kidi etimakai, okai kou mana kodo me idaanaapa ma te ete-tijake. Okai gabo etijake kodeja okai euga umina kou mana kodo wegakumii.

³⁷Meido umina maa kou ego takuu-takuu timakijake eteete mana, „Okaija kei tigi agijoudo umina enauto. Gapa daba bagee gapa jakebajawii, daana manaawo bagee mana jagodajawii kouja,” wegai.