Read Ekari LUKAS 10 Bible Online

LUKAS 10 - Ekari bible

LUKAS 10

¹Wadoutouga Tuhan me ino me ida gaati ka wija epaapa etijawijake okaapa make me wijaija ebadikumii, maki gakita okai kidaa jawiineida.

²Daana okeepa eteete mana, „Duwai agijo maa kou wedaba kodeja duwai bagee wija to. Okai kouja uta ipuwe me kidi ediimiwei, duwai bagee duwa-taida ebadikume-tita tijake.

³Ikii uwii to tai! Dodowei! Ego jago jina jupi domba joka dani bukaa kibadikumii.

⁴Potó te dokii, agija na beu, bado awii na beu. Ita maida me idaana ma mana te oowegai.

⁵Ikii wadoujo kai owaapa edoga kidi etii ko: Kojáá bokouto kii uguwo maida kidou!

⁶Kojáá dimi gata me topi ki, ikiija kojáá mana okai maida kaita, kodeja beu topi ko ikeepa joko meita.

⁷Kou owaapa tojake kijamakita agijo nai to. Kei te-tai me kidi ageja motija kouja. Owaanaapa make owaanaapa te tai.

⁸Maki enaapa woujo kijake meido ka mei kitipai kijamakita agijo nai.

⁹Kouda ka didi bagee beu jaawii, daana kii dani etii: Ugatameja jakimakita makiida kapa keega.

¹⁰Kodeja ikii maki katouda woujo kijake me ka mei ti kitipai, ita maida podomijake etii ko:

¹¹Ikiija makijo ka maki puugee kodo maija iniija bado maida topi tita kodo, inii ikeepa kigi kijatijawii. Kodeja ikii gai: Ugatameja jakimakita makiida kapa keega!

¹²Ani kitii, okai kou naago kodo kou makiida ka peu kai kodo ma ko, Sodom ka peu kai kodo egaida.

¹³Aki peu kaineege no, ei, Chorazin! Aki peu kaineege no, ei, Baitsaida! Kou danite Sur ma Sidon ma duba ego takuu-takuu agijoudo ewaa awii naako, ikii duba ewaa awita dani bukaa, okei tika kodaa make tedemi-toja, me peuda kagaba makijake gako duba animakijake ko.

¹⁴Kodeja boko petai naago ikii ma ko Sur ma Sidon ma peu kai kodo egaida.

¹⁵Daana aki ki, ei, Kapernaum, aki epa maida wadi ti-taitage, mee? Aki ki bokawouda mijouwe kaitage.

¹⁶Meija kijuwipi ani kidi najuwai, daana meija kikonipi, ani kidi nakonai, daana meija nakonipi, nabadikumita me kidi ekonai.”

¹⁷Okei gaati ka wija kede ideide ma joko mei, eteete mana, „Ei, Tuhan, akeeka duba enija maija nijuweemegai,” etii.

¹⁸Tijake Jesus eteete mana, „Teege wakibego danite epa maida make gootai edoomega.

¹⁹Juwidou, ani bida agijo kinii, ugenija ma, puga ka nokogetai jina[2] ma daime-tita tijake, daana jape ka bida agijo utoma maida ko. Tumaana agijo ma peu te keewiita.

²⁰Kodeja okai kou maida kodo ideide te tai, enijaido kijuwai mana kouja, kodeja ikiija eka epaawado ebijamakita kodo ideide tai.”

²¹Okai kou gaa kodo maija Rohulkudus duba ideide timakijake wegaate mana, „Ei, Naitai, nagajaweege, epa ma maki ma boko duwajawita me, aki kei manaido dimi boko jago bagee ma, dimi epi bagee ma keipa make boonijake, jokaidoopa ewaa tapa jaawita. Ei, Naitai, kou dani aki ide gata kouja.

²²Utoma agijo utoma Naitaija naaekegajawita. Daana meena ma Joka kidi edou beu, kodeja Nakame to. Daana meena ma Nakame edou beu, kodeja Jokame to, daana Joka kidaa gajake ewaa tapa jaawiine bagee to.”

²³Jesus wouga kijake etope-taido kedeepa to eteete mana, „Ikii ke ideide no! ikii doote manaido kodo ikiija ka peka kodaa dou kouja.

²⁴Ani kitii kouja, tikauwa ka gokobaki tijawiidaiga wegai tita bagee wedaba ma, maki jakimake-tai bagee wedaba ma ikii do-tai manaido doune tijake didi gai, kodeja dou beu; daana ikii juwe-tai manaido juwiine tijake, kodeja juwii beu,” etii.

²⁵Kapogeije epi me idaana egaado taine tijake joonidake tai, eteete mana, „Ei, Kuduu, ani magijo kei tai, ajii taine no?” etii.

²⁶Tijake Jesus wo eteete mana, „Dijo douja manaida magijo ebijamakita? Kawe dani ebatai?” etii.

²⁷Tijake wo eteete mana, „Akija Tuhan Ugatame kidi kegepa puki ka ei egai, daana dimi mana puki ka ma, daana bida puki ka ma, daana dimi puki ka ma, daana aki watija ka bagee aki akaato danite,” etii.

²⁸Tijake Jesus eteete mana, „Akaa eneege kou ko maakodo. Kou kei tijake ajii taitage,” etii.

²⁹Kodeja me kidi akaato maa awiine tijake Jesuspa eteete mana, „Meime ani watija ka bagee?”

³⁰Etijake Jesus wo eteete mana, „Me idaana Jerusalim make Jericho jamo uweetigo. Okai oma bagee gane duba kijake okaija kagaba jabejajake wagii, tijake bokaine dani ejaikidokijake uwii.

³¹Imam idaana kou itaiga ewoudaiga jamo jawii. Edojake kotuwa-motidokijake jamokaato kai.

³²Kou danite maija Lewi epauto me idaana, kouda kodaa dakii tijake edou. Ekotuwa-motidokijake jamokaato kai.

³³Kodeja Samaria ka me idaana ita jaweetigo okai pakutitaida kodaa mei. Edojake okai ipa egai.

³⁴Okaapa uwijake jati jatonijawii, jeboo ma, utaadijo ma jatuumijake. Tijake okai kidaa keledai maida wadouwe eewijake ita jawe owaapa ouwijake eedadai.

³⁵Aweetaa naago mege wija gidijake ita jawe owaa douto-tai meepa menijake eteete mana, ’Naaedadai, aki abuma jamapugatoutage ageja ani wado mejake kaniita,’ etii.

³⁶Okei wido juppi kawi ka ki, akija gai ko, oma bagee ejakimakita me kidi maida okai watija ka bagee keegi?” etii.

³⁷Tijake wo eteete mana, „Ipa egata me kidi ki.” Etijake Jesus wo eteete mana, „Aki uwijake okai kou kei tai maija,” etii.

³⁸Jesus ita jaweetigo maki katouda dakii. Jagamo idaana eka ko Marta okaija owaapa mei etii.

³⁹Marta kodo kenekame eka ko Marjam. Okai Jesus badoopa animakijake okaija mana ejuwai.

⁴⁰Kodeja Marta kodo jakei teete umina gaagaa, tijake Jesuspa uwijake eteete mana, „Ei, Tuhan, ani nagai beu, mee? ai keneka najaikeega kou ko ani meena kei teete kodo. Eedade-uwii naaetii,” etii.

⁴¹Tijake Tuhan wo eteete mana, „Ei, Marta, Marta, aki agijo wedaba maida gaagaa umina.

⁴²Kodeja ena to gai peu. Marjam enaa agijo kodo witokijake okaapa make te jamotija,” etii.