Read Ekari LUKAS 16 Bible Online

LUKAS 16 - Ekari bible

LUKAS 16

¹Tijake etope-taidoopa eteete mana, „Tonawi me idaana owaa jadouto-tai kidaa edepede utoopa jatikumeete mana me ka okaija ibo kidiipa jaetii.

²Tijake ibo kidaa manaa-tijake eteete mana, ’Má mana aki maida make juwipa? Aki douto-tai mana ko joko kega-naimai, aki douto-tai mana maida peu keege kojoka,’ etii.

³Tijake douto-tai me kidaa kei teete mana, Ani magijo kei taita? Anija ibo kidaa douto-tai mana maida make najaikaipagi kouja. Ani maki utii to kaga, daana meepa agijo ediimigoo maija ego.

⁴Ani epi anija kei taine agijo, me ka owaapa nabuke-tita, anija douto-tai mana maida make najaikijake ko, dimi gai.

⁵Tijake okaija ibo kidiipa ebé tota bagee me gakita manaa-tijake edoga ka kidiipa egaado teete mana, ’Anija ibo kidiipa ebé magoo topai?’ etii.

⁶Tijake wo eteete mana, ’Uwoutu ebijadou mutoona’ etijake wo eteete mana, ’Akija ebé ugamakita kapogeije motijake, egaa animakijake jokagaati ugajawii,’ etii.[5]

⁷Tijake me idaanaapa eteete mana, ’Aki ebé magoo?’ Etijake wo eteete mana, ’Gandum ebijadou mutoona,’ etijake wo eteete mana, ’Ebé ugamakita kapogeije motijake gaatibeu ugajawii’ etii.[6]

⁸Peu ka douto-tai me kidi ibo kidaa muta etuwai, okai epi dimi ma kei tipi kouja. Aweida ka jokaane ma ko kii makiida ka jokaane kedaa euga epi dimi ka akaate tai okei ma bagee ma enaimo.

⁹Daana ani kitii, peu Mammon[7] kodo ma akooge akooge tiwei, Mammon kodo igadoke tijake okei imo to togoo to-taida kibuke-tita.

¹⁰Mijo mana maida enanaa bagee ibo mana maida maija enanaa. Daana meija mijo mana maida ena peu kipi, ibo mana maida maija ena peu.

¹¹Okai kouja ikii peu Mammon kodo maida ena peu kipa, meija maakodo jegeenaka agijo maida kijaikaitai?

¹²Daana me ino ka agijo maida ena peu kipa, meija ikiidaweda agijo kiniitai?

¹³Kei te-tai me idaana ka ma ibo wijaapa te ejuwija, me idaana be egajake joko ka kidi ei egai kouja. Juwa, me idaana kidi ejakimakijake, joko ka kidi daba ejaikai. Ikii Ugatame ma Mammon ma enaida te ejakimakija.”

¹⁴Parisi bagee, mege kibigi bagee kede, kou mana muto juwijake ewidogai.

¹⁵Kodeja Jesus eteete mana, „Ikii akaato me jumaapa inii ke maa wegaiga, kodeja ikiija kegepa ko Ugatame kidou epi. Me pekaida ibo agijo Ugatame pekaida nokii agijo kouja.

¹⁶Musaja dijo douja mana ma, tikauwa ka gokobaki tijawiidaiga wegai tita mana ma, Jahja tota wagiida to. Kou wadoutouga Ugatameja jakimakita makiida mana ugo uwidoke, daana me bida peu kidi kebagoo wadoujo kai.

¹⁷Musaja dijo douja manaida ka mijo daba mana mutoona to igadoke tai kodo ma ko, epa ma maki ma beu kija.

¹⁸Meija jagamome ejaikidokijake joko ka jagamo wo ebukipi, okai mogai. Daana meija jameme ka ejaikita jagamo ebukipi, okai mogai.

¹⁹Tonawi me idaana toojogo. Okai diiti kagaba makijake naago gakita diiti pagaadagaida umi-tou tita.

²⁰Okaija damoutoopa diime-diime te-tai idaana eka ki Lazarus, tomo abumidoke tita kidi pakuti-toojogo.

²¹Tonawi me ka kejageida make mijo gootidaa puugeida naine kibigi gai. Dodi maija mejake tomo kodo jakudeeno tigoo.

²²Ibopo umii beu gaa diime-diime te-tai me kidi bokajake Ugatame jaetigo-tai bagee ka Ibrahim mutaidaapa edoke-uwii. Tonawi me maija bokajake emakijawii.

²³Bokawouda didi gaduwaatigo peka wado doumigijake Ibrahim poto edou, daana Lazarus ejupugi-toojogo.

²⁴Tijake emeeme teete mana, ’Ei, naitai Ibrahim, ipa nagajei, Lazarus aneepa mei naaetii, kipo momogi uwo duba tokamijake anaa eta maida gemoo gemoo natijawii. Bodija wii duba didi gaduwaate no,’ etii.

²⁵Kodeja Ibrahim wo eteete mana, ’Ani joka, gaadou; aki makiida tootege gaa kodo enaa agijo go-motii, kodeja Lazarus peu agijo. Ito kou okai jakai mobu kai, kodeja aki ki didi gaduwai.

²⁶Kou to ko beu kodeja, inii ma aki ma jupi jagaa peijo topa, tijake jakai make jawiine bagee te jawimake, daana mijo make bagee maija wado te memake.’

²⁷Tijake me kidi eteete mana, ’Kou dani keetigo ko, ei, naitai, ani kadiimai, naitai owaapa ebadikumii.

²⁸Ani keneka idibi topai kouja; naaetijake okei maija gaduwaida kiija te ke-tita,’ etii.

²⁹Kodeja Ibrahim eteete mana, ’Okei Musaja kapogeije ma, tikauwa ka gokobaki tijawiidaiga wegai tita bagee ka kapogeije maija topai. Kei kede ejuwe-tai enaa.’

³⁰Kodeja wo eteete mana, ’Beu, naitai Ibrahim, kodeja kou danite bokata me idaana anigojake okeepa uwi-toojogo ko, okei tedemaipigai,’ etii.

³¹Kodeja Ibrahim eteete mana, ’Okei Musa ma tikauwa ka gokobaki tijawiidaiga wegai tita bagee ma te ejuwipai, bokata me idaana anigopi maija epaapa te taipigai,’ etii.”