Read Ekari MARKUS 9 Bible Online

MARKUS 9 - Ekari bible

MARKUS 9

¹Jesus eteete mana, „Beu maa kou ani kitii, jakai me ida wija wido jooni-topai, okei Ugatameja jakimakita makiida bida boko ma meitaida dou beu gaa te bokaitai,” etii.

²Uno benumi umijake Jesusja Peterus ma, Jakub ma, Jahja ma ouwijake ibo bagouda okei to oopatikai. Okeija pekaida Jesus iginikiniki tidoke.

³Okaija kagaba maija wakijo umina tijake ataati tidoke tai. Makiida ka kagaba witoge-tai me idaana ma kou danite pokade taawija.

⁴Elias kidi Musa ma enaimo ewaa aakijake Jesus ma mana oojawegai.

⁵Tijake Peterus Jesuspa eteete mana, „Ei, Kuduu, inii jakai tope ko enaa no. Inii owaajokaa wido kijamigiipage; ena ko aki ipuwe, ena ko Musa ipuwe, ena ko Elias ipuwe,” etii.

⁶Kawe dani mana etii ko okai ewo kouja; okei weda umina gajake.

⁷Jabai kapagu ka eepumijake jabai duba make mana wuu eteete mana, „Kii ke ani Joka didé. Okai ejuwai to tai,” etii.

⁸Okai kou gaa kodaa maija okei wado doumigijake me idaana ma edou beu, kodeja Jesus to okei ma enaimo.

⁹Okei bagouda make mijouwe keetigo Jesus bida peu etimakai, dopai agijo kodo me idaana ma te ete-tijake, me Joka bokata bagee jupi make anigoutagiida to.

¹⁰Kii mana muto kegepa duba awijake okei kede akado wegene teete mana, „Kii ke kawe dani mana muto no? bokata bagee jupi make anigou mana kodo,” wegai.

¹¹Tijake okei Jesus egaado teete mana, „Magijo ka kapogeije epi bagee ka ’Elias tiga meitagi’ wegaigai?” etii.

¹²Tijake Jesus wo eteete mana, „Maakidi, Elias tiga mejake utoma agijo utoma titaaki tijawii. Kodeja kawe dani me Joka maida make kapogeije ebijamakita mana okai gaduwai umina taitagi, daana me ka peu eewiitai?

¹³Kodeja ani kitii, beu maa kou, Elias meta kodeja, okeija ka dimi gata danite etijawita, okai maida make kapogeije ebijamakita danite,” etii.

¹⁴Okei etope-taidoopa dakii tijake me wedaba ka ebobimakitoojogo edou. Kapogeije epi bagee mana wo wegai jamo wegai teetigo.

¹⁵Okai kou gaa kodaa meido ego takuu-takuu umina, okei Jesus edojake, daana okei tibigi to okaapa mejake kipo emotai.

¹⁶Tijake okai egaado eteete mana, „Má mana muto kii me ki ma akaije ooteete?” etii.

¹⁷Kou meido kodo jupi ka me idaana eteete mana, „Ei, Kuduu, ani joka akeepa oomeega, manaawo enija jago kodaa.

¹⁸Enija kodaa okai duba awidoke ti-toojogo wo gojawii amo gojawii etai. Ebeida ukouko edidaa ma, egaagede ma, daana otomidoke teike. Akija etope-taidoopa enija jaemigimakai ediimeega kodeja, okei kaga,” etii.

¹⁹Tijake Jesus wo eteete mana, „Kowaa kei, maakodo gai beu tuma, uno magoo ani keetouta? Daana kigi magoo kojáá kidoutouta? Aneepa oomei,” etii.

²⁰Okai joka kidi oomei. Enija Jesus edojake okai kou gaa kodaa maija enija kodaa joka kidi juma duwajake etai. Okai maki maida wo gojawii jamo gojawii etai; ebeida ukouko umina etijake tai.

²¹Tijake Jesus joka kidi nakame egaado teete mana, „Agoo magoo dani kii dani tidoke tijake topi?” etii. Tijake joko eteete mana, „Jokaida kidaa make.

²²Daana bodija duba ma, uwo duba ma nakuu etai umina, wagimakaine. Okai kouja aki kei timake keetigo ko, ipa nigajake needadai,” etii.

²³Tijake Jesus wo eteete mana, „Kawe dani tijake ’kei timake’ eneege kou ko? Utoma agijo maakodo gai bageepa jakei timakija,” etii.

²⁴Okai kou gaa kodo maija nakame emeeme tijake jege teete mana, „Ei, ani maakidi kagai. Anija maakidi te kagai dimi ko naadadai,” etii.

²⁵Kouda kodaa me wedaba tibigi kotuu timakeetigo Jesus edojake nokii enija kodo emoge eteete mana, „Kowaa ke, manaawo ma gapa daba ma enija, ani katii, aki me ki duba make podomi, daana metaato amoujo te kai,” etii.

²⁶Enija emeeme ma podomeete jato joka kidi juma eduwajake-tai umina, tijake joka kidi bokaagi dani tidoke tai, tijake me wedaba ka „Bokaagi” wegai.

²⁷Tijake Jesus gane ejakijake wado ebukijake okai anigou.

²⁸Owaapa wadoujo kijake etope-taido to tojake egaado teete mana, „Magijo ka inii enija te jaemigimake?” etii.

²⁹Tijake okai eteete mana, „Kii bagee tumaana ka te epodomijawija, kodeja sembahjang ka to,” etii.

³⁰Kouda kodaa make uwijake Galilea makijo wokaato kai. Jesus topi kou ko me epi kai okai ide beu.

³¹Okai etope-taido etopeete kojoka, eteete mana ko, „Me Joka kidi me ka ganeida eekegajawiitai, tijake okei wagimakaitai. Wagijake ko uno wido umijake anigoutagi,” etii.

³²Kodeja okei kou mana kodo gai beu, daana egaado tai weda gai.

³³Okei Kapernaum makijo uwii. Jesus owaa wadoujo kijake okai etope-taido egaado teete mana, „Ita maida make mana wegaaga kou ko magijo?” etii.

³⁴Kodeja okei mana godai beu tijake gabo tou. Okei jupi meime ibo, ita maida make akaije akaate kouja.

³⁵Jesus animakijake etope-tai wija ma gaati kede manaa-tijake eteete mana, „Me idaana okai tiga kaine ga-toojogo, nemouga puki kai beu kai peu, daana utoma bageepa jakei tai,” etii.

³⁶Tijake okai joka idaana ebukijake okei jupi ejoonijawii. Okai ejupugijake eteete mana,

³⁷„Meija joka kii danite aneeka dubaiga ejakimakipi, okai najakimakai. Daana meija najakimakipi, okai ani najakimakai beu kodeja, okai nabadikumita me ejakimakai,” etii.

³⁸Tijake Jahja eteete mana, „Kuduu, inii me idaana edou, inii neepei beu bagee, aki eka dubaiga enija jaemigimakai. Tijake inii beu etipe, okai neepei beu kouja,” etii.

³⁹Kodeja Jesus eteete mana, „Beu te etii. Meena ma beu bida agijo aneeka dubaiga ewaa awijake odigaa gaa ko nawidogai ko.

⁴⁰Akaije ti nitai bagee iniija noogei kouja.

⁴¹Meija uwo no-tijake kinipi, ikii Keristus ipuwe kouja, beu maa kou ani kitii, okaija petege umina te igaita.

⁴²Meija ani maakidi nagata daba bagee kede idaana monoo etipi, okai kii me kidi ki ogo maida ibo mogo gadimijake maikai epouda eemigimakai enaa.

⁴³Daana akija gane ka peu mejawipi duwakumii. Gane wijaago imo to togoo bodijaapa uwii ma ko, gane enakaato to ajii tai wadoujo kai enaa.

⁴⁴Kouda kodaa temege maija te bokajaida kodo, daana bodija maija te dinijaida.

⁴⁵Daana akija bado peu mejawipi duwakumii.

⁴⁶Kou danite bado wijaago kadaga bodija kaemigimakai ma ko, kotiidogo ajii tai wadoujo kai enaa.

⁴⁷Daana akija peka ka peu mejawipi gobakumii. Peka wijaago kadaga bodija kaemigimakai ma ko, peka enakaato to Ugatameja jakimakita makiida wadoujo kai enaa.

⁴⁸Kouda kodaa temege maija te bokajaida, daana bodija maija te dinijaida.

⁴⁹Utoma bagee utoma bodija ka diga wagija wagiitai kouja.

⁵⁰Diga enaa, kodeja diga kodo igi beu ki-toojogo, kawe dani tijake digaigijo awija? Ikii duba diga awii to tai, daana ikii utoma kojáá tou to tai.”