Read Ekari LUKAS 14 Bible Online

LUKAS 14 - Ekari bible

LUKAS 14

¹Sabbat naago kodaa pika-tai ka Parisi me idaana ka owaapa Jesus naine uwijake okei ewanai.

²Okai jumaapa gemoo jakita me toojogo.

³Tijake Jesus kapogeije epi bagee ma, Parisi bagee ma egaado tai, eteete mana, „Pijo, mee? Sabbat naago me didi beu jaawii,” etii.

⁴Kodeja okei gabo tou. Tijake me kidi ejakijake didi beu jaawii, tijake uwe-tita ejaikai.

⁵Tijake okeepa eteete mana, „Meime ikii jupi sapi juwa, keledai juwa, uwo komo duba gootipi, Sabbat naago egaa kodo wado te egoja, mee?” etii.

⁶Kodeja okai kou mana kodo okei wo etii kaga.

⁷Mei etita bagee kede wado ka animakaida witokeete Jesus jadojake ena dani awe-tai mana oowegai, eteete mana,

⁸„Me ka waka bukeete buka nooteida mei kitipai, enaa animakaida taanimakai. Aki ma ko euga ibo ejaikita me manaatai na kojoka.

⁹Ikai wija mana kitita me kidi akeepa jawijake, ’Kii touda me kidi jajaikai’ katiipagi kojoka. Tijake aki ego ma mijouto animakaipage.

¹⁰Kodeja mei kati-toojogo mijouto animakai. Mei katita me mejake akeepa ’Ei, noogei, wado dani tidou’ kate-tita. Tijake aki ma enaimo animakeete bagee ibo kajaikaitai.

¹¹Akaato ibo awita me kidi daba kaitagi kouja, daana akaato mijo awita me kidi ibo kaitagi.”

¹²Tijake mei etita me kidiipa Jesus eteete mana, „Aki wanee juwa, agapi juwa, buka nope ko, akoogei ma, aki keneka ma, aki ma bagee ma, aki watija ka tonawi bagee ma mei te etii. Okei na mei katijake abu kapaitai kojoka.

¹³Kodeja aki buka nope ko, daba bagee ma, tineena peu kita bagee ma, bado ekogadaa tita bagee ma, peka wanee bagee ma mei etii.

¹⁴Tijake aki ideide taitage. Okei abu kapai kaga kouja. Enaa bagee anigoutai naago abu kapai,” etii.

¹⁵Okai ma enaimo noote bagee me idaana kou mana kodo juwijake eteete mana, „Ideide no, Ugatameja jakimakita makiida buka naine tijake manaa-tita bagee kede!” etii.

¹⁶Tijake Jesus eteete mana, „Me idaana ibo buka naine tijake me ewaa dani mei etita.

¹⁷Naine jato jakei te-tai me kidi mei etita bageepa ebadikumii, eteete mana, ’Ito kou mewei. Utoma tiki keega no.’

¹⁸Tijake okei utoma ena kidi dani to e mana te mana gou. Edoga kidaa eteete mana, ’Ani mude edaaga. Ani do-uwii ko beu kai peu kojoka najaikai kadiimai,’ etii.

¹⁹Me idaana ma eteete mana, ’Ani sapi ida gaati edaaga. Ani gaado uwiine kojoka najaikai kadiimai,’ etii.

²⁰Me idaana ma eteete mana, ’Ani ito kou waka bukipa kojoka te jawimake,’ etii.

²¹Tijake jakei te-tai me kidi joko mejake okaija ibo kidiipa kou mana kodo eti-menii. Tijake owaa ipuwe me emoge umina gajake jakei te-tai me kidiipa eteete mana, ’Egaa uwijake kii maki okogo ka ibo ita ma, mijo ita ma, uwina tijake daba bagee ma, tineena peu kita bagee ma, peka wanee bagee ma, bado ekogadaa tita bagee ma oomei,’ etii.

²²Jakei te-tai me kidi eteete mana, ’Ei, Ibo, akaa eneege dani kei teega, daana owaa gouda,’ etii.

²³Tijake ibo kidi jakei te-tai me kidiipa eteete mana, ’Uwijake ibo ita ma, okogoopa ma bida peu manaa-tai, anaa owaa tipi ke-tita.

²⁴Ani kitii kouja, anija mei etita bagee ena ma anija buka nai kodo igi te wagidou,’ etii.”

²⁵Me umina wedaba Jesus eepei. Okeepa wouga kijake eteete mana,

²⁶„Me idaana aneepa mepi ko, tijake nakame ma, ukame ma, jagamome ma, jokaane ma, kenekaane jame jagamo ma, daana akaato kidi maija be te egapi ko, anija etope-tai te kimake.

²⁷Meija okaija pija boko te dokijake te naapepi ko, anija etope-tai te kija.

²⁸Meija ikii jupi, wado mige amo mige tita owaa migiine gajake age gakimakaine animakai tiga te tija, wo ewogijawii ko tiki taita, mee? tijake.

²⁹Beu kipa, kabo makijake muumai tijawii kaga kijake dota bagee utoma ewitinaitai,

³⁰eteete mana, ’Jee! Kii me kidi migiine go-motijake boko te duwamake.’

³¹Juwa, kawi ka maki jakimake-tai kidi joko ka maki jakimake-tai ma jape makiine tijake dimi gaine animakai tiga te tija? Me sepuluh ribu ma uwijake jape dua puluh ribu ma meete kidi akado taine, mee? tijake.

³²Beu kipa, joko ka kidi poto topi gaa, dagi duwai mana ediimaine me ebadikumii.

³³Okai kouja, meija ikii jupi okai ipuwe aagijo taagijo te jaikidokipi, anija etope-tai te kija.

³⁴Diga enaa, kodeja diga kodo igi beu ki-toojogo, kawe dani tijake digaigijo awija?

³⁵Maki ma makoo ma maida epa beu, kodeja emigimakai to. Juwe-tijake gapa jago bagee juwii to tai,” etii.